Wednesday, February 7, 2007

ليه باحبها


ليه باحبها؟؟؟؟

كتير باسال نفسي السؤال ده ؟؟؟

مش عارفه ليه دايما كانوا بيعلمونا في المدرسه ويقولوا مصر ام الدنيا …مصر الحضارة .....مصر الاهرامات...مصر الاقصر واسوان

بس انا عمر مصر ما كانت بالنسبة لي كده

بالنسبه لي مصر دي حاجه تانيه خالص

بحبها ليه وايه اللي عاجبني فيها ايه؟؟؟؟؟؟؟؟؟؟؟؟
اكيد مش اهراماتها و مش ابو الهول .....الاماكن دي زرتها اه هي جزء مني لا

واكيد مش وادي الملوك والملكات....... شفته اه ..اعرفه كويس لا

ولا المتاحف و المعابد....اتفرجت عليها اه فيها شئ مني لا

بحبها لانها بلدي مش لانها اجمل بلاد الدنيا زي مابحب امي لانها امي مش لانها احلي واحده في الدنيا

اللي باحبه في مصر خفه دم اهلها حتي في اصعب لأ في ابشع المواقف

اللي باحبه في مصر هو شارعنا و البياع اللي اتعودت اشوفه في اوله

اللي باحبه في مصر قعدة نقعدها كلنا في البلكونه نقزقز لب وقت العصريه ونتفرج علي عيال بتلعب كورة في الشارع

اللي باحبه في مصر تمشية علي كورنيش البحر واحنا بناكل درة مشوي نرجع بعدها مش شايفين قدامنا من كتر التعب

اللي بحبه في مصر رمضان ولمة رمضان وزينة رمضان

اللي باحبه في مصر ماتش للاهلي يتلم عليه شباب العيلة وكلهم بيدعوا ان الاهلي يفوز(والحمد لله غالبا الاهلي بيفوز)

اللي باحبه في مصر طفولة عشتها ومدرسة رحتها وواجبات عملتها وكتب ذاكرتها

االلي باحبه في مصر احلام شباب عشتها انا وصحباتي قعدنا نحلمها سوا ونرسمها مع بعض

اللي باحبه في مصر محاضره حضرتها مع صحباتي وكل لحظه نبص لبعض ونبص لساعتنا امتي نخلص ونخرج نتمشي مع بعض
اللي بحبه في مصر هو كل حاجه فيها باحبها بسلبياتها اللي بنحاول نغيرها

وايجابياتها اللي بنفرح بيها

باحب فيها بساطتها

زحامها

هدوئها

وسكونها

ثورتها

وغضبها

اهلها

وشبابها

علمها

وخريطتها

ارضها

وترابها

حتي هواها

ومحدش يسالني المميز في هواها يخليه يتحب.. معرفش غير ان هواها لوحده غير اي هوا في الدنيا..مع اول خطوات اي مسافر علي سلم الطيارة اول حاجة بيعملها انه بيملا رئته بهواها

اقولكم

من الاخر كده باحب كل حاجة فيها

3 comments:

Anonymous said...

صدقت حبيبتى .. بجد كلمات رائعة احس فيها بصدق الإحساس .. ما شاء الله .
بس بجد حلوة او كلماتك دى اننا مش بنحب مصر علشان الاهرامات وجدو ابوالهول والكلام ده
ههههههههههههههههههه
اضحك الله سنك حبيبتى

Anonymous said...

مقال رائع بحق ماشاء الله عجبنى جدا التشبية الدقيق ده (بحبها لانها بلدي مش لانها اجمل بلاد الدنيا زي مابحب امي لانها امي مش لانها احلي واحده فى الدنيا )
وأعتقد ان مشاعر الحب دى لمصر هتترجم فى المستقبل لعمل وتضحية من أجل رفعتها وتحقيق حلمك وحلمنا حلم الحرية
...
صحيح....ياترى الزمالكاوية هيدخلوا المدونة بعد كده؟؟

حلم الحرية said...

حفيدة البنا
مين جدو ابو الهول ده ؟؟؟

بالاسلام نقدر نحلها
لالالالالالالالالا متقوموش عليا الزملكاوية ....الزمالك ده زي الفل
وبعدين انا مقلتش حاجة غير ان الاهلي غالبا بيفوز اليومين دول ..حد يقدر ينكر؟؟؟؟؟؟؟؟؟؟؟