من وحي مؤتمر المدونين

تابعت تغطيات المدونين لمؤتمر المدونين تمنيت لو كتب احدهم عن اهم شئ في المؤتمر من وجهة نظري

عن المعني الذي استفدته ربما اكثر من اي شئ اخر في المؤتمر بخلاف التعرف علي اصحاب المدونات

(علي اعتبار ان (معظم المدونات من البنات اللاتي تعرفت عليهن كن حديثات التدوين ولم اكن اعرف مدوناتهم

عن هذين النموذجين اتحدث

عن تلك الجلسة التي جمعت المدونين حديثي التدوين باثنين من قدامي المدونين

(عبد المنعم محمود ( الاخواني )...علاء سيف ( الليبرالي

عن التقاءهم مع شباب المدونين وتواصلهم معهم...مع تنحية اي اختلافات في الايدولوجيات والقناعات

ان نلتقي علي الشئ المشترك بيننا.....اننا كلنا مصريين ...مدونيين ...يجمعنا حلم الحرية لهذا الوطن

ان نقتنع ان اختلافنا اختلاف تنوع لا اختلاف تضاد

كلنا لنا نفس الهدف..... ان نري مصر افضل واعلي واجمل ....ربما تختلف الطرق التي اخترناها للوصول لهذا الهدف ....لكن يظل لنا نفس الهدف ...ان تتخلص البلد من الفساد والديكتاتورية ينعم بديموقراطية حقيقية

منذ فترة حضرت ندوة لدكتور عصام العريان ركز علي هذه النقطة بالتحديد

الانفتاح علي الاخر...اننا لسنا الوحيدون علي الساحة ...هناك اخرين يحبون بلدنا كما نحب بل واكثر ....هم يعشقون ترابها....يعملون من اجلها ليل نهار

ربما اخترنا طرقا مختلفة لكن يظل الهدف واحد يستحق ان نتعاون من اجل الوصول اليه

اتمني لو نري جميعا الامر من هذا المنظور....

وعندما اذهب لصديقتي الاخوانية لادعوها لحضور نشاط لاحدي الاسر في اتحاد الكلية اتمني ألا اراها تنظر لي بدهشة

واستنكار وتسالني :انتي بتعمليلهم دعاية !!!؟؟

ايوة باعملهم دعاية ....ما الذي يمنع اني اعمل لهم دعاية واشارك في انشطتهم

اتمني الا اري تعليقات مدونين الاخوان تقتصر علي مدونات الاخوان ...ويتحول الامر الي اننا ببساطة - بنتكلم ونرد علي بعض- اتمني ان اري تعليقاتهم عند المدونين من غير الاخوان

ان ينتشروا

يتبادلوا الافكار

يندمجوا بالاخرين

ان يفيدوا ويستفيدوا من الجميع ايا كانت تيارتهم او اتجاهاتهم
ببساطة ....ان يوصلوا الرساله التي من اجلها اخترت التدوين واختاره غيري من الاخوان
ان نقول لغير الاخوان اننا
ربما نختلف في الاتجاهات ..في القناعات ....لكن يظل المشترك بينا اكثر بكثييييييييييييير

انسانيتنا...وانتمائنا الأكبر لوطننا وامتنا
ـــــــــــــــــــــــ

علي هامش السفرية

منك لله يا عيلة فضحتيني انتي وصفاء ...انتي علي مدونتك وهيه عالمنتدي

مكنتش واحدة كانز معزومة عليها

بجد كان يوم زي العثل

ـــــــــــــ
الي ثنائي عشرينات الرائع

مني سليم ومروة صلاح

بجد بجد

شكرااااااااااااااااااااا

علي العزومة والاكلة والقعدة والتمشية والرغي والهزار

علي كل حاجة

شكرررررررررررا

حقيقي اليوم كان رائع

كنت محتاجاله فعلا

تري هل يؤلم الرصاص؟

هل يؤلم الرصاص؟

لا اذكر متي واين قرات هذا السؤال او سمعته

لكنني حقيقة ظللت اسيرة له لفترة طويلة

لا اعلم له اجابة فبالطبع لم اجربه يوما ولا اعرف احدا قد جربه

قد اشاهدهم علي التلفاز يطلقونه

او اشاهد بعضهم يصاب به

اشاهدهم يقعون ...يتالمون ..يصرخون ...يبكون

احزن لهم ....اتالم لما اصابهم...قد ابكي لحاله

لكن يظل المي ليس كألمهم.. ويظل حزني ليس كحزنهم

هم يقفون في مواجهة المدفع وامام البنادق و الرشاشات

يواجهون الموت في كل لحظة

يقدمون الشهداء ليل نهار

وبينما نحن نراقب من بعيد ...نجلس في مقاعد المتفرجين امام الشاشات

ربما نقدم ما يخدم القضية

لكننا نظل - مهما فعلنا - دائما نجهل اجابة السؤال

تري هل يؤلم الرصاص

؟؟؟؟؟؟؟

اما هم

هم من يدركون حقا ماهية السؤال ؟

ويعرفون فعلا ما الاجابة

هم رمز الصمود والصبر رغم كل المحن والنكبات المتتالية والحصار والموت

صامد انت ايها الشعب المناضل رغم الحصار والقتل

صابر انت علي كل الابتلاءات و المحن

كنت دائما اقوي من كل المحن واشد من كل الصعاب

واليوم تقابلك محنة جديدة لم تكن تتوقعها او تنتظرها

اعلم انها اصعب المحن فاليوم هي بين ابناءك بسبب خيانة بعضهم

لكن اثق انك ستتخطي هذه المحنة وتخرج اقوي بكثير كما كنت تفعل دئما

محنة ووضع متوتر ندعو الله الا يستمر طويلا

وما بين وضع قائم وخطوات نرتقبها من كل الاطراف غير اننا لا يمكننا باي حال من الاحوال التنبؤ بأي منها

يظل الصراع القائم بين الاطراف المختلفة لا ندري ايهم سيفوز وايهم سيخسر

لكن ما اعلمه ويعلمه الجميع انه في حال عدم استجابة البعض لنداء العقل ...ولضرورة الحوار

وبالتالي عدم سرعة حل المشكلة القائمة

فان الخاسر الاكبر سيكون فلسطين وشعبها وقضيتها

ــــــــــــــــــــــــــــــــ

اضافة علي الموضوع

1-

اعجبني كثيرا تعليق الاخ إخوانى مخربش

صوت الخيانة

مؤلم

اكثر من الرصاص

2-

مقال فهمي هويدي- محاولة لفهم ما جرى في غزة

مقال مهم ...في محاولة لفهم الموقف ..اقروه

ـــــــــــــــــــــــــــــــــــــــــــ

في النهاية

كلمات ابكتني حين سمعتها

في وجه من ترفع سلاحك

يمكنك سماعها هنا اذا لم يعمل لينك الصوت علي المدونة

انا واخويا الكبير ...لقطات في شريط الذكريات

اتفقت معاك بعد ما قريت موضوعك الاخير وعجبني جدا ... اني حانزل لينك لموضوعك عالمدونة عندي في نهاية موضوعي الجاي
وكنت ناوية اعمل كده وكان في مواضيع جاهزة عندي عالدرافت كنت حانزل واحد وفي اخره اسيب اللينك
معرفش ايه اللي خلاني اغير رايي
لكن في نهاية الامر لقيتني بافتح صفحة جديدة وباكتب بوست جديد

انا واخويا ..خواطر وذكريات

ابدا بايه ؟؟ابدا بايه
ابدا بطفولة مشتركة كنا فيها في نفس المدرسة... وللا ابدا افكار واراء متقاربة ...وللا ابدا بانتماء واحد للاخوان ...وللا ابدا بحاجات اتعلمتها منك ..

اللقطات كتير في شريط الذكريات
اقولك الاسهل ابدا باللي افتكره

اللقطة الاولي في شريط الذكريات

طفولة قضيناها مع بعض في نفس المدرسة<<مدرسة المدينة المنورة >> تقريبا كنا واخدين فيها مؤبد

ابتدائي واعدادي وانت كملت ثانوي ...لكن انا للاسف طلعت في نص المدة لان مفيش ثانوي بنات
افتكرت الاذاعة اللي كنا مسيطرين عليها كل واحد فينا في فصله ولما كنا بنيجي نجرب مقدمة الاذاعة ادام بعض في البيت ...وحفلة اخر السنة اللي غالبا كنت اطلع انا فيها وانت لا ...معلش بقي مش اي حد ...الرك عالشخصية( بهزر (بهزر ..اوعي تضرب

افتكرت سيارة المدرسة واحنا مستنينها مع بعض ادام البيت...افتكرت لما في فترة لغينا الاشتراك وكنت باروح معاك لما كنت بتلطعني لحد ما تخلص الماتش مع صحابك ...يعني اتلطع انا في الشمس وانت تلعب

اقول ايه بس .....انه حقا مجتمع ذكوري متسلط)

استني لما اروح انادي بتوع حقوق المراة ...قلنا بهزر

(من غير ضرب

اللقطة الثانية

لما كنا في اعدادي وفي ثانوي وكنا نقعد نفكر يا تري عازين نطلع ايه لما نكبر دكاترة ومهندسين وكلام من ده

كانت دايما اجابتك هي الاغرب

كنت عايز تطلع زعيم

نقولك رئيس او وزير

ترد تقول لا زعيم

الزعماء بيعيشوا في وجدان الشعوب وياثروا فيهم لكن الرؤساء لا

اقول ايه بس...كنت فاهم سياسة من يومك

اللقطة التالتة

حلمك انك تدخل اعلام او اقتصاد وعلوم سياسية لانك بتحب القراية وبتعشق السياسة من وانت صغير

وانتهي الحلم بدراسة حاسبات ومعلومات

بس حلم الصحافة فضل جواك ...كتاباتك بتقول كده

لما باقرالك اي حاجة باقتنع بانك كان لازم تدرس صحافة

انا عارفة انك بتفكر تدرس اعلام بعد حاسبات

عايز نصيحتي

نفذ اللي بتفكر فيه وادرس اعلام ...انت بتحب المجال ده فعلا وانا واثقة انك حتنجح فيه

اللقطة الرابعة

لما اكون سهرانة باذاكر وتكون انت اخر واحد ينام في البيت واشوفك قبل ما تدخل تروح عند عمر واسامة وتغطيهم كويس وتطمن عليهم...المشهد ده لما اشوفه من ماما عادي لكن منك انت كنت باقف ادامه كتير

اللقطة الخامسة

لما كان حد فينا يكون تعبان تعب بسيط وتلاقيه عامل دوشة وهاتولي ادوية وودوني للدكتور كنت دايما تقول ليه بتعملوا دوشة ..ليه الشعب كله لازم يعرف ان عندك مغص بسيط وللا سنانك واجعك... وابسط حل عندك بتقدمه خد مسكن واسكت
في الاول كان بيضايقني اوي الموقف ده لغاية ما فهمت ازاي وليه
فهمت لما كنت باشوفك باين علي وشك وفي عينيك انك في مشكلة لكن محدش فينا يعرف بيها غير بعد ما تعدي
فهمت ازاي اقابل الناس بابتسامة مهما كان اللي جوايا من الم او مشكلة
فهمت ان الناس ملهاش ذنب في مشاكلنا والامنا
فهمت واتعلمت ده

اللقطة السادسة

بعد يوم سفر متعب للقاهرة
وانت راجع من عشرينات تقعد تحكيلنا يومك قضيته ازاي

اد ايه بتحب الموقع ده والمكان ده والفريق ده

مصعب وهواري ومني ومروة ودعاء

كل مرة بتحكيلنا عنهم كنت بتشوقنا اننا نقابلهم حقيقي نفسي اقابلهم خاصة مني ...
المرة الجاية لما تسافر ابقي خدني معاك
مستنياني هناك عزومة من مني وعزومة من مروة ..بلاش تضيع العزومتين عليا
انا عارفاك ممكن تطمع في السندويتشات واروح انا في الرجلين

اي حركة ندالة ممكن اتصل بمني تقابلني علي محطة القطر واسافر لوحدي ...العزومة تستاهل يابني

اللقطة السابعة

لما كنت بتكلمني علي ( ملكة اليمن السعيد ) وعينيك بتلمع وانت بتتكلم... تعرف يا محمد باقعد كتير افكر في المعضلة اللي انا وانت عارفينها

وكلام استاذ ( م. أ) لما انت حكتله الموضوع ..ان كتير من خيوط الحل في ايديا انا وسمية كلامك عن المستقبل وحلمك واللي نفسك فيه
وولادك اللي حتطلعهم عباقرة ولما كنت اقولك طب لو مطلعوش عباقرة ....
ازاي كنت بتضحك ساعتها وتقولي يبقي العيب منها ولادي انا لازم يكونوا عباقرة

علي فكرة يا محمد ومن غير ما تحس بنفسك ولا تتنفخ يعني ....كلامك عن طريقة التربية اللي حتمشيها مع ولادك لو نفذته اكيد حيكونوا عباقرة

اللقطة التامنة

خلافنا الدائم علي نزولي الكتير ...واعتراضك علي خروجي الكتير من لقاء.. لدورة.. لمؤتمر.. لندوة...وكلمتك المفضلة محدش في المستقبل حيرضي يا بنتي انك تسيبي بيتك وتنزلي بالطريقة دي

(شكرا علي جرعة الاحباط يا عم)

المشكلة اني عارفة انك عندك حق... تعرف يا محمد كتير بافكر في كلامك ده وياما وانا باكتب جدول لتنظيم الوقت كان كلامك بيرن في وداني وكنت باحاول اقلل عدد الساعات اللي انزل فيها علي اد ما اقدر...

لكن جايز علشان عارفة اني مش حاعرف اعمل كده في المستقبل باحاول استغل الفترة دي علي اد ما اقدر

اللقطة التاسعة

حوارنا ونقاشنا المستمر علي شغلنا مع الاخوان ...

(ولما نقعد نتفزلك ونقارن بين شغل الجامعة (اللي انا فيه ) وشغل المنطفة ( بتاعك
واختلافنا المستمر ما بين قناعتي ان المستوي التربوي للافراد قل بدرجة ملحوظة وده موضوع خطير لازم يستوقفنا قبل اي شئ تاني
ورايك ان ده ضريبة في ظل الانفتاح وتزايد الاعداد واننا لازم نتقبل ده ونتعامل معاه

اللقطة العاشرة

لقطة مش ممكن تتنسي

لحظات اعتقالك ..ايام اعتصامات القضاة
تعرف يا محمد ايامها واحدة صاحبتي اتصلت بيا ولما عرفت قعدت تعيط وتقولي هما ليه بيعملوا فينا كده

قعدت اهديها واقولها اني مش زعلانة

سالتني انا اقصد ايه وازاي مش زعلانة

قلتلها محمد راح ياخد شهادة الجودة وجاي ....

يومها ماما قالتلي ازاي بتقولي كده وكانك مش هامك
بس انا فعلا مكنتش زعلانة
لاني كنت مقتنعة يا محمد انك كنت محتاج الفترة دي
واكتشفت بعدها لما قريت ورقة كنت كاتبها هناك وكنت ناوي تبعتهالنا انك ازاي كنت محتاج الفترة دي وانك قبلها كنت بتدعي ان ربنا يرزقك عمرة او اعتقال

واد ايه انت استفدت في الفترة دي

اللقطة الحداشر

دي ما افتكرتهاش لانها لسه محصلتش

لقطة باتمني اشوفها بعد عشرين سنة

انت وملكة اليمن السعيد وولادكم

وماما وبابا

وانا وسمية واسامة وعمر وولادنا

كلنا متجمعين مع بعض عندك في بيتك بمناسبة الترقية الجديدة

قاعدين مع بعض نفتكر ايام قضيناها وذكريات جمعتنا واحلام عشناها مع بعض واحنا صغيرين

اللقطة الاتناشر

ودي برضة ما افتكرتهاش لانها برضة لسه ما حصلتش

اللقطة دي بقي احلي لقطة

اكون قاعدة بافتكر الايام دي وييجي في بالي اني عايزة اشوفك وف لحظة تكون ادامي

عارف الكلام ده فين وامتي

ان شاء الله في الجنة

ربنا يجمعنا احنا وباقي اهلنا واحبائنا في جنته

قبل ما انهي موضوعي حبيت اقولك

شكرا علي حاجات كتير مقلتهاش ومكتبتهاش

عندما يعدم الرمز...لتكون شرارة البداية

او القلب الشجاع(brave heart)منذ عدة ايام شاهدت فيلم
استمتعت بالفيلم كالعادة رغم انها ليست اول مرة اشاهده فيها
وعند لحظة اعدام البطل
...لا ادري لماذا ...لكني وجدت نفسي استعيد مشاهد الاعدام المختلفة التي ربما شاهدتها او سمعت عنها او قرات عنها

نفس المشهد يتكرر بحذافيره
القوة الغاشمة المسيطرة..تتمثل في حاكم ظالم وسلطة مستبدة
رمز للثورة ورفض الظلم

يقف امام الظالم ليقول لا
يصدر القرار باعدام هذا الرمز
ربما تختلف هذه النماذج في الظروف والملابسات المرتبطة بحدث الاعدام...لكن الشئ المشترك هو لحظة تنفيذ الحكم
لحظة الاعدام
عندما يتجمد المشهد
ويصمت الجميع
ولا يتبقي في الصورة سوي مشهد واحد تملا فيه صورة الرمز كادر الشاشة
ثم تنطلق الكلمات
ربما تكون هذه الكلمات هي اخر كلمات هذا البطل قبل ان يفارق الحياة ويرحل
غير ان كلماته هذه لا ترحل برحيله
وانما تبقي لتصنع حياة شعب باكمله او ربما تضئ الحياة لمن يحملون اللواء من بعده


المشهد الاول
اعدام وليام ولاس

(brave heart)من فيلم

وهي قصة حقيقية وقعت في القرن الثالث عشر باسكتلندا
كان فيها ويليام والاس هو رمز الثورة ضد المستعمر الانجليزي
في لحظة اعدامه
كانت كلمته الاخيرة او فلنقل الشرارة الاخيرة التي ابي ان يترك الحياة الا بعد ان يشعلها
يحاول جلادوه جعله يقر بالولاء للملك او ان يطلب الرحمة
ثم تسكت الجموع في انتظار ان ينطق بطلب الرحمة
لكنه بدلا من هذا يصرخ بكل قوته
الحرية
او
(freedooooooooooooooooooooom)


المشهد الثاني
اعدام المناضل الليبي عمر المختار

ان لم يكن الكثيرون منا قد قراوا عنه ...-وما كتب عنه يستحق بالفعل القراءة - الا ان معظمنا ان لم يكن كلنا قد شاهد الفيلم
قبل المحاكمة

يساله غراتسياني: لماذا حاربت بشدة متواصلة الحكومة لفاشستية ؟

أجاب الشيخ: من أجل ديني ووطني
غراتسياني:ما الذي كان في اعتقادك الوصول إليه ؟

فأجاب الشيخ: لا شئ إلا طردكم … لأنكم مغتصبون، أما الحرب فهي فرض علينا وما النصر إلا من عند الله.
غراتسياني: لما لك من نفوذ وجاه، في كم يوم يمكنك إن تأمر الثوار بأن يخضعوا لحكمنا ويسلموا أسلحتهم ؟.فأجاب الشيخ: لا يمكنني أن أعمل أي شئ … وبدون جدوى نحن الثوار سبق أن أقسمنا أن نموت كلنا الواحد بعد الأخر، ولا نسلم أو نلقي السلاح…
ثم تاتي المحاكمة
وعندما يترجم له الحكم يقول:إن الحكم إلا لله … لا حكمكم المزيف ... إنا لله وإنا اليه لراجعون
يقول عنه بعض من كانوا بالقرب منه وهو يصعد الي منصة الاعدام انه كان يؤذن في صوت خافت آذان الصلاة، ويقول البعض انه تمتم بالآية الكريمة "يا أيتها النفس المطمئنة إرجعي إلى ربك راضية مرضية" ليجعلها مسك ختام حياته البطولية
ونذكر كلنا المشهد الاخير
اعدامه ..سقوط نظارته...الهرج والمرج

ثم

انطلاق الزغاريد

المشهد الثالث
اعدام سيد قطب

يحاول احد الظباط الضغط عليه للتنازل
اكتب يا أخي هذه العبارة فقط : " لقد كنت مخطئا وإني أعتذر ... " .
ويرفع سيد قطب وجهه اليه ويرد في هدوء عجيب : أبدا.. لن أشتري الحياة الزائلة بكذبة لن تزول !
يقول له الظابط بلهجة الحزن : ولكنه الموت يا سيد...
وأجاب سيد : " يا مرحب بالموت في سبيل الله .. "

يرحل سيد قطب عن الحياة ولكن بقيت كلماته تتحدث عنه
بقي تفسير القران (الظلال) الذي كلما قراته اخذت افكر كيف فهم أسرار القرآن ليخطها علي الورق كلمات سهلة بسيطة لكنها ممتلئة بكم من المشاعر تتميز بالوضوح والصدق

رحل عن الحياة نعم لكن كلماته بقيت كما كان يتمني ويقول
أن كلماتنا تظل عرائس من الشمع ، حتى إذا متنا في سبيلها دبت فيها الروح و كتبت لها

المشهد الرابع

اعدام غلام اصحاب الاخدود

يحاول الملك التخلص منه بكل طريقة فيدفع به مع رجاله مرة الي الجبل ومرة الي البحر ليتخلصوا منه

وفي كل مرة يقول الغلام اللهم اكفنيهم بما شئت فينجيه الله ويموت باقي الرجال

ويعود الغلام الي الملك قائلا كفانيهم الله

ثم يقول للملك اخر كلماته اليه أنك لست بقاتلي حتى تفعل ما آمرك به قال ما هو ؟ ..

قال: تجمع الناس في صعيد واحد و تصلبني على جذع ثم خذ سهماً من كنانتي ثم ضع السهم في كبد القوس ثم قل : بسم الله رب الغلام ثم ارمني فإنك إذا فعلت ذلك قتلتني ...

وينفذ الملك ما قاله الغلام ويقول بسم الله رب الغلام ويلقي بسهمه فيصيبه في مقتل

عندها بهذه الكلمة الاخيرة تظهر الحقيقة واضحة امام الناس

فيقول الناس آمنا برب الغلام

لقراءة قصة اصحاب الاخدود

موضوعي هذا اهديه الي كل الطغاة ..اقرأوا التاريخ جيدا

في كل مرة

كان الطغاة يذهبون ..وتذهب ذكراهم ادراج الرياح ....لا بل مزابل التاريخ

وايضا في كل مرة

كانت الرموز تبقي حاضرة بافعالها وبكلماتها في وجدان الشعوب وفي تاريخ الامم وذاكرة الايام

ياما دقت عالراس طبول

ليه بيحصلنا كل ده؟؟؟

اعتقالات...محاكمات عسكرية...مصادرة اموال..اغلاق شركات

ليـــــــــــــــــــــــــــــــــــه

؟؟؟؟؟؟

الاخوان مش هما اللي هربوا فلوس البلد برة وسرقوا البلد
ولا الاخوان هما اللي قتلوا الناس في العبارة

ولا الاخوان هما اللي حرقوا القطارات

ومش الاخوان هما اللي وقعوا الطيارة

ومش هما اللي دخلوا المبيدات المسرطنة

ولا الاخوان هما اللي بيعذبوا الناس في اقسام الشرطة

ومش الاخوان هما اللي بيكمموا الافواه وبيكبتوا الحريات ويقفلوا الصحف

ولا هما اللي بيزوروا الانتخابات

مش هما

امال لـــــــــيـــــــــــــــــــــــــــــــه

ليه بيحصلنا كده

؟؟؟؟؟؟؟؟؟؟؟؟؟؟؟؟؟؟

ايوة عارفة الاجابة لكن السؤال باطرحه مش من باب الاستفهام باطرحه من باب التعجب او الاستنكار

مخنوقة ومتضايقة

احاسيس كتير مالياني

احاسيس بالظلم وبالعجز ...بالقهر وبالمرارة

ومع كل خبر جديد بخصوص المعتقلين الاحاسيس دي بتزيد وتزيد

بيملاني احساس بالظلم وانا بتابع اللي بيحصل لعبد المنعم

وباغرق في احساس بالعجزوانا باشوف عائشة بتبكي وهيه بتنادي عد يا ابي
وبيملاني احساس بالمرارة وانا باسمع معاذ بينادي ابي انت حر وراء السدود
ومقدرتش امنع دموعي وانا باشوف دموع سارة وهيه بتسال لماذا تاخذون مني عائلتي؟؟

من كام يوم ولاول مرة من بداية الاعتقالات يتغير احساسي لاحساس بالفرحة بعد ما قريت خبر ان مجلس الدولة يبطل قرار رئيس الجمهورية بإحالة الإخوان للمحاكمات العسكرية
بعدها بسرعة وكانهم خايفين احسن بعدين نصدق ان في حاجة اسمها سيادة قانون واستقلال قضاء في ظرف ساعات يتقدم طلب الطعن وخلال ايام تعقد محكمة منتدبة من مستشارى رئيس الجمهورية والوزراء ( يعني خصم وحكم في نفس الوقت ) يعني محكمة خاصة واجراءات خاصة في يوم خاص بتنظر في قضية خاصةبعدها ييجي الحكم الصدمة

وارجع الاقي نفسي مالياني مشاعرالاحباط والعجز والظلم من تاني

لكن

لا

مش حاسيب المشاعر دي تتمكن مني

مش حاسيبها تسيطر عليا

لااااااااااااا

لاااا عالية اوىىىىىىىىى

باقولها لهم وباقولها لنفسي قبلهم

يجرالنا مهما يجرالنا

يعملوا مهما يعملوا

مش حيهمنا

مش حنضعف

مش حنبطل

مش حنسكت

مش حنمل

مش حنسافر

اعملوا مهما تعملوا

ياما دقت عالراس طبول

اعتقالات

...ياما اعتقل الاخوان...دخلوا المعتقلات وهما اخوان وخرجوا وهما برضة اخوان
لكن الفرق انهم خرجوا اقوي واشد واكثر عزيمة لمواصلة الطريق

لو علي مصادرة الاموال

..مش اول مرة تتصادر ده مجموع اللي اتصادر لغاية دلوقتي حسب كلام النائب محسن راضى 100 مليون جنيه
يصادروها لو عايزين ..

بس هما نسيوا ان الاخوان مش باموالهم

الاخوان برسالتهم

بدعوتهم ..

بجهادهم

لو علي اغلاق الشركات

ياما اغلقت شركات للجماعة سواء عام 48 أو عام 54
وايه اللي حصل بعدها..بنرجع نبني من تاني..

ازمة صعبة صحيح بنمر بيها دلوقتي
لكن وزي ما بيحصل كل مرة
حنحتوي الازمة وحنكمل من جديد
حنواصل من تاني دعوتنا وطريقنا

حنواصل بعزيمة اقوي وهمة اشد

ايوة حنكمل اقوي واشد

التجربة بتقول كده

التاريخ بيقول كده

التاريخ بيقول ان7 انظمة حكم مرت علي الاخوان

كلهم حاولوا القضاء عليها

لكن منجحوش

اصل الاخوان رساله وفكرة
والافكار مش ممكن تموت

..جايز الافراد يموتوا لكن الفكرة لا

جايز الافراد يتحبسوا لكن الافكار لا

مبتحبسهاش اسوار ولا بتقيدها معتقلات

جايز الاموال تتصادر لكن الافكار لا

مهما حاولوا يصادرواافكارنا

برضة الافكاربتنتشر

من الاخر يعملوا فينا مهما يعملوا

طالما في سكة ربنا

مش حيهمنا

طالما عشان خاطر مصرنا

مش حيهمنا

احنا اختارنا الطريق ده واحنا عارفين انه طريق جهاد

اختارناه واحنا عارفين ان طريق الدعوات دايما مليان محن وابتلاءات

اختارناه واحنا عارفين انه محتاج صبر وتضحيات

اختارناه واحنا عارفين انه مش حيكون مفروس بالورود

كنا عارفين اننا حتقابلنا فيه صعوبات واشواك

حتقابلنا لكن حنصبر عليها

سنصبر لاننا نعلم كلما زاد الابتلاء زاد الثواب ان شاء الله

سنصبر ونصبر ونصبر
سنصبر حتي يعجز الصبر عنا

من هنا ورايح

مشاعري اللي فاتت حاستبدلها بمشاعر تانية

مشاعر

امل

و صبر

وثبات

وعزة

واصرار علي الاستمرار

واخيرا رجاء ودعاء ان نكون ممن قال الله عز وجل فيهم
(إنه من يتق ويصبر فإن الله لا يضيع أجر المحسنين)

سمعت نونية القرضاوي ولقيتها بتعبر بالظبط عن اللي جوايا ..اسمعهوها معايا واقروها ...واخيرا قبل ده وده عيشوا معانيها

صبرا أخي في محنتي وعقيدتي*** لابد بعد الصبر من تمكين

سنعود للدنيا نطبب جرحها***سنعود للتكبير والتأذين

تالله ما الدعوات تهزم بالأذى *** أبداً وفي التاريخ بر يميني

ضع في يدي القيد ألهب أضلعي *** بالسوط ضع عنقي على السكين

لن تستطيع حصار فكري ساعة *** أو كبح إيماني ورد يقيني
فالنور في قلبي وقلبي في *** يدي ربي وربي حافظي ومعيني

سأعيش معتصما بفضل عقيدتى *** وأموت مبتسما ليحيى دينى

ملحوظة صغيرة

الموضوع ده انا نزلته قبل كده وبعدها بساعتين رفعته عالدرافت عشان كان محتاج تعديلات ...خلال الساعتين دول اخونا محمود سعيد كان دخل وكتب تعليق ..ومشكورا صحح لي معلومة بخصوص الابيات لاني مكنتش اعرف انها نونية القرضاوي...وبما ان تعليقه اتحذف لما رفعت الموضوع انا قلت احقاقا للحق انوه عن الامر

التاج علينا حق...كلاكيت تاني مرة

التاج ده وصلني من محمد العناني

تاج كله اسئلة عن المذاكرة..مش عارفة ليه بيقلبوا علينا المواجع ...بقي انا باهرب من المذاكرة بالقعدة عالنت تقوموا تفكروني بيها

هل كنت طالب شاطر فى المدرسه ؟

الحمد لله كنت طالبة شاطرة اوي في المدرسة

ومحتفظة بشهاداتي في كل المراحل ..من ايام ابتدائي ومرورا بثانوي في درجي لغاية دلوقتي (فرحانة بنفسي بقي حد عنده مانع ) اصلي كنت دايما من الخمسة الاوائل ..فباعتبر الشهادة في حد ذاتها والترتيب منورها حاجة تستحق الاحتفاظ بيه

(وش فرحان بنفسه ومزاطط)

اهو الواحد كل فترة يطلعها ويستعيد الذكريات

يللا بقي نقول ايه ..كانت ايام جميلة والله

(وش بيعيط ومتشحتف اخر شحتفة)

ايه اكتر ماده حبيتها واكتر ماده كرهتها فى المدرسه والجامعه ؟

في المدرسة

كنت باحب الرياضة اوي

والمادة اللي بعدها العربي خاصة النحو والنصوص والبلاغة

ثم الفيزياء

خليط من المواد مبيجمعش بينهم غير انهم مش فيهم حفظ ..وبيعتمدوا علي الفهم اولا واخيرا
اه كنت حانسي ...كنت باحب الانجليزي كمان اوي

والرسم

والخط العربي

ومش عايزة حد يألس علي اخر مادة دي

(وش مطلع مسدسات وحيضرب في المليان)

انا كنت باهتم اوي بحصة الخط وباعتبرها احلي حصة.. وباستناها كمان من الاسبوع للاسبوع ..كان بيدينا الحصة دي في اعدادي مدرس متخصص خط عربي فقط ..وبالتالي كانت حصة جد زيها زي اي حصة والمدرس بيصحح ويتابع وكلام من ده

اكتر مادة كنت باكرها في المدرسة او نقول مش بافضلها الجغرافيا ....والتاريخ ..مش باقولكم مش باحب الحفظ خاااااااااااالص

(وش بيشد في شعره)

في الكلية بقي

مممممممممم

لازم يعني حكاية مواد باحبها دي

نقول باحب الفيزيا برضة....و دي بندرسها في اول سنة بس
ايه تاني

الرياضة ودي بندرسها في تاني سنة بس

ههههههههههههه

شكلي حاكرر المواد نفسهم تاني

بس هو مفيش عربي عندنا

لا بجد بجد يعني وبصراحة
كليتنا المواد كلها حفظ بطريقة غير عادية ...نسبة الفهم قليلة اوي خالص جداااا
لو اعرف كده قبل ما ادخلها مكنتش دخلتها

يمكن اكتر مادة بالنسبة لي معقولة هيه السيوتكس او الصيدلانيات تقريبا هيه المادة الوحيدة اللي باحبها في الكلية

وعامة اي مادة او كورس فيه فهم عندنا بالاقي نفسي باحبه

اما بقي اللي باكرهه في مواد الكلية

مممممممممممم
مش حاقول باكرهه ..خلينا نقول مش بافضله
تقريبا كل المواد اللي فيها صم وحفظ ودش وخلاص مش بافضلهم ....ودول يا مكترهم في كليتنا
(وش بيصوت من اللي بيشوفه )

صحيح مش عايزة حد يفهمني غلط ..من كلامي اللي فات عن مواد الكلية واني مش بافضل معظمها

انا يا جماعة تقديراتي السنين اللي فاتت تتراوح من جيد لجيد جدا

يعني باناضل برضة وعايشة

(وش رافع ايده بعلامة النصر)

كنت عايز تطلع ايه وانت صغير ؟

مممممممممم

ليه بس تقلبوا عليا المواجع

وانا صغيرة كان نفسي اطلع مهندسة

(ومش عايزة اسئلة عبقرية من نوعية ايه اللي دخلك علمي علوم)

واحيانا كان نفسي اطلع دكتورة..

طبيبة نفسية بالذات ( سامعاك ياللي بتضحك)

وجاتلي فترة كان نفسي ادخل فنون جميلة او معهد خطوط واشتغل في مجال الرسم والخط

وطبعا بعد نتيجة الثانوية العامة وانا باختار وباكتب الرغبات

ايه افضل كلية للبنات

صيدلة

يبقي نكتب اول رغبة صيدلة

هو محدش اجبرني ساعتها اني اكتب صيدلة بس هما اقنعوني وقتها ان هيه افضل كلية للبنات ...

كلية عملية زي ما كان نفسي ومش نظرية (لو افتكر بس مين اللي ضحك عليا وقالي انها عملية....ربنا يسامحه -(وش متنرفز ولو شاف حد ادامه حيقتله ))المهم اني ساعتها اقتنعت وكتبت صيدلة اول رغبة

(وش بيعيط جامد اوي خالص جدا)

طبعا انا رغاية كالعادة(وش بيبص ببراءة) والسؤال يكون صغير واجابته المفروض صغيرة بس انا لازم ارغي كتير(نفس الوش اللي بيبتسم ببراءة ) واطلع اللي جوايا ..امال اكتم في نفساونيتي واتعب (وش ماسك مسدسات وحيضرب في المليان اي حد يقول اكتمي واحنا مالنا )...

لا طبعا حاتكلم وارغي براحتي ..مش مدونتي ...(وش رخم بينظر نظرة استهبال وبيبتسم ابتسامة لزجة)...

حد عنده اعترااااااض

(وش بينظر باذبهلال)

اوعوا يكون حد عنده اعترااااااااااااااض؟؟؟

ايوة كده

فكرت

كان لازم ازعق يعني

امرر التاج لمين امرر التاج لمين
مفيش حد حاضر في ذهني حاليا
لما افتكر حابقي اكتب وابعتلهم

ـــــــــــــــــــــــــــــــــــــــــــــــــــــــــــــــــــــــــــ

فاصل قصير ثم نواصل

ـــــــــــــــــــــــــــــــــــــــــــــــــــــــــــــــــــــــــــــ

عدنا

الصورتين دول عجبوني اوي قلت انزلهم للكم

صورة الدفعة...عندما تمنيت ان يتوقف بي الزمان

زحمة ودوشة ..

وناس عمالة تغني

صورة صورة صورة ..كلنا كده عايزين صورة

طبعا بتسالوا ايه الزحمة دي وايه هيه الصورة ومين هما الناس

الزحمة دي هيه دفعة صيدلة اسكندرية 2007

والصورة دي كانت صورة الدفعة بتاعتنا في استاد الجامعة

والناس هما كل طلبة الدفعة بتاعتي قاعدة عالمدرجات

وكلنا في انتظار الصورة اللي حتتاخد لكل الدفعة

المصور يشاور بايده من بعيد

1



2

3

الكل ثابت في مكانه

..وللحظة تتوقف الحركة في المكان

تمنيت وقتها لو كان ينفع الزمن هو كمان يتوقف بيا

هل خلاص خمس سنين جامعه عدوا وانتهوا

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

؟؟؟؟؟؟؟؟؟؟؟؟؟؟؟؟؟؟؟؟؟؟؟

خمس سنين

من احلي ايام حياتي مروا خلاص

خمس سنين

سكاشن ...و محاضرات

معامل... ومركبات

خمس سنين

شنطة ادوات..وسلم طالعين ونازلين فيه ..بنجر فيه نفسنا بالعافية ومعانا الادوات

درج الكلية المزحوم والقفل اللي لازم يتغيركل سنة ..والمفتاح اللي نسيته وادواتي جوه الدرج

خمس سنين

محاضرات فاضية مافيهاش غير بنشين.... ومحاضرات تانية الطلبة واقفين وقاعدين عالسلالم من كتر الزحمة

السكاشن والزحمة علي مركبات المعمل..وعلي الاجهزة والميكروسكوبات

خمس سنين

كتب عملي لازم نشتريها... وورق محاضرات نجيبه من المكتبة اللي جمب الكلية

ومراجع نصورها من مكتبة الكلية

خمس سنين

ابحاث نعملها ونسهر عالنت بالساعات نظبطلها الورد والباور بوينت

خمس سنين

سهر مذاكرة ونوم عالورق ايام الامتحانات من كتر الزنقة
زحمة امتحانات الشفوي..واللخبطة ادام الدكتور اللي بيعصر الطلبة اسئلة في الشفوي

خمس سنين

نشاط اجتماعي وزيارات وملتقي علمي ومحاضرات تنمية بشرية

ومسابقات رسم وخط

خمس سنين

دروس ايمانية وانشطة دعوية

خمس سنين

وجوه اتعودت اشوفها كل يوم

بعد السنة دي مش حاشوفها تاني

خمس سنين

من احلي ايام حياتي

بادعي ربنا ميكونوش ضاعوا عالفاضي واني اكون استغليتهم احسن استغلال

خمس سنين

ايام متتنسيش

ايام كانت كل لحظة سايبة جوايا ذكري متتنسيش

ايام كانت....

معلش مضطرة انهي البوست ده علي كده

عشان خلاص بجد حاعيط

حابقي اكملكم في بوست تاني

سلام مؤقت

ملحوظة صغنتوتة علي جنب
الصورة دي واحدة من الصور اللي انا صورتها للدفعة في اليوم ده
انا حاولت اختار اقل صورة واضح فيها اشخاص فمعلش حتلاقوها مش واضحة
طبعا مفهوم ان دول مش نص الدفعة حتي..لان احنا عددنا 1400 تقريبا ...بس الصورة دي انا اخدتها في الاول قبل ما كل الناس تقعد

انا اخوااااااااااااااان

بعد اعتقال عبد المنعم

معنديش كلام اقوله غير

انا اخوااااااااااااااااااااااااااااااااااااااااان

التاج علينا حق

التاااااااج وصل يا جدعااااااااااااان

قبل اي كلام وقبل ما ارد علي التاج وهو تاج بالمناسبة خفيف (اه خفيف عالمعدة وخالي من الكوليسترول )..اصله سؤال واحد وبس وان كان سؤال مهم بالنسبة لكل واحد فينا
اولا باعتذر عن التاخير في الرد
امتحانات ميد ترم بقي والذي منه
مع تحابيش ملهاش علاقة بالدراسة حصلتلي خلت الواحد ملهوش نفس يكتب او ينزل موضوعات عالمدونة
بس الحمد لله نقدر نقول ان الواحد خرج من حالة الاكتئاب اللي كان حيروحلها وفي فترة النقاهة حاليا



قبل ما انسي برضة
نفسي اشكر كووووووووووووول الناس اللي عدت عالبوست اللي فات وسابت دعاء او نصيحة او كلمة حلوة
بجد ليكم كلكم ...جزاكم الله عني خير الجزااااااااء

نيجي للمفيد بقي
التااااااااااااااااج
التاج ده جالي من ابن اخ

وهو بيقول
تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارسته


ممممممممممممممممممممم
هواية بامارسها باستغرق فيها وانفصل عن عالم الواقع
هوه انا عموما لما باندمج في حاجة باستغرق فيها اوي لدرجة الانفصال عن عالم الواقع
بس بما انكم كنتوا محددين وقلتوا الهوايات يبقي نتكلم عن الهوايات

اول هواية بانسي معاها الدنيا وبانفصل عن عالم الواقع

هيه الخط العربي والرسم
انا باحب الخط العربي جدا (بيقولوا اني باعرف اكتب بكذا نوع خط عربي ) وباحب الرسم اوي ...ولما اكون باعمل لوحة بانسي نفسي فعلا ..ممكن اي حد يكلمني ما اسمعهوش ومردش عليه بابقي مركزة اوي ومنهمكة اوي لدرجة الانفصال فعلا عن عالم الواقع

الهواية التانية
القراية
مش كل انواع الكتب باحب اقراها طبعا
باحب اقرا في السياسة ..البيت كله عندنا بيحب السياسة ويمكن ده اثر كتير عليا وخلاني احب السياسة
باحب اقرا في الادب الانساني وخصوصا كتابات عبد الوهاب مطاوع
باحب اقرا الكتب الدينية وخاصة الرقائق
باحب اقرا الشعر جدا جدا جداااااااااااااا وخاصة شعر احمد مطر وفاروق جويدة
ومؤخرا باقرا في التنمية البشرية مجال جديد يمكن لكن عاجبني اوي اوي وبيستهويني جدا


مممممممممممممم

سامعاك ياللي بتسال ازاي بتحبي تقري سياسة ومعاها ادب انساني ورقائق وشعر..متركبش!!!
معرفش بقي
انا باحب ده وده
هوه كده
بخلاف السياسة وانها بتخليني اصطدم بالواقع المؤلم..الادب الانساني والشعر والرقائق بحس انهم بياخدوني لعالم تاني ...عالم موازي باستغرق فيه ومش باحس بنفسي

نيجي بقي للهواية التالتة
وهيه الكمبيوتر و النت
دنيا تانية وعالم تاني
مش باحس بنفسي وانا باتجول في العالم الافتراضي
بانسي نفسي واللي حواليا وانا باتنقل بين صفحاته
وكل مرة اقعد عالنت احدد لنفسي عدد ساعات معين وحاجات معينة اعملها عشان الوقت ميسرقنيش ...لكن في كل مرة باستغرق في اللف علي المواقع و بالاقي نفسي ومن غير ما احس الوقت بياخدني


متهيالي كفاية عليكم كده
زمانكم بتقولوا عليا رغاية
كووول دي اجابات سؤال واحد
امال لو كانوا عشرين سؤال