ثقافة الخوف

يتردد بداخلي السؤال

تري هل نجحوا في ان يزرعوا في قلوب هذا الشعب ثقافة الخوف؟؟؟؟؟

.

جالسة ومعي الكثيرين مع والدة واخت احد المعتقلين الشباب.. جئنا لنساندهم ونقف بجانبهم ..ولــبث بعضا من ثبات ربما تفقدانه في هذه الظروف

كان معظم الجالسين من جيرانها ..لم يحدث ان تصادف ان اجتمعت في يوم مع مثل هذا الجمع من الناس التي لا تحمل اي انتماءات او قناعات او افكار مسبقة واثير معهم مثل هذا الموضوع (الاحوال السياسية والاعتقالات التي تحدث للاخوان)

.

صدمني كلامهم ..تتحدث الاولي وتقول : وليه البهدلة دي ..انا خايفة علي عيالي ...يصلي ويصوم ويتدين بس في البيت.. ليه بس يروح لسكة المساجد والاخوان والمشاكل..خلينا ماشيين جمب الحيط احسن

اتعجب من كلامها ففعليا قارب معظم شعبنا علي الخروج من الجانب الاخر للحيط بعد ان كان يمشي جنب الحيط ثم تطور الحال ليدخل بعدها جوه الحيط حتي انه قارب علي الخروج من الجانب الاخر

....

تتحدث الجارة الثانية وتحكي عن لحظات القبض علي الاخ الشاب جارهم ,كيف مرت عليها في شقتها,وكيف ظلت في حجرتها وبجانبها ابنتها تترتجفان وتبكيان من الخوف ...خوفا من ان تمر قوات الامن عليهم فتاخد ابنهم ايضا

تشارك الاخري في الكلام ووسط كلامها تعتذر عن غياب زوجها عن مثل هذه اللحظات دون ان يحاول الوقوف بجانبهم ولو بالمواساة والتثبيت ويحمر وجهها وهي تقول عن زوجها : معلش اصله بيخاف شوية

تتردد في خلفية ردهات عقلي اغنية ايمان البحر درويش عن زوار الفجر
يا بلدنا يا بلد

هو من امتي الولد

بيخاف من امه

لما في الضلمة تضمه

...صدقيني

خفت منك

خفت منك

...صدقيني

...
لكن ما قالوه لم يكن خوفا فحسب من هؤلاء الزوار..لهجتهم وطريقة حوارهم تصنع صورة من الخوف الذي تحول الي رهاب يصل الي حد الرعب

اذهلني حديثهم فلم اكن اتصور ان الامربهذه الصورة..هل اصبحت ثقافة الخوف جزءا من هذا الشعب ..هل نجحت الحكومة في تكريس ثقافة الخوف في نفوس الناس الي هذه الدرجة

...

ثم تذكرت امرا.. ثقافة الخوف لا تنشا كنتاج لسلطة غاشمة مستبدة فحسب ..بل هي ايضا نتاج موروث ثقافي وتربوي نصنعه بانفسنا وبابنائنا....هذه الثقافة لم تزرع جذورها الحكومة وحدها

بل ساهم في زراعه الجذور وانباتها كل واحد من افراد الشعب في نفسه

.

زرع الخوف حين ربي ابنه منذ الطفولة علي الخوف من العفريت
ثم يكبر الطفل ليخاف من الظلام

يدخل المدرسة...انا خايف معملش الواجب الاستاذ يضربني

في الثانوية العامة ..خايف مجبش مجموع

في الجامعة ...خايف الدكتور يستقصدني ...خايف امشي في المظاهرة بعدين اتمسك...خايف اتخرج وملقيش شغل

في العمل .خايف لو عملت مشكلة مع المدير يطردني

الموظف ..خايف لو اعترضت علي حاجة الهيئة تنقلني

ثم ننتهي بموروث من الامثال يبدا بقواعد وضعها خائف كبييييييرتبدا ب..من خاف سلم

ثم مرورا بالخوف من اي تغيير ....اللي تعرفه احسن من اللي متعرفهوش ..ولا ادري من اين استمد مؤلف المثل هذه الفرضية ..... مش جايز اللي منعرفهوش يكون احسن

هي منظومة من الخوف تبدا منذ الصغر وتستمر في تزايد مستمر مع الكبر

وربما نجحت الحكومة في ان تحسن استغلال هذه الثقافة ..لكنني اثق يقينا انها لم تكن هي من زرع جذورها فينا

لذا كان لابد لنا من ان ننزع هذه الجذور من داخلنا

.

ان نعلن مقاومة اي مظهر من مظاهر الخضوع اوالخوف ان نربي الاطفال ليكونوا جيلا حرا خلاقا مقداما

لا يخاف في الله لومة لائم

ان نعلمه ان افضل الشهادة ربما لا تكون علي باب القدس بل ربما في مظاهرة تنادي بالحريات فالرسول - ص - يقول قال عليه الصلاة والسلام: أفضل الشهداء حمزة، ورجل قام إلى سلطان جائر فأمره ونهاه فقتله

.

ان نربي ابنائنا علي شجاعة وقوة كلمة الحق

وان نوقن بعدها

اننا اذا حطمنا قيود الخوف في الصغر... سوف تختفي من مجتمعاتنا في الكبر

ليه لأ؟

ممكن؟؟؟؟؟؟؟

اه ممـــكن

لـيــــــــــه؟؟؟؟؟

ليـــه لأ

التاج علينا حق....كلاكيت تالت مرة

اخييييييييييييييييييييييييييييييرا وبعد غياب عن عالم التدوين لظروف خارجة عن ارادتي رجعت النهاردة

اكتشفت انه تقريبا والله اعلم فاتني كتيييييييير ...هاحاول بقدر الامكان الحق اتابع واقرا اللي فاتني عند باقي المدونين
بالنسبة للبوست ده اخيييييييييييييييرا قررنا نحن المقررون ...اني ارد علي التاج اللي قرب يخلل عندي

تاج بعتهولي ...امام الجيل - مدونة امام الجيل

علاء - مدونة مش انا

اروي الطويل - مدونة انا كده

ابو زياد الفاتح - الفجر الباسم قادم

جزاهم الله خيرا

نبدا بالرد علي اسئلة التاج

أنت مين؟

ممممممممممم

هو انا مقتنعة انه من السهل اني اتكلم عن الاخرين ومن الصعب اوي خالص جدااااااااااا اني اتكلم عن نفسي

وباعتبر السؤال ده هو اصعب سؤال في اي انترفيو باعملها عشان الشغل

انا ميييييييييييين؟؟؟

انا مروة .....كنت لغاية شهر ستة اللي فات طالبة في سنة رابعة في صيدلة اسكندرية وحاليا في انتظار النتيجة ان شاء الله خلال اليومين الجايين - عايزة دعوة جامده اوي خالص جدا ...ويا سلا م لو تكون دعوة في سجود في ركعتين قيام ...حقيقي تبقي حاجة محصلتش ..يبقي جزاكم الله خيرا ونجيلكم في الافراح ان شاء الله...بس هيه النتيجة تطلع والواحد يتخرج ويبقي صيدلي زي ما كنت باحلم ( متصدقوش ما انتوا عارفين اللي فيها ) وبعدها نبقي نجيلكم في الافراح...طبعا عشان ناكل جاتوه ونشرب شويبس ...

اكمل بقي...انا ميييييييين؟؟؟

انا بنت مصرية عادية جدا ...زي الاف البنات في مصر...زيك لو كنتي بنت ...وزي اختك او قريبتك او جارتك او زميلتك لو كنت ولد

بنت عادية جدا ...باحمل ملامح تشبههم ...عشت طفولة وشباب بتملاها ذكريات زي ذكرياتهم...جوايا نفس احلامهم.........مش باقولكم بنت عادية جدا

يمكن بس اختلف في اني باحمل رساله ومؤمنة بفكرة ...بمعني تاني اني ببساطة من الاخوان ...من ايام ما كنت في الزهرات لغاية ما بقيت من الاخوات ...ربنا يرزقنا الثبات

باحب الرسم والخط العربي والقراية والسياسة والنت

لو السؤال بيتضمن الصفات كمان .. بيقولوا عليا طيبة...وصديقة ييجي منها....بيقولوا عليا اني عاقلة ( هما اللي بيقولوا انا مليش دعوة متصدقوهمش ...قال عاقلة قال...دي بقت تهمة في الزمن ده)...الصفة الاخيرة اللي بيقولوها عليا اني متفائلة اوووي - والغريب انهم حاطين الصفة الاخيرة دي ضمن عيوبي

ــــــــــــــــــــــــــــــــــــــــــ

مين اكتر ست شخصيات بتحبهم؟

لالالالالالالالا

ستة بس

مينفعش طبعا

طب واودي بقية اسماء اللي باحبهم فين؟؟؟؟

وبعدين انتوا عايزيني اتضرب لما ناس تدخل تقرا ومتلاقيش اسمها...لا يا جماعة العمر مش بعزقة ...الطيب احسن ...انا مش هاقول اسماء شخصيات عايشتها

لكن هاقول اسماء شخصيات عامة باحبها وباعتبرها قدوة ليا

الدكتورعبد العزيز الرنتيسي

الحاج عباس السيسي

الاستاذ ضياء رشوان

دكتورعصام العريان

دكتور مجدي الهلالي

ــــــــــــــــــــــــــــــــــــــــــ

أنت سعيد؟

لا انا مروة

هههههههه

ممممممم

سعيدة بمعني الفرحة معتقدش

لكن نقدر نقول جوايا رضا بيخليني دايما ومهما كانت الظروف الحمد لله سعيدة

دايما من ادعيتي الثابتة ان ربنا يرزقني رضا لا ينتهي

ــــــــــــــــــــــــــــــــــــــــــ

لو أجتمعت أنت وحسنى مبارك فى غرفة واحدة هتقوله ايه؟

هاقوله الاية (انك ميت وانهم ميتون)....ومش بعيد اوريهاله عملي عشان يصدق

ــــــــــــــــــــــــــــــــــــــــــ

لو معاك مليون ونص هتعمل بيهم ايه؟

اشمعني يعني مليون ونص

طب ليه مش اتنين مليون

وللا حتي مليون واحد ..معلش اصلي مش باحب الكسور

عموما لو معايا مليون ونص متهيالي اول حاجة هاعملها اني هأدي جزء لعيلتي ( الاقربون اولي بالمعروف )

الجزء التاني هاعمل بيه مشروع خاص بيا ...مؤسسة تهتم بالجانب التربوي والابداعي عند الاطفال...يتم فيها تطبيق برامج لاكتشاف مواهب وميول الاطفال وتنميتها وتطويرها ..ثم توجهيها لتتناسب مع متطلبات سوق االعمل في الستقبل

من الاخر ...مؤسسة تعني ببناء الانسان

الجزء التالت هانشئ مؤسسة خيرية رسالتها المساهمة في حل مشكلة البطالة ...مؤسسة توفر للشباب قروض لبدء مشروعات صغيرة ...وتوفر لهم دعم فني وتقني وعلمي يمكن الرجوع له لمساعدتهم في مشروعاتهم

الجزء الرابع هاتبرع بيه للعمل الدعوي عموما وللاخوان خاصة

الجزء الخامس هاتبرع بيه لفلسطين

مممممممممم هو كده زمان المليون ونص خلصوا من زمان بس اكيد قبل ما يخلصوا هابقي اشيل منهم كام مية اروش نفسي بيهم ...ان الله يحب ان يري اثر نعمته علي عبده

ــــــــــــــــــــــــــــــــــــــــــ

بتحب مصر؟

مش بس باحبها ..ده انا دايبة في حبها ...ولما كنت باسال نفسي ليه باحبها ...كنت بالاقي مليون اجابة واجابة

باعشق اهلها ..باحب شوارعها...باحب فيها تمشية علي الكورنيش بالليل....وللا رملة الشط ومية البحر...قعدة العصاري مع ماما وبابا واخواتي ...لمة رمضان وفطار رمضان والعيلة كلها متجمعة ....ليلة العيد وزحمة ليلة العيد ...نزولة محطة الرمل...فول وفلافل محمد احمد ....اوساندويتشات مؤمن ...صاحباتي في الجامعة احلي صداقة واجمل صحوبية...مدرستي القديمة ومدرساتي فيها....شغلي مع الاخوات

باحب فيها حاجات كتير ومهماحصل ليا فيها ومنها مش هاكرهها ابدا

ايوة فيها سلبيات كتييييييير ...

وفي اوضاع تضايق كتييييييييير

واحيان كتير بابقي خايفة انها متكونش بتحبني زي ما باحبها

لكن بتفضل الحاجات الكتير اللي باحبها....بتخليني اصبر واصبر واصبر لغايى ما ييجي اليوم اللي نشوف مصر فيها افضل ما يكوووووون
ــــــــــــــــــــــــــــــــــــــــــ

بتحب البنات؟

اينعم ...اكيييييييد

يستاهلوا يتحبوا طبعا

ده حتي دمهم خفيف وخفاف علي المعدة ...اصدي عالقلب

بالذات الصغيرين منهم حاجة كده زي العثثثثثثثثثثثثل

ــــــــــــــــــــــــــــــــــــــــــ

أنت مسلم؟

ياربي لك الحمد كما ينبغي لجلال وجهك وعظيم سلطانك

مش عارفة ليه اول ما قريت السؤال ده افتكرت حديث حارثة

لما الرسول -ص- ساله كيف أصبحت يا حارثة؟

ورد حارثة اصبحت مؤمنا حقا فساله النبي -ص- انظرما تقول فإن لكل قول حقيقة فما حقيقة إيمانك؟

تخيلتني باجاوب بالايجاب علي السؤال بتاع التاج نعم انا مسلمة ...فيكون السؤال التالي لي فما حقيقة اسلامك

بادعي دايما ربنا اني اكون مسلمة حقا ومستسلمة فعلا لاوامره ونواهييه

نسال الله الثبات

ــــــــــــــــــــــــــــــــــــــــــ

ليه؟

للمرة التانية بالاقيني باكرر الدعاء

ياربي لك الحمد كما ينبغي لجلال وجهك وعظيم سلطانك

من رحمته بيا وحبه ليا اني ولدت مسلمة ...ونشئت مسلمة ...بينما في نفس الوقت بيعيش غيري يبحث عن الدين ويصعب عليه ان يجده

ــــــــــــــــــــــــــــــــــــــــــ

أيه اكتر موقف محرج أتعرضت ليه؟

احم احم احم

صباح الاحرااااااااااااااااااااااااج ...ليه بس السيرة دي

اكتر موقف محرج بالنسبة لي كان موقف حصلي في سكشن الهيستولوجي وانا في سنة اولي كنا مجموعة كبيرة من السكشن واقفين عاملين زحمة عالميكروسكوب وكل واحد بالدور بيبص علي العينة ويكتب ملاحظات وبعدها ينطلق للعينة اللي وراها

المهم ان واحنا واقفين واحدة زميلتي في السكشن طولت اوي عالميكروسكوب ...واحنا واقفين مستنيين وراها عمالين نقول دلوقتي هتخلص ...لما لقيناها طولت كنت انا واقفة وراها قعدت اهزر معاها واستعجلها وبهزار كنت باقولها انها طولت والسكشن كده هيخلص ...عادي يعني ...البنت تقريبا كانت واخدة الموضوع جد اوي ..لقيتها بتلف لي وبتزعقلي جامد خالص جدااااااااا ادام كل اللي واقفين من السكشن وللعلم سكشني اصلا معظمه ولاد يعني الاحراج مضاعف ...طبعا انا مكنتش متوقعة و اتخضيت بجد من رد فعلها...لاني حتي هزاري مكنش اوفر مثلا عشان نقول ممكن تكون اتضايقت من كلامي....علي العكس كلامي كان في حدود المعقول والمتقبل

ــــــــــــــــــــــــــــــــــــــــــ

اتصرفت ازاى؟

اخدت جرعة الاحراج دي ومردتش ورحت للناحية التانية من السكشن اتفرج علي باقي الميكروسكوبات - قال يعني العلم واخد حده -...مش عايزة اقولكم اني طبعا مكنتش مركزة في اي حاجة والسكشن ده مر عليا كانه لم يكن ولا كاني شفت اي ميكروسكوبات فيه وبمجرد ما السكشن خلص اخدتها بالخطوة السريعه علي باب الكلية عشان اروح ...رغم اني عمري ما كنت من الناس اللي بتخلص المحاضرات او السكاشن وتجري تروّح...ورغم اني عادة السكة عندي من المبني لباب الكلية بتاخد ساعات عقبال ما اسلم علي البنات اللي اعرفهم وباقابلهم في السكة ...متهيالي ده اليوم الوحيد ليا في الكلية اللي السكة دي اخدت مني ثانيتين ...وبمجرد ما خرجت من باب الكلية معرفتش امسك نفسي ورحت معيطة ...اصلها زعقتلي جامد اوي وانا مكنتش عملت حاجة اصلا عشان تزعقلي ... غير ان معملتش اي رد فعل وكتكمت ده خلاني من غير ما احس بمجرد ما خرجت من باب الكلية فقدت السيطرة علي نفسي وقعدت اعيط - كل ما اتخيل منظري ساعتها وانا ماشية في الشارع باعيط ..ياااااااااه ...بلاش اعلق علي منظري احسن -

نسيت اقول ان البنت دي بقت صاحبتي اوووي بعد كده...وباحبها وبتحبني جداااا

ــــــــــــــــــــــــــــــــــــــــــ

أيه الامنية اللى بتدعى ربنا انه يحققها ليك؟

ان ربنا يرزقني حسن الخاتمة

وانه يستعملني ولا يستبدلني
وانه يرضي عني ويرضيني ويراضيني
وان ربنا يرزقني حبه وحب من يحبه وحب عمل يقربني الي حبه

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

خلص التااااااااااااج ..اخيييييييييييييييييرا

طبعا مش لاقية حد موصلهوش التاج ده ..عشان كده مش عارفة امرره لحد

وبناءا عليه التاج ده هدية للي يحب يجاوب عليه

اتفضلوا بالهنا والشفى

ايام متتنسيش

راجعة من حفل استقبال نقابة االصيادلة لدفعة 2007 عمالة بافكر في ايام مرت وايام جاية

مرت ايام الجامعة خلاص ..وتحولت الي صفحات تضاف لدفتر الذكريات

ايام فيها خليط غريب مختلف من الذكريات ....لكن الشئ المشترك بينها انها كلها

ايام متتنسيش

اينعم كل عمر وله جماله ..

لكن بتفضل سنين الجامعة ليها طعم تاني مختلف

ليها طعم الانطلاق........ طعم البراءة..... طعم احلامنا اللي لسه بتحبي ومستنية لما تكبر وتقدر تمشي..

طعم الامل في بكرة يكون اجمل واروع واحلى من النهاردة

طعم مش ممكن يتنسي

حقيقي ايام متتنسيش

بحلوها ومرها...

بحزنها وفرحها ...

بضحكها وبكاها...

بكل ما فيها ..

مش بس ايامها ولا ساعتها ..لأ كمان بلحظاتها

لما باحاول افتكرها بالاقي نفسي بافتكر لحظات كان الضحك فيها هو اللي غالب ...

صحيح مش كل اللحظات دي فاكرينها وساعات بتفلت من ايدينا لكن بنحاول نحتفظ بيها جوانا لأكبر وقت ممكن

او بافتكر لحظات اكتئاب وللاخنقة من المذاكرة لكن بتفضل ذكريات الكتب والملازم والمحاضرات أول حاجة تشتاقلها بعد التخرج

او لحظات مذاكرة بالليل لوحدي مفيش معايا غير أكوام ورق وكبايات الشاي والقهوة من غير ما احس ان اخر الليل وصل غير في اليوم التاني لما ألاقي نفسي نعسانة في المحاضرة

ومش هانسى لحظات الجوع القاتل اللي استنينا عشانها المحاضرة الخامسة علي التوالي امتي تخلص

(قبل ما احنا نفسنا ما نخلص (بفتح الام

ده غير لحظات القلق والتوتر وأنا مستنية ورقة الامتحان توصل ولساني بيدعي ان كل اللي حاسه أنه اتمسح من ذهني يبقي لسه موجود

وللا رحلة مع صحابي نمت أحلم بيها او بمعني اصح معرفتش أنام من كتر ما بفكر فيها

ولحظات كنت بادعي انا وصحابي ان ميكونش في مكان في الكليه الا ويشهدلنا......

ايام كنت خايفه أحسن تعدي من بين ايديه من غير فايده لانها فعلا تستحق اني استفيد منها واحتفظ منها باجمل الذكريات واروع القيم

من الاخر كده أيام كنت باحس فيها اني ماسكة الدنيا كلها في ايدية

مفيش مكان للهم والخوف ..ومنعرفش كلمة مستحيل

بافتكر اخر يوم في الكلية وانا باودعها....

وانا بامشي في ساحاتها..

وباطلع سلالمها..

وادخل المدرجات والمعامل..

ابص لوشوش الناس ..وللاماكن اللي جمعت الوشوش دي مع بعضها لمده كام سنه متتاليه

واقعد افكر اني بعد ما اتعودت اشوف نفس المناظر وامشي في نفس الاماكن واقابل نفس الاشخاص.........مع التخرج كل ده بيتغير

...نستقبل دنيا جديدة

....غريبة

...مجهولة تفاصيلها بالنسبة لنا

جايز جوانا خوف وقلق ...لكن برضه بيملأنا الامل والتفاؤل ان بكرة ان شاء الله جايلنا بايام حتكون في جمال وروعة الايام اللي سبقته

ونيجي بعد 20 سنة نقول علي الايام دي برضة

كانت ايام متتنسيش

لتحميل الاغنية افعص هنا بس بشويش

ـــــــــــــــــــــــــــــــــــــــــــــــــ

اعلان هاااااااااااااااااااااااااااام

اخييييييييييرا دخلت عالم التدوين

صديقة الطفولة والشباب ( والشيخوخة ان شاء الله كمان...قولوا يارب ) ...شيماء

شيماء ..حقيقي مدونتك عاجباني...موضوعاتها الاولي بتقول انها ان شاء الله هتكون مدونة متميزة

زوروا مدونتها (شقاوة شعب ) وقولوا رايكم

ـــــــــــــــــــــــــــــــــــــــــــ

ملحوظة صغيرة ...في تاج اتبعتلي من فترة تقريبا من اربع مدونات..اعتذرلهم عن التاخير في الرد ان شاء الله البوست الجاي ارد عليه

في موال مين؟

بخاف من ضلمتي وحدي

و انوّرضلمة الخايفين

وأكتب شعر عن نفسي

فيطلع كله للتانيين

ياناس ساكنة في موّالي

أنا ساكن فـ موّال مين

ان تعتاد ويعتادوا منك ان تكون مستمعا لهم

وتنسي وينسوا ان يسمعوك

الي

(م.م) و (أ.ف)

منذ زمن لم القاكم

اشتاق اليكم كثيرا

واحتاجكم اكثر من اي وقت مضي

الابيات للشاعر محمود عزت

من وحي مؤتمر المدونين

تابعت تغطيات المدونين لمؤتمر المدونين تمنيت لو كتب احدهم عن اهم شئ في المؤتمر من وجهة نظري

عن المعني الذي استفدته ربما اكثر من اي شئ اخر في المؤتمر بخلاف التعرف علي اصحاب المدونات

(علي اعتبار ان (معظم المدونات من البنات اللاتي تعرفت عليهن كن حديثات التدوين ولم اكن اعرف مدوناتهم

عن هذين النموذجين اتحدث

عن تلك الجلسة التي جمعت المدونين حديثي التدوين باثنين من قدامي المدونين

(عبد المنعم محمود ( الاخواني )...علاء سيف ( الليبرالي

عن التقاءهم مع شباب المدونين وتواصلهم معهم...مع تنحية اي اختلافات في الايدولوجيات والقناعات

ان نلتقي علي الشئ المشترك بيننا.....اننا كلنا مصريين ...مدونيين ...يجمعنا حلم الحرية لهذا الوطن

ان نقتنع ان اختلافنا اختلاف تنوع لا اختلاف تضاد

كلنا لنا نفس الهدف..... ان نري مصر افضل واعلي واجمل ....ربما تختلف الطرق التي اخترناها للوصول لهذا الهدف ....لكن يظل لنا نفس الهدف ...ان تتخلص البلد من الفساد والديكتاتورية ينعم بديموقراطية حقيقية

منذ فترة حضرت ندوة لدكتور عصام العريان ركز علي هذه النقطة بالتحديد

الانفتاح علي الاخر...اننا لسنا الوحيدون علي الساحة ...هناك اخرين يحبون بلدنا كما نحب بل واكثر ....هم يعشقون ترابها....يعملون من اجلها ليل نهار

ربما اخترنا طرقا مختلفة لكن يظل الهدف واحد يستحق ان نتعاون من اجل الوصول اليه

اتمني لو نري جميعا الامر من هذا المنظور....

وعندما اذهب لصديقتي الاخوانية لادعوها لحضور نشاط لاحدي الاسر في اتحاد الكلية اتمني ألا اراها تنظر لي بدهشة

واستنكار وتسالني :انتي بتعمليلهم دعاية !!!؟؟

ايوة باعملهم دعاية ....ما الذي يمنع اني اعمل لهم دعاية واشارك في انشطتهم

اتمني الا اري تعليقات مدونين الاخوان تقتصر علي مدونات الاخوان ...ويتحول الامر الي اننا ببساطة - بنتكلم ونرد علي بعض- اتمني ان اري تعليقاتهم عند المدونين من غير الاخوان

ان ينتشروا

يتبادلوا الافكار

يندمجوا بالاخرين

ان يفيدوا ويستفيدوا من الجميع ايا كانت تيارتهم او اتجاهاتهم
ببساطة ....ان يوصلوا الرساله التي من اجلها اخترت التدوين واختاره غيري من الاخوان
ان نقول لغير الاخوان اننا
ربما نختلف في الاتجاهات ..في القناعات ....لكن يظل المشترك بينا اكثر بكثييييييييييييير

انسانيتنا...وانتمائنا الأكبر لوطننا وامتنا
ـــــــــــــــــــــــ

علي هامش السفرية

منك لله يا عيلة فضحتيني انتي وصفاء ...انتي علي مدونتك وهيه عالمنتدي

مكنتش واحدة كانز معزومة عليها

بجد كان يوم زي العثل

ـــــــــــــ
الي ثنائي عشرينات الرائع

مني سليم ومروة صلاح

بجد بجد

شكرااااااااااااااااااااا

علي العزومة والاكلة والقعدة والتمشية والرغي والهزار

علي كل حاجة

شكرررررررررررا

حقيقي اليوم كان رائع

كنت محتاجاله فعلا

تري هل يؤلم الرصاص؟

هل يؤلم الرصاص؟

لا اذكر متي واين قرات هذا السؤال او سمعته

لكنني حقيقة ظللت اسيرة له لفترة طويلة

لا اعلم له اجابة فبالطبع لم اجربه يوما ولا اعرف احدا قد جربه

قد اشاهدهم علي التلفاز يطلقونه

او اشاهد بعضهم يصاب به

اشاهدهم يقعون ...يتالمون ..يصرخون ...يبكون

احزن لهم ....اتالم لما اصابهم...قد ابكي لحاله

لكن يظل المي ليس كألمهم.. ويظل حزني ليس كحزنهم

هم يقفون في مواجهة المدفع وامام البنادق و الرشاشات

يواجهون الموت في كل لحظة

يقدمون الشهداء ليل نهار

وبينما نحن نراقب من بعيد ...نجلس في مقاعد المتفرجين امام الشاشات

ربما نقدم ما يخدم القضية

لكننا نظل - مهما فعلنا - دائما نجهل اجابة السؤال

تري هل يؤلم الرصاص

؟؟؟؟؟؟؟

اما هم

هم من يدركون حقا ماهية السؤال ؟

ويعرفون فعلا ما الاجابة

هم رمز الصمود والصبر رغم كل المحن والنكبات المتتالية والحصار والموت

صامد انت ايها الشعب المناضل رغم الحصار والقتل

صابر انت علي كل الابتلاءات و المحن

كنت دائما اقوي من كل المحن واشد من كل الصعاب

واليوم تقابلك محنة جديدة لم تكن تتوقعها او تنتظرها

اعلم انها اصعب المحن فاليوم هي بين ابناءك بسبب خيانة بعضهم

لكن اثق انك ستتخطي هذه المحنة وتخرج اقوي بكثير كما كنت تفعل دئما

محنة ووضع متوتر ندعو الله الا يستمر طويلا

وما بين وضع قائم وخطوات نرتقبها من كل الاطراف غير اننا لا يمكننا باي حال من الاحوال التنبؤ بأي منها

يظل الصراع القائم بين الاطراف المختلفة لا ندري ايهم سيفوز وايهم سيخسر

لكن ما اعلمه ويعلمه الجميع انه في حال عدم استجابة البعض لنداء العقل ...ولضرورة الحوار

وبالتالي عدم سرعة حل المشكلة القائمة

فان الخاسر الاكبر سيكون فلسطين وشعبها وقضيتها

ــــــــــــــــــــــــــــــــ

اضافة علي الموضوع

1-

اعجبني كثيرا تعليق الاخ إخوانى مخربش

صوت الخيانة

مؤلم

اكثر من الرصاص

2-

مقال فهمي هويدي- محاولة لفهم ما جرى في غزة

مقال مهم ...في محاولة لفهم الموقف ..اقروه

ـــــــــــــــــــــــــــــــــــــــــــ

في النهاية

كلمات ابكتني حين سمعتها

في وجه من ترفع سلاحك

يمكنك سماعها هنا اذا لم يعمل لينك الصوت علي المدونة

انا واخويا الكبير ...لقطات في شريط الذكريات

اتفقت معاك بعد ما قريت موضوعك الاخير وعجبني جدا ... اني حانزل لينك لموضوعك عالمدونة عندي في نهاية موضوعي الجاي
وكنت ناوية اعمل كده وكان في مواضيع جاهزة عندي عالدرافت كنت حانزل واحد وفي اخره اسيب اللينك
معرفش ايه اللي خلاني اغير رايي
لكن في نهاية الامر لقيتني بافتح صفحة جديدة وباكتب بوست جديد

انا واخويا ..خواطر وذكريات

ابدا بايه ؟؟ابدا بايه
ابدا بطفولة مشتركة كنا فيها في نفس المدرسة... وللا ابدا افكار واراء متقاربة ...وللا ابدا بانتماء واحد للاخوان ...وللا ابدا بحاجات اتعلمتها منك ..

اللقطات كتير في شريط الذكريات
اقولك الاسهل ابدا باللي افتكره

اللقطة الاولي في شريط الذكريات

طفولة قضيناها مع بعض في نفس المدرسة<<مدرسة المدينة المنورة >> تقريبا كنا واخدين فيها مؤبد

ابتدائي واعدادي وانت كملت ثانوي ...لكن انا للاسف طلعت في نص المدة لان مفيش ثانوي بنات
افتكرت الاذاعة اللي كنا مسيطرين عليها كل واحد فينا في فصله ولما كنا بنيجي نجرب مقدمة الاذاعة ادام بعض في البيت ...وحفلة اخر السنة اللي غالبا كنت اطلع انا فيها وانت لا ...معلش بقي مش اي حد ...الرك عالشخصية( بهزر (بهزر ..اوعي تضرب

افتكرت سيارة المدرسة واحنا مستنينها مع بعض ادام البيت...افتكرت لما في فترة لغينا الاشتراك وكنت باروح معاك لما كنت بتلطعني لحد ما تخلص الماتش مع صحابك ...يعني اتلطع انا في الشمس وانت تلعب

اقول ايه بس .....انه حقا مجتمع ذكوري متسلط)

استني لما اروح انادي بتوع حقوق المراة ...قلنا بهزر

(من غير ضرب

اللقطة الثانية

لما كنا في اعدادي وفي ثانوي وكنا نقعد نفكر يا تري عازين نطلع ايه لما نكبر دكاترة ومهندسين وكلام من ده

كانت دايما اجابتك هي الاغرب

كنت عايز تطلع زعيم

نقولك رئيس او وزير

ترد تقول لا زعيم

الزعماء بيعيشوا في وجدان الشعوب وياثروا فيهم لكن الرؤساء لا

اقول ايه بس...كنت فاهم سياسة من يومك

اللقطة التالتة

حلمك انك تدخل اعلام او اقتصاد وعلوم سياسية لانك بتحب القراية وبتعشق السياسة من وانت صغير

وانتهي الحلم بدراسة حاسبات ومعلومات

بس حلم الصحافة فضل جواك ...كتاباتك بتقول كده

لما باقرالك اي حاجة باقتنع بانك كان لازم تدرس صحافة

انا عارفة انك بتفكر تدرس اعلام بعد حاسبات

عايز نصيحتي

نفذ اللي بتفكر فيه وادرس اعلام ...انت بتحب المجال ده فعلا وانا واثقة انك حتنجح فيه

اللقطة الرابعة

لما اكون سهرانة باذاكر وتكون انت اخر واحد ينام في البيت واشوفك قبل ما تدخل تروح عند عمر واسامة وتغطيهم كويس وتطمن عليهم...المشهد ده لما اشوفه من ماما عادي لكن منك انت كنت باقف ادامه كتير

اللقطة الخامسة

لما كان حد فينا يكون تعبان تعب بسيط وتلاقيه عامل دوشة وهاتولي ادوية وودوني للدكتور كنت دايما تقول ليه بتعملوا دوشة ..ليه الشعب كله لازم يعرف ان عندك مغص بسيط وللا سنانك واجعك... وابسط حل عندك بتقدمه خد مسكن واسكت
في الاول كان بيضايقني اوي الموقف ده لغاية ما فهمت ازاي وليه
فهمت لما كنت باشوفك باين علي وشك وفي عينيك انك في مشكلة لكن محدش فينا يعرف بيها غير بعد ما تعدي
فهمت ازاي اقابل الناس بابتسامة مهما كان اللي جوايا من الم او مشكلة
فهمت ان الناس ملهاش ذنب في مشاكلنا والامنا
فهمت واتعلمت ده

اللقطة السادسة

بعد يوم سفر متعب للقاهرة
وانت راجع من عشرينات تقعد تحكيلنا يومك قضيته ازاي

اد ايه بتحب الموقع ده والمكان ده والفريق ده

مصعب وهواري ومني ومروة ودعاء

كل مرة بتحكيلنا عنهم كنت بتشوقنا اننا نقابلهم حقيقي نفسي اقابلهم خاصة مني ...
المرة الجاية لما تسافر ابقي خدني معاك
مستنياني هناك عزومة من مني وعزومة من مروة ..بلاش تضيع العزومتين عليا
انا عارفاك ممكن تطمع في السندويتشات واروح انا في الرجلين

اي حركة ندالة ممكن اتصل بمني تقابلني علي محطة القطر واسافر لوحدي ...العزومة تستاهل يابني

اللقطة السابعة

لما كنت بتكلمني علي ( ملكة اليمن السعيد ) وعينيك بتلمع وانت بتتكلم... تعرف يا محمد باقعد كتير افكر في المعضلة اللي انا وانت عارفينها

وكلام استاذ ( م. أ) لما انت حكتله الموضوع ..ان كتير من خيوط الحل في ايديا انا وسمية كلامك عن المستقبل وحلمك واللي نفسك فيه
وولادك اللي حتطلعهم عباقرة ولما كنت اقولك طب لو مطلعوش عباقرة ....
ازاي كنت بتضحك ساعتها وتقولي يبقي العيب منها ولادي انا لازم يكونوا عباقرة

علي فكرة يا محمد ومن غير ما تحس بنفسك ولا تتنفخ يعني ....كلامك عن طريقة التربية اللي حتمشيها مع ولادك لو نفذته اكيد حيكونوا عباقرة

اللقطة التامنة

خلافنا الدائم علي نزولي الكتير ...واعتراضك علي خروجي الكتير من لقاء.. لدورة.. لمؤتمر.. لندوة...وكلمتك المفضلة محدش في المستقبل حيرضي يا بنتي انك تسيبي بيتك وتنزلي بالطريقة دي

(شكرا علي جرعة الاحباط يا عم)

المشكلة اني عارفة انك عندك حق... تعرف يا محمد كتير بافكر في كلامك ده وياما وانا باكتب جدول لتنظيم الوقت كان كلامك بيرن في وداني وكنت باحاول اقلل عدد الساعات اللي انزل فيها علي اد ما اقدر...

لكن جايز علشان عارفة اني مش حاعرف اعمل كده في المستقبل باحاول استغل الفترة دي علي اد ما اقدر

اللقطة التاسعة

حوارنا ونقاشنا المستمر علي شغلنا مع الاخوان ...

(ولما نقعد نتفزلك ونقارن بين شغل الجامعة (اللي انا فيه ) وشغل المنطفة ( بتاعك
واختلافنا المستمر ما بين قناعتي ان المستوي التربوي للافراد قل بدرجة ملحوظة وده موضوع خطير لازم يستوقفنا قبل اي شئ تاني
ورايك ان ده ضريبة في ظل الانفتاح وتزايد الاعداد واننا لازم نتقبل ده ونتعامل معاه

اللقطة العاشرة

لقطة مش ممكن تتنسي

لحظات اعتقالك ..ايام اعتصامات القضاة
تعرف يا محمد ايامها واحدة صاحبتي اتصلت بيا ولما عرفت قعدت تعيط وتقولي هما ليه بيعملوا فينا كده

قعدت اهديها واقولها اني مش زعلانة

سالتني انا اقصد ايه وازاي مش زعلانة

قلتلها محمد راح ياخد شهادة الجودة وجاي ....

يومها ماما قالتلي ازاي بتقولي كده وكانك مش هامك
بس انا فعلا مكنتش زعلانة
لاني كنت مقتنعة يا محمد انك كنت محتاج الفترة دي
واكتشفت بعدها لما قريت ورقة كنت كاتبها هناك وكنت ناوي تبعتهالنا انك ازاي كنت محتاج الفترة دي وانك قبلها كنت بتدعي ان ربنا يرزقك عمرة او اعتقال

واد ايه انت استفدت في الفترة دي

اللقطة الحداشر

دي ما افتكرتهاش لانها لسه محصلتش

لقطة باتمني اشوفها بعد عشرين سنة

انت وملكة اليمن السعيد وولادكم

وماما وبابا

وانا وسمية واسامة وعمر وولادنا

كلنا متجمعين مع بعض عندك في بيتك بمناسبة الترقية الجديدة

قاعدين مع بعض نفتكر ايام قضيناها وذكريات جمعتنا واحلام عشناها مع بعض واحنا صغيرين

اللقطة الاتناشر

ودي برضة ما افتكرتهاش لانها برضة لسه ما حصلتش

اللقطة دي بقي احلي لقطة

اكون قاعدة بافتكر الايام دي وييجي في بالي اني عايزة اشوفك وف لحظة تكون ادامي

عارف الكلام ده فين وامتي

ان شاء الله في الجنة

ربنا يجمعنا احنا وباقي اهلنا واحبائنا في جنته

قبل ما انهي موضوعي حبيت اقولك

شكرا علي حاجات كتير مقلتهاش ومكتبتهاش

عندما يعدم الرمز...لتكون شرارة البداية

او القلب الشجاع(brave heart)منذ عدة ايام شاهدت فيلم
استمتعت بالفيلم كالعادة رغم انها ليست اول مرة اشاهده فيها
وعند لحظة اعدام البطل
...لا ادري لماذا ...لكني وجدت نفسي استعيد مشاهد الاعدام المختلفة التي ربما شاهدتها او سمعت عنها او قرات عنها

نفس المشهد يتكرر بحذافيره
القوة الغاشمة المسيطرة..تتمثل في حاكم ظالم وسلطة مستبدة
رمز للثورة ورفض الظلم

يقف امام الظالم ليقول لا
يصدر القرار باعدام هذا الرمز
ربما تختلف هذه النماذج في الظروف والملابسات المرتبطة بحدث الاعدام...لكن الشئ المشترك هو لحظة تنفيذ الحكم
لحظة الاعدام
عندما يتجمد المشهد
ويصمت الجميع
ولا يتبقي في الصورة سوي مشهد واحد تملا فيه صورة الرمز كادر الشاشة
ثم تنطلق الكلمات
ربما تكون هذه الكلمات هي اخر كلمات هذا البطل قبل ان يفارق الحياة ويرحل
غير ان كلماته هذه لا ترحل برحيله
وانما تبقي لتصنع حياة شعب باكمله او ربما تضئ الحياة لمن يحملون اللواء من بعده


المشهد الاول
اعدام وليام ولاس

(brave heart)من فيلم

وهي قصة حقيقية وقعت في القرن الثالث عشر باسكتلندا
كان فيها ويليام والاس هو رمز الثورة ضد المستعمر الانجليزي
في لحظة اعدامه
كانت كلمته الاخيرة او فلنقل الشرارة الاخيرة التي ابي ان يترك الحياة الا بعد ان يشعلها
يحاول جلادوه جعله يقر بالولاء للملك او ان يطلب الرحمة
ثم تسكت الجموع في انتظار ان ينطق بطلب الرحمة
لكنه بدلا من هذا يصرخ بكل قوته
الحرية
او
(freedooooooooooooooooooooom)


المشهد الثاني
اعدام المناضل الليبي عمر المختار

ان لم يكن الكثيرون منا قد قراوا عنه ...-وما كتب عنه يستحق بالفعل القراءة - الا ان معظمنا ان لم يكن كلنا قد شاهد الفيلم
قبل المحاكمة

يساله غراتسياني: لماذا حاربت بشدة متواصلة الحكومة لفاشستية ؟

أجاب الشيخ: من أجل ديني ووطني
غراتسياني:ما الذي كان في اعتقادك الوصول إليه ؟

فأجاب الشيخ: لا شئ إلا طردكم … لأنكم مغتصبون، أما الحرب فهي فرض علينا وما النصر إلا من عند الله.
غراتسياني: لما لك من نفوذ وجاه، في كم يوم يمكنك إن تأمر الثوار بأن يخضعوا لحكمنا ويسلموا أسلحتهم ؟.فأجاب الشيخ: لا يمكنني أن أعمل أي شئ … وبدون جدوى نحن الثوار سبق أن أقسمنا أن نموت كلنا الواحد بعد الأخر، ولا نسلم أو نلقي السلاح…
ثم تاتي المحاكمة
وعندما يترجم له الحكم يقول:إن الحكم إلا لله … لا حكمكم المزيف ... إنا لله وإنا اليه لراجعون
يقول عنه بعض من كانوا بالقرب منه وهو يصعد الي منصة الاعدام انه كان يؤذن في صوت خافت آذان الصلاة، ويقول البعض انه تمتم بالآية الكريمة "يا أيتها النفس المطمئنة إرجعي إلى ربك راضية مرضية" ليجعلها مسك ختام حياته البطولية
ونذكر كلنا المشهد الاخير
اعدامه ..سقوط نظارته...الهرج والمرج

ثم

انطلاق الزغاريد

المشهد الثالث
اعدام سيد قطب

يحاول احد الظباط الضغط عليه للتنازل
اكتب يا أخي هذه العبارة فقط : " لقد كنت مخطئا وإني أعتذر ... " .
ويرفع سيد قطب وجهه اليه ويرد في هدوء عجيب : أبدا.. لن أشتري الحياة الزائلة بكذبة لن تزول !
يقول له الظابط بلهجة الحزن : ولكنه الموت يا سيد...
وأجاب سيد : " يا مرحب بالموت في سبيل الله .. "

يرحل سيد قطب عن الحياة ولكن بقيت كلماته تتحدث عنه
بقي تفسير القران (الظلال) الذي كلما قراته اخذت افكر كيف فهم أسرار القرآن ليخطها علي الورق كلمات سهلة بسيطة لكنها ممتلئة بكم من المشاعر تتميز بالوضوح والصدق

رحل عن الحياة نعم لكن كلماته بقيت كما كان يتمني ويقول
أن كلماتنا تظل عرائس من الشمع ، حتى إذا متنا في سبيلها دبت فيها الروح و كتبت لها

المشهد الرابع

اعدام غلام اصحاب الاخدود

يحاول الملك التخلص منه بكل طريقة فيدفع به مع رجاله مرة الي الجبل ومرة الي البحر ليتخلصوا منه

وفي كل مرة يقول الغلام اللهم اكفنيهم بما شئت فينجيه الله ويموت باقي الرجال

ويعود الغلام الي الملك قائلا كفانيهم الله

ثم يقول للملك اخر كلماته اليه أنك لست بقاتلي حتى تفعل ما آمرك به قال ما هو ؟ ..

قال: تجمع الناس في صعيد واحد و تصلبني على جذع ثم خذ سهماً من كنانتي ثم ضع السهم في كبد القوس ثم قل : بسم الله رب الغلام ثم ارمني فإنك إذا فعلت ذلك قتلتني ...

وينفذ الملك ما قاله الغلام ويقول بسم الله رب الغلام ويلقي بسهمه فيصيبه في مقتل

عندها بهذه الكلمة الاخيرة تظهر الحقيقة واضحة امام الناس

فيقول الناس آمنا برب الغلام

لقراءة قصة اصحاب الاخدود

موضوعي هذا اهديه الي كل الطغاة ..اقرأوا التاريخ جيدا

في كل مرة

كان الطغاة يذهبون ..وتذهب ذكراهم ادراج الرياح ....لا بل مزابل التاريخ

وايضا في كل مرة

كانت الرموز تبقي حاضرة بافعالها وبكلماتها في وجدان الشعوب وفي تاريخ الامم وذاكرة الايام

ياما دقت عالراس طبول

ليه بيحصلنا كل ده؟؟؟

اعتقالات...محاكمات عسكرية...مصادرة اموال..اغلاق شركات

ليـــــــــــــــــــــــــــــــــــه

؟؟؟؟؟؟

الاخوان مش هما اللي هربوا فلوس البلد برة وسرقوا البلد
ولا الاخوان هما اللي قتلوا الناس في العبارة

ولا الاخوان هما اللي حرقوا القطارات

ومش الاخوان هما اللي وقعوا الطيارة

ومش هما اللي دخلوا المبيدات المسرطنة

ولا الاخوان هما اللي بيعذبوا الناس في اقسام الشرطة

ومش الاخوان هما اللي بيكمموا الافواه وبيكبتوا الحريات ويقفلوا الصحف

ولا هما اللي بيزوروا الانتخابات

مش هما

امال لـــــــــيـــــــــــــــــــــــــــــــه

ليه بيحصلنا كده

؟؟؟؟؟؟؟؟؟؟؟؟؟؟؟؟؟؟

ايوة عارفة الاجابة لكن السؤال باطرحه مش من باب الاستفهام باطرحه من باب التعجب او الاستنكار

مخنوقة ومتضايقة

احاسيس كتير مالياني

احاسيس بالظلم وبالعجز ...بالقهر وبالمرارة

ومع كل خبر جديد بخصوص المعتقلين الاحاسيس دي بتزيد وتزيد

بيملاني احساس بالظلم وانا بتابع اللي بيحصل لعبد المنعم

وباغرق في احساس بالعجزوانا باشوف عائشة بتبكي وهيه بتنادي عد يا ابي
وبيملاني احساس بالمرارة وانا باسمع معاذ بينادي ابي انت حر وراء السدود
ومقدرتش امنع دموعي وانا باشوف دموع سارة وهيه بتسال لماذا تاخذون مني عائلتي؟؟

من كام يوم ولاول مرة من بداية الاعتقالات يتغير احساسي لاحساس بالفرحة بعد ما قريت خبر ان مجلس الدولة يبطل قرار رئيس الجمهورية بإحالة الإخوان للمحاكمات العسكرية
بعدها بسرعة وكانهم خايفين احسن بعدين نصدق ان في حاجة اسمها سيادة قانون واستقلال قضاء في ظرف ساعات يتقدم طلب الطعن وخلال ايام تعقد محكمة منتدبة من مستشارى رئيس الجمهورية والوزراء ( يعني خصم وحكم في نفس الوقت ) يعني محكمة خاصة واجراءات خاصة في يوم خاص بتنظر في قضية خاصةبعدها ييجي الحكم الصدمة

وارجع الاقي نفسي مالياني مشاعرالاحباط والعجز والظلم من تاني

لكن

لا

مش حاسيب المشاعر دي تتمكن مني

مش حاسيبها تسيطر عليا

لااااااااااااا

لاااا عالية اوىىىىىىىىى

باقولها لهم وباقولها لنفسي قبلهم

يجرالنا مهما يجرالنا

يعملوا مهما يعملوا

مش حيهمنا

مش حنضعف

مش حنبطل

مش حنسكت

مش حنمل

مش حنسافر

اعملوا مهما تعملوا

ياما دقت عالراس طبول

اعتقالات

...ياما اعتقل الاخوان...دخلوا المعتقلات وهما اخوان وخرجوا وهما برضة اخوان
لكن الفرق انهم خرجوا اقوي واشد واكثر عزيمة لمواصلة الطريق

لو علي مصادرة الاموال

..مش اول مرة تتصادر ده مجموع اللي اتصادر لغاية دلوقتي حسب كلام النائب محسن راضى 100 مليون جنيه
يصادروها لو عايزين ..

بس هما نسيوا ان الاخوان مش باموالهم

الاخوان برسالتهم

بدعوتهم ..

بجهادهم

لو علي اغلاق الشركات

ياما اغلقت شركات للجماعة سواء عام 48 أو عام 54
وايه اللي حصل بعدها..بنرجع نبني من تاني..

ازمة صعبة صحيح بنمر بيها دلوقتي
لكن وزي ما بيحصل كل مرة
حنحتوي الازمة وحنكمل من جديد
حنواصل من تاني دعوتنا وطريقنا

حنواصل بعزيمة اقوي وهمة اشد

ايوة حنكمل اقوي واشد

التجربة بتقول كده

التاريخ بيقول كده

التاريخ بيقول ان7 انظمة حكم مرت علي الاخوان

كلهم حاولوا القضاء عليها

لكن منجحوش

اصل الاخوان رساله وفكرة
والافكار مش ممكن تموت

..جايز الافراد يموتوا لكن الفكرة لا

جايز الافراد يتحبسوا لكن الافكار لا

مبتحبسهاش اسوار ولا بتقيدها معتقلات

جايز الاموال تتصادر لكن الافكار لا

مهما حاولوا يصادرواافكارنا

برضة الافكاربتنتشر

من الاخر يعملوا فينا مهما يعملوا

طالما في سكة ربنا

مش حيهمنا

طالما عشان خاطر مصرنا

مش حيهمنا

احنا اختارنا الطريق ده واحنا عارفين انه طريق جهاد

اختارناه واحنا عارفين ان طريق الدعوات دايما مليان محن وابتلاءات

اختارناه واحنا عارفين انه محتاج صبر وتضحيات

اختارناه واحنا عارفين انه مش حيكون مفروس بالورود

كنا عارفين اننا حتقابلنا فيه صعوبات واشواك

حتقابلنا لكن حنصبر عليها

سنصبر لاننا نعلم كلما زاد الابتلاء زاد الثواب ان شاء الله

سنصبر ونصبر ونصبر
سنصبر حتي يعجز الصبر عنا

من هنا ورايح

مشاعري اللي فاتت حاستبدلها بمشاعر تانية

مشاعر

امل

و صبر

وثبات

وعزة

واصرار علي الاستمرار

واخيرا رجاء ودعاء ان نكون ممن قال الله عز وجل فيهم
(إنه من يتق ويصبر فإن الله لا يضيع أجر المحسنين)

سمعت نونية القرضاوي ولقيتها بتعبر بالظبط عن اللي جوايا ..اسمعهوها معايا واقروها ...واخيرا قبل ده وده عيشوا معانيها

صبرا أخي في محنتي وعقيدتي*** لابد بعد الصبر من تمكين

سنعود للدنيا نطبب جرحها***سنعود للتكبير والتأذين

تالله ما الدعوات تهزم بالأذى *** أبداً وفي التاريخ بر يميني

ضع في يدي القيد ألهب أضلعي *** بالسوط ضع عنقي على السكين

لن تستطيع حصار فكري ساعة *** أو كبح إيماني ورد يقيني
فالنور في قلبي وقلبي في *** يدي ربي وربي حافظي ومعيني

سأعيش معتصما بفضل عقيدتى *** وأموت مبتسما ليحيى دينى

ملحوظة صغيرة

الموضوع ده انا نزلته قبل كده وبعدها بساعتين رفعته عالدرافت عشان كان محتاج تعديلات ...خلال الساعتين دول اخونا محمود سعيد كان دخل وكتب تعليق ..ومشكورا صحح لي معلومة بخصوص الابيات لاني مكنتش اعرف انها نونية القرضاوي...وبما ان تعليقه اتحذف لما رفعت الموضوع انا قلت احقاقا للحق انوه عن الامر