Wednesday, May 9, 2007

التاج علينا حق...كلاكيت تاني مرة

التاج ده وصلني من محمد العناني

تاج كله اسئلة عن المذاكرة..مش عارفة ليه بيقلبوا علينا المواجع ...بقي انا باهرب من المذاكرة بالقعدة عالنت تقوموا تفكروني بيها



هل كنت طالب شاطر فى المدرسه ؟


الحمد لله كنت طالبة شاطرة اوي في المدرسة
ومحتفظة بشهاداتي في كل المراحل ..من ايام ابتدائي ومرورا بثانوي في درجي لغاية دلوقتي (فرحانة بنفسي بقي حد عنده مانع ) اصلي كنت دايما من الخمسة الاوائل ..فباعتبر الشهادة في حد ذاتها والترتيب منورها حاجة تستحق الاحتفاظ بيه
(وش فرحان بنفسه ومزاطط)
اهو الواحد كل فترة يطلعها ويستعيد الذكريات
يللا بقي نقول ايه ..كانت ايام جميلة والله
(وش بيعيط ومتشحتف اخر شحتفة)


ايه اكتر ماده حبيتها واكتر ماده كرهتها فى المدرسه والجامعه ؟

في المدرسة
كنت باحب الرياضة اوي
والمادة اللي بعدها العربي خاصة النحو والنصوص والبلاغة
ثم الفيزياء
خليط من المواد مبيجمعش بينهم غير انهم مش فيهم حفظ ..وبيعتمدوا علي الفهم اولا واخيرا
اه كنت حانسي ...كنت باحب الانجليزي كمان اوي
والرسم
والخط العربي
ومش عايزة حد يألس علي اخر مادة دي
(وش مطلع مسدسات وحيضرب في المليان)
انا كنت باهتم اوي بحصة الخط وباعتبرها احلي حصة.. وباستناها كمان من الاسبوع للاسبوع ..كان بيدينا الحصة دي في اعدادي مدرس متخصص خط عربي فقط ..وبالتالي كانت حصة جد زيها زي اي حصة والمدرس بيصحح ويتابع وكلام من ده


اكتر مادة كنت باكرها في المدرسة او نقول مش بافضلها الجغرافيا ....والتاريخ ..مش باقولكم مش باحب الحفظ خاااااااااااالص

(وش بيشد في شعره)
في الكلية بقي
مممممممممم
لازم يعني حكاية مواد باحبها دي


نقول باحب الفيزيا برضة....و دي بندرسها في اول سنة بس
ايه تاني
الرياضة ودي بندرسها في تاني سنة بس
ههههههههههههه
شكلي حاكرر المواد نفسهم تاني
بس هو مفيش عربي عندنا

لا بجد بجد يعني وبصراحة
كليتنا المواد كلها حفظ بطريقة غير عادية ...نسبة الفهم قليلة اوي خالص جداااا
لو اعرف كده قبل ما ادخلها مكنتش دخلتها
يمكن اكتر مادة بالنسبة لي معقولة هيه السيوتكس او الصيدلانيات تقريبا هيه المادة الوحيدة اللي باحبها في الكلية
وعامة اي مادة او كورس فيه فهم عندنا بالاقي نفسي باحبه


اما بقي اللي باكرهه في مواد الكلية
مممممممممممم
مش حاقول باكرهه ..خلينا نقول مش بافضله
تقريبا كل المواد اللي فيها صم وحفظ ودش وخلاص مش بافضلهم ....ودول يا مكترهم في كليتنا
(وش بيصوت من اللي بيشوفه )
صحيح مش عايزة حد يفهمني غلط ..من كلامي اللي فات عن مواد الكلية واني مش بافضل معظمها
انا يا جماعة تقديراتي السنين اللي فاتت تتراوح من جيد لجيد جدا
يعني باناضل برضة وعايشة
(وش رافع ايده بعلامة النصر)


كنت عايز تطلع ايه وانت صغير ؟
مممممممممم
ليه بس تقلبوا عليا المواجع
وانا صغيرة كان نفسي اطلع مهندسة
(ومش عايزة اسئلة عبقرية من نوعية ايه اللي دخلك علمي علوم)
واحيانا كان نفسي اطلع دكتورة..
طبيبة نفسية بالذات ( سامعاك ياللي بتضحك)
وجاتلي فترة كان نفسي ادخل فنون جميلة او معهد خطوط واشتغل في مجال الرسم والخط
وطبعا بعد نتيجة الثانوية العامة وانا باختار وباكتب الرغبات
ايه افضل كلية للبنات
صيدلة
يبقي نكتب اول رغبة صيدلة
هو محدش اجبرني ساعتها اني اكتب صيدلة بس هما اقنعوني وقتها ان هيه افضل كلية للبنات ...
كلية عملية زي ما كان نفسي ومش نظرية (لو افتكر بس مين اللي ضحك عليا وقالي انها عملية....ربنا يسامحه -(وش متنرفز ولو شاف حد ادامه حيقتله ))المهم اني ساعتها اقتنعت وكتبت صيدلة اول رغبة
(وش بيعيط جامد اوي خالص جدا)


طبعا انا رغاية كالعادة(وش بيبص ببراءة) والسؤال يكون صغير واجابته المفروض صغيرة بس انا لازم ارغي كتير(نفس الوش اللي بيبتسم ببراءة ) واطلع اللي جوايا ..امال اكتم في نفساونيتي واتعب (وش ماسك مسدسات وحيضرب في المليان اي حد يقول اكتمي واحنا مالنا )...
لا طبعا حاتكلم وارغي براحتي ..مش مدونتي ...(وش رخم بينظر نظرة استهبال وبيبتسم ابتسامة لزجة)...


حد عنده اعترااااااض
(وش بينظر باذبهلال)

اوعوا يكون حد عنده اعترااااااااااااااض؟؟؟


ايوة كده

فكرت

كان لازم ازعق يعني


امرر التاج لمين امرر التاج لمين
مفيش حد حاضر في ذهني حاليا
لما افتكر حابقي اكتب وابعتلهم


ـــــــــــــــــــــــــــــــــــــــــــــــــــــــــــــــــــــــــــ

فاصل قصير ثم نواصل

ـــــــــــــــــــــــــــــــــــــــــــــــــــــــــــــــــــــــــــــ

عدنا
الصورتين دول عجبوني اوي قلت انزلهم للكم




19 comments:

AbdElRaHmaN Ayyash said...

هههههههه
اجاباتك جميلة اوي اخت مروة
بس انا مصر
هندسة وعلوم ازاي
هي فعلا صيدلة أحسن كتير بدون نقاش
ربنا يوفقك
بوست جميلة
سلام

Anonymous said...

لقاء أصحاب المواقع والمدونات من الصيادلة


ص. عماد الدين فوزى صاحب مدونة ( الدوار )

ص. ايمان سعد صاحبة مدونة ( بنت سعد )

ص . خالد جاد صاحب مدونة ( بحب مصر )

ص . حسام بركات مدير منتدى ( الصيادلة اليوم )

ص . حاتم حسين مدير موقع ( الصيدلي الأول )

ص . هشام سيف من مؤسسي موقع ( صيدلة أون لاين )


حضر اللقاء ص. محمد عثمان عضو لجنة الشباب

و ص . أحمد رامي مقرر اللجنة و عضو مجلس النقابة


ثم انشاء

رابطة الصيادلة الالكترونية

( صيادلة بلا حدود )


أهداف الرابطة :

* التواصل بين الصيادلة من اصحاب المدونات و المواقع

* تفعيل دور الصيدلي في المجتمع

* تكون كنافذة او معبر لصوت الصيادلة


شروط العضوية :


* صيدلي أو طالب بأحدى كليات الصيدلة

* يحرر أو يصدر موقع أو منتدى أو مدونة على النت


www.aldawar.egyblogs.com

www.bent-sa3d.blogspot.com

www.ba7ebmasr.blogspot.com

www.sayadla.com

www.1stpharmacist.com

www.saydlaonline.com

محمد العنانى said...

يا سلام يا سلام
صيدله مش كليه عمليه
مفيش معامل ومفيش امكانيات
انتى مش قاصدك كده
التعليم فاشل
يعنى نعمل ايه الى فى رقابتو عيلين تعبان بيهم
الحكومه فى رقبتها سبعين مليون تعمل ايه
هههههههههههههههه
ما علينا
جزاك الله خير

علاء said...

جميل جدا انك مدخلتيش هندسة
و انتا يا عبد الرحمن متنطقش خاالص
عملوا ايه اللي دخلوا هندسة و جابوا الجيد جدا و طلعوا من العشرة الأوائل
...
اللهم الا كنتي دخلتي عمارة (سامع يا عبده)
...
بس الأكيد ان صيدلة أحسن كتير
و ربنا يباركلك
و سلام عليكم

واحدة بتحب البلد دي said...

AbdElRaHmaN Ayyash ...
هندسة وعلوم ازاي...مش قلنا بلاش السؤال ده
عادي كنت باحب الرياضة اوي ونفسي ادخل هندسة
لكن في الثانوية العامة وبما اني شاطرة برضة في العلوم قررت ادخل علمي علوم علي اعتبار انه في المستقبل البعيد كلية صيدلة احسن من كلية هندسة بالنسبة للبنات وبالنسبة لشغلها بعد كده كمان

وبعدين حضرتك بتقول كلية صيدلة احسن كتير
لا بقي(وش بيعيط)صيدلة مش احسن ولا حاجة
انا اختي في كلية هندسة قسم عمارة واخويا في حاسبات ومعلومات
وبصراحة لما اشوف مذاكرتهم اللي هيا كلها عبارة عن رسم في اللوح وتسليمات بالنسبة لهندسة
او بالنسبة لحاسبات قعدة عالكمبيوتر ولما نسأل بتعمل ايه يقول باذاكر

اما انا مهرجااااااااااااااان من الورق والكتب والمذكرات
(وش حيموت من كتر العياااااااااااط)

بصراحة صيدلة مش احسن ولا حاجة

واحدة بتحب البلد دي said...

Anonymous ...
كان نفسي اكون موجودة في اللقاء ده اوي بس للاسف توقيته صعب جدا
ان شاء الله يتاح لينا الفرصة ونيجي اللقاء الجاي

محمد العنانى ...
!!!!!!!!!!!التعليم فاشل
انا قلت كده لا سمح الله
هو انا اقدر اقول كده اصلا!!!!؟؟؟
ده التعليم جميل ومتقدم
والمعامل مش مكدسة ومش بنبقي عشرة علي الميكروسكوب الواحد
والسكشن عدده مش 130ولا حاجة
والمواد كلها معتمد بالاساس علي الفهم ومفيش صم ولا دش ولاحفظ خاااااااالص
والحياة لونها بمبي مسخسخ كمان

تعليم فاشل
هو حد يجرؤ يقول الكلام ده
اقول ايه بس
ربنا يصلحلنا الاحوال

واحدة بتحب البلد دي said...

علاء ...
علي فكرة
انا اختي هندسة قسم عمارة ومع ذلك مش بتنصح اي حد انه يدخل القسم ده خاااااااااااالص بتاتا
وبتقول اي قسم تاني في هندسة ارحم

واضح ان محدش عاجبه حاله

جزاكم الله خيرا علي المرور والتعليق

khadiga said...

إجابات جميلة جداً

بجد مدونة تحفة وصاحبتها بنوتة زي العسسسسل

ربنا يكرمك ويجعلها في ميزان حسناتك

Anonymous said...

إجابات جميلة
وأجمل ما فيها الوشوش:)

بالاسلام نقدر نحلها said...

وش مندهش جدااااااااا....من حب الصيدلانيات يا دكتور مروة...من الناس النادرة اللى سمعتهم بيحبوا الصيدلانيات الصراحة...المادة دى ممكن تتحب فى سنة اولى ايام دكتور نبيل فؤاد اللى كان بيهزر طول المحاضرة وواخد الموضوع ببساطة وبيجيب امتحان معرووووف بتكلم من الجانب الدراسى يعنى بغض النظر عن نوع هزارة...ودى فعلا اكتر سنة عليت فيها فى الصيدلانيات من سنة تانية وطالع وقابلنا دكاترة الله يهديهم..من اول د-صفاء الجمل واحمد عشرة ومؤخرا دكتور شمس اللى مبيخليش حد يكتب فى المحاضرة ولا يتابع من ورق السنة اللى فاتت ولا يسجل وكمان القسم ملوش كتاب....امال نعمل ايه يعنى مش فاهم ولما شاف طالبة بتكتب وراه يقولها انا لو اطول اسلب منك الحياة كنت سلبتها....يا سلاااام مش هنتكلم كتير عن المادة بس ارجع واقول لولا اختلاف النظر لبارت السلع اقصد المواد كل واحد وذوقة فى المواد ....وش هدى شوية بعد الاندهاش والنرفزة....الصراحة تدوينة ممتازة كالعادة بارك الله فيك ووفقك فى الامتحانات

Anonymous said...

موضوع جميل اوى اوى بجد ومش سئلك ازاى صيدله وهندسه عادى قا هنفوتها
المهم ربنا يوفقك يارب فى الامتحانات يااارب
وهنبقا نتفاهو على الميل فى موضوع (وش رخم بينظر نظرة استهبال وبيبتسم ابتسامة لزجة)
لزجه ماشى ماشى
ندى

AbdElRaHmaN Ayyash said...

هههههههههههههههه
ماشي يا علاء
ماشي ياخويا
:D
الفكرة يا دكتورة ان الباشمهندس علاء طلع من العشرة الاوائل في دفعته في هندسة المنصورة
:D
في اتصالات
يعني عبقري بيمشي بيننا
واهه بدأ يدون زي البتوع اللي زينا :D
ربنا يوفقك ياباشمهندس
-------
:D أما محمد فهو فعلا اونلاين كتير اوي
:D أنا واثق انه بيذاكر
او بيتخانق مع محمود سعيد
او بينم فيا :D
بهزر يا عم اوعى تصدق
:D سلام

همسة قلم said...

حسستيني اني داخلة منتدى يابنتي
اشي وش احمر والتاني اخضر وبمسدسات .. ربنا يعينك الصراحة

وبعدين مافيش احلى من الجغرافيا والتاريخ حد يطول يصم يابنتي

بوست جميل وشخصية لذيذة يامروة :)

wayfarer said...

قررت اليوم ان اعلق في كل المدوناتالتي في مفضلتي
فكان لابد ان أتي الي هنا الي حلم الحرية لأجد أجابات علي تاج
الأسلوب متميز و خاصة موضوع الوشوش الي اضاف جو من البهجة و اطلق الخيال لي لاعيش الرد و كاني أراه
تحياتي و الله الموفق

امام الجيل said...

ايه الاجابات دى وحلوة حكاية الوشوش دى معبرة جدا طيب كويس
بس ليه حد يدخل كلية مش بيحبها وهتبقى مستقبله كله مبنى عليها
يلا خير على كل حال

واحدة بتحب البلد دي said...

khadiga ...
جزاكي الله خيرا يا خديجة
انتي اللي زي العثثثثثل
سعيدة اوي ان المدونة عجبتك
ربنا يرزقنا الاخلاص

سفير الود ...
اهم حاجة الوشوش
دي قبل الردود نفسها

واحدة بتحب البلد دي said...

بالاسلام نقدر نحلها...
هما صحباتي بيقولوا عليا برضة اني غريبة في حبي للمواد
يعني الناس كلها مكنتش طايقة الرياضة وعلم النفس انا كنت باحبهم جدا
الناس مش بتحب الصيدلانيات انا بحبها
الناس مش طايقة كورس الفارما بتاع دكتور صلاح انا باعشق الجزء ده وباستمتع بمذاكرته جدا
هو ممكن اكون انا اللي غريبة ؟؟
مش عارفة
بس طالما الموضوع اتكرر كده يبقي شكل صحباتي والله اعلم عندهم حق

ندي...
مستنية نتفاهم
ولو اني مش بالاقيكي اون لاين خالص

واحدة بتحب البلد دي said...

AbdElRaHmaN Ayyash ...
الحمد لله
اخيرا عرفت محمد بيعمل ايه عالجهاز

همسة قلم ...
تاريخ وجغرافيا
مين
فين
ازاي
؟؟؟؟

واحدة بتحب البلد دي said...

wayfarer ...
سعداء بقرار المرور ويارب يتكرر كل موضوع

امام الجيل ...
اختيار الكلية كان اختيار عقلاني بحت بعيد كل البعد عن اللي باحبه واللي مش باحبه
الحمد لله علي كل حال