Sunday, April 22, 2007

صورة الدفعة...عندما تمنيت ان يتوقف بي الزمان



زحمة ودوشة ..

وناس عمالة تغني

صورة صورة صورة ..كلنا كده عايزين صورة

طبعا بتسالوا ايه الزحمة دي وايه هيه الصورة ومين هما الناس
الزحمة دي هيه دفعة صيدلة اسكندرية 2007
والصورة دي كانت صورة الدفعة بتاعتنا في استاد الجامعة
والناس هما كل طلبة الدفعة بتاعتي قاعدة عالمدرجات

وكلنا في انتظار الصورة اللي حتتاخد لكل الدفعة



المصور يشاور بايده من بعيد


1



2



3

الكل ثابت في مكانه
..وللحظة تتوقف الحركة في المكان





تمنيت وقتها لو كان ينفع الزمن هو كمان يتوقف بيا

هل خلاص خمس سنين جامعه عدوا وانتهوا


؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

؟؟؟؟؟؟؟؟؟؟؟؟؟؟؟؟؟؟؟؟؟؟؟




خمس سنين

من احلي ايام حياتي مروا خلاص



خمس سنين

سكاشن ...و محاضرات
معامل... ومركبات


خمس سنين

شنطة ادوات..وسلم طالعين ونازلين فيه ..بنجر فيه نفسنا بالعافية ومعانا الادوات
درج الكلية المزحوم والقفل اللي لازم يتغيركل سنة ..والمفتاح اللي نسيته وادواتي جوه الدرج


خمس سنين

محاضرات فاضية مافيهاش غير بنشين.... ومحاضرات تانية الطلبة واقفين وقاعدين عالسلالم من كتر الزحمة
السكاشن والزحمة علي مركبات المعمل..وعلي الاجهزة والميكروسكوبات

خمس سنين

كتب عملي لازم نشتريها... وورق محاضرات نجيبه من المكتبة اللي جمب الكلية
ومراجع نصورها من مكتبة الكلية
خمس سنين
ابحاث نعملها ونسهر عالنت بالساعات نظبطلها الورد والباور بوينت
خمس سنين
سهر مذاكرة ونوم عالورق ايام الامتحانات من كتر الزنقة
زحمة امتحانات الشفوي..واللخبطة ادام الدكتور اللي بيعصر الطلبة اسئلة في الشفوي


خمس سنين

نشاط اجتماعي وزيارات وملتقي علمي ومحاضرات تنمية بشرية
ومسابقات رسم وخط

خمس سنين
دروس ايمانية وانشطة دعوية


خمس سنين

وجوه اتعودت اشوفها كل يوم
بعد السنة دي مش حاشوفها تاني

خمس سنين

من احلي ايام حياتي
بادعي ربنا ميكونوش ضاعوا عالفاضي واني اكون استغليتهم احسن استغلال


خمس سنين

ايام متتنسيش

ايام كانت كل لحظة سايبة جوايا ذكري متتنسيش

ايام كانت....


معلش مضطرة انهي البوست ده علي كده

عشان خلاص بجد حاعيط


حابقي اكملكم في بوست تاني

سلام مؤقت



ملحوظة صغنتوتة علي جنب
الصورة دي واحدة من الصور اللي انا صورتها للدفعة في اليوم ده
انا حاولت اختار اقل صورة واضح فيها اشخاص فمعلش حتلاقوها مش واضحة
طبعا مفهوم ان دول مش نص الدفعة حتي..لان احنا عددنا 1400 تقريبا ...بس الصورة دي انا اخدتها في الاول قبل ما كل الناس تقعد

50 comments:

elfagreya said...

حبيبتى مروة..

اتبسطت انى اول تعليق

لبجد يا مروة مقدرة اللى انتى حاساه..هوه انا محستهوش لكن فى ناس من اغلى الناس عندى اتخرجوا وحسوا بيه وكنا بنعد قبل التخرج وأيام تخليص المشروع بتاعهم نتكلم ونتخيل ونعيط..يعنى من ده على ده

بس بجد عاوزة اقولك حاجة..الذكريات دى نعمة من ربنا سبحانه وتعالى..خليها دائما فى عقلك وقلبك
اما العلاقات الدائمة فهى ما كان فيها اجتماع على الخير..
وان شاء الله اكيد علاقتكم كده عشان كده حتى لو انشغلتوا عمركم مهتنسوا
وابقى تاعليلهم الكلية كتير
سلاااااااااااااااام

mohamedgado said...

يابختك
يا ما نفسى اغمض واصحى
الاقينى خلصت

أحباء فى الله said...

كل كنت دايما لما أبقى فى مرحله معينه أقول إمتى تعدى
إمتى يأتى المرحله الجايه لأنها فى نظرى أفضل
ولما تأتى أزعل وأقول إمتى الايام ترجع تانى
لكن دلوقتى وأنا فى مرحله الكليه وعارف إنها أضل مرحله على الإتلاق على الرغم من كم المعاناه اللى بنعانى منه بس بس هى أفضل
فيها حقدر بجد أثبت ذاتى

ابوزياد الفاتح said...

على قد ما انا عايز اخلص
لكن برضه صعبان على تلك الايام الجميله
ليه كده بس
خليت الواحد يدمع والله

ذو النون المصري said...

كل واحد فينا مر تقريبا بنفس المشاعر
لما انتهينا من الدراسه الجامعيه و نحن شباب
اغلبنا بكي
و الدموع كانت في عيون الجميع بسبب فراق الاصدقاء
تحياتي

3am negm said...

أنا طول عمرى بفكر فاللحظة إلى إنتى فيها دلوقتى و سعتها هعمل إيه ؟؟ مع إنى لسه فى سنه أولى صيدلة برده إسكندرية بس الحل إن الواحد يحاول يطلع بأصحاب يكملوا معاه المشوار و ربنا يستر علينا سعتها سلام

خطــاب said...

مفارقة الجامعة احساس صعب جدا احسه حاليا بما انى فى اخر سنوات الدراسة الجامعية

واحد من الإخوان said...

هي فعلا احلى ايام العمر

لكن نتمنى تكون الأيام اللي جايا تكون أحلى

محمد حمزة

صوت عصفورة said...

يااااااااااااه يا بنتي ... بجد جيتي على الجرح اوي ...احساسك مقدراه جدا جدا جدا فوق ما تتصوري ... لاني في آخر سنة بس ... و انا ازيد عليكي لان كليتي اللي عرفت فيها اخواتي و عشت فيها ايام بجد ما تتعوضش في مدينة غير مدينتي ....اصبر نفسي بلقاء اخواتي في الجنة .. و بان الله حتما يحمل لنا دائما الافضل ...كل كلية و انتي طيبة

واحدة بتحب البلد دي said...

الفجرية او اسماء

منورة المدونة يا اسماء
انا اللي مبسوطة جدا انك اول تعليق

انتي بتقولي محستهوش بس عشتي مع ناس حسته
تخيلي يا اسماء سنين الكلية اللي فاتت دي كل سنة كنت باعيشه مع الناس اللي حتتخرج
وكل سنة اقول لنفسي يا تري اخر سنة ليا حاعيش نفس احساسي ده
وجت اخر سنة واكتشفت اني باعيش احساس اصعب كتير من اللي كنت باعيشه السنين اللي فاتت

ربنا يديم علينا نعمة الاخوات ويديم علينا حبهم في قلوبنا

واحدة بتحب البلد دي said...

mohamedgado ...

صدقني حتغمض وتفتح وتلاقي نفسك خلصت
انا في رابعة صحيح بس لسه فاكرة اول لحظة ليا في الكلية واول محاضرة واول بنش قعدت فيه واول ناس اتعرفت عليهم

وساعة ما تغمض وتفتح وتلاقي نفسك خلصت
مش حتقول ابدا كلمة يا بختك دي

اصرار أمل said...

مروة ؛؛؛
ساعتها حقا نتمنى أن يقف بنا الزمن ؛؛؛
ولكن الزمن لا يتوقف؛
وأيامنا تمضى ؛؛؛
لذا؛ لنتقبلها كما هى ؛؛؛
ولندع السعادة تدخل الى قلوبنا؛؛
فهى زادنا .......
أدام الله عليك الأيام السعيدة ولا حرمك منها....

واحدة بتحب البلد دي said...

أحباء فى الله ...
وتظل كل مرحلة ولها بريقها وجمالها ..ونظل نحن نتمني مرور كل فترة حتي اذا مرت بدانا نحن اليها ونتمني لو عادت مرة اخري
وما بين الامنيتين تكون الفترة نفسها
فاما نحسن استغلالها او لا


ابوزياد الفاتح ...
مين مش صعبان عليه الايام دي
ربنا يرزق الجميع مثلها وافضل منها في طاعته

واحدة بتحب البلد دي said...

ذو النون المصري...
البكاء مش بسبب فراق الاصدقاء وبس
لكن فراق المكان
فراق المرحلة الجامعية نفسها
فراق العادات اللي ارتبطت بالجامعة ..صحيان الصبح ..محاضرات ..سكاشن ..مذاكرة
وحاجات كتير بانتهاء الدراسة بتروح ومبترجعش

واحدة بتحب البلد دي said...

3am negm...
حضرتك من سنة اولي وبتفكر في اللحظة دي
؟؟؟؟؟؟؟؟؟؟؟؟؟؟؟؟؟
امال لما توصل رابعة حتفكر في ايه؟

احد الحلول فعلا زي ما حضرتك قلت ..الصحبة الصالحة اللي تخرج بيها من الكلية وتكمل معاها المشوار
ربنا يرزق الجميع بالصحبة الصالحة

سعيدة باول مرور لحضرتك علي مدونتي وبانتظار تكرار الزيارة

خطــاب ...
هو مش احساس صعب وبس ..بما ان اخر سكشن ليا بكرة انا حاسة انه احساس قاتل..هل كده خلاص تنقطع علاقتي بالعالم ده
؟؟؟؟؟؟؟؟؟؟؟؟؟

واحدة بتحب البلد دي said...

واحد من الإخوان ...
اللهم امين
يارب الايام الجاية تكون احلي


صوت عصفورة ...
ان شاء الله يكون اللقاء في الجنة وفي الدنيا برضة
ربنا يجمعك انتي واخواتك علي خير دايما

واحدة بتحب البلد دي said...

اصرار أمل ...
صدقت
نتمني توقف الزمن لكنه لا يتوقف
فلندع الشعادة تدخل لقلوبنا ولنكمل الطريق

بالاسلام نقدر نحلها said...

والله ان القلب ليحزن وان العين لتدمع ولا نقول الا ما يرضى الله انا لله وان اليه راجعون
والله ان الفراق لمصيبة....والله لحظة الفراق دى مزلزلة...بتهز كيانى.... بحس ان روحى بتنسحب منى...عاوز تعرف اد ايه حد بحبك شوفه لحظة الفراق...هتحسها فى آخر يوم فى الدراسة...هتلاقى ناس ممكن يبدو عليهم الجفاف فى التعامل لكن من جواهم انقياء أصفياء...لحظة الفراق دى لو قعدت اكتب عنها لا يمكن اوصفها..رهيبة بكل ما تحمله الكلمة من معنى...مؤلمة بكل ما تحمله الكلمة من آهات..حاسس ان الخمس سنين عدوا فى لحظة..يااااااه فاكر أول يوم وانا داخل الكليه كده وخايف ومستغرب ...وعمال اذاكر خايف على نص درجة قال يعنى فى الثانوية ودلوقت خلاص بنهى الكليه وانا ناسى حاجة اسمها مذاكرة وبفكر لأدام..
هو خلاص كده معدش هشوف على ونرخم على بعض
هو خلاص كده معدش هلعب كورة مع سامح ورامى و و
هو خلاص كده معدش هنقعد انا و عبد الرحمن وعلى نقول اناشيد
هو خلاص معدش فى زنقة الامتحانات...طب والله مش وحشة رجعوها بس مسيبش زمايلى واخوانى
مذاكرة مذاكرة ايه يعنى شهر نعك فيه بس منتحرمش من الوجوه الطاهرة الصافية دى
خلاص كل واحد هيروح بلده وينشغل بشغله ولا صيدليته ولا جيشه وياعالم مين هيسال عن مين...
وياترى الخمس سنين دول فى ميزان حسناتنا ولا لأ...
يالله خواطر كتير مش مكانها هنا...بس حبيت ابدى اعجابى بالتدوينة ومستنين بوست تانى فى آخر ايام الكليه
اعتقد هيكون اكثر حرارة ولوعة

يا الله لا تحرمنا من تلك الوجوه

اللهم اجمعنا بها يوم القيامة وظلها بظلك يوم لا ظل الا ظلك

يا الله افرغ علينا صبرا من عندك

اللهم آمين

امام الجيل said...

طيب الف مبروك الان اجتزتى مرحلة مهمة من حياتك ومقبلة على ايام.... بيضة ان شاء الله بس بجد الايام اللى بتيجى بعد الكلية بتبقى مختلفة جدا الواحد بيحس انه كان فى وادى تانى ولسه بيبتدى حياته يا دوب ربنا يوفقك

احمد رفعت said...

سلام عليكم
انا اول مرة ادخل عند البلوج بتاعك بس احييك على البوست ده مع اني مكنتش في صيدلة الاسكندرية بس حسيت بذكياتكم الحلوة .
احييك على تذكر تلك الايام ورصدها بقلمك .

بوست جميل

بنت المدينة said...

ياااااه يا مروتى ...قلبتى علينا المواجع ..عشت كل اللحظات اللى قلتى عليها ...حتى واحنا بنتصور مع العميد فى اخر السنة ...اتنميت من كل قلبى مايحصلش ...لكنه مع الاسف حصل ...
واتخرجت والايام عدت هوا...
ماتصدقيش اللى يقولك انك هتنسى حزنك ولن تبقى لك الا الذكريات الجميلة....
اللى عشناه فى الكلية مع الاخوات اكبر من انه يتنسى او يتوقف الحزن عليه
ستظلى كلما تذكرتى تلك اللحظات السعيدة تجدى دموعك تنطلق من عينيكى
وهتاخدك الحياة عشان تشوفى الدنيا على حقيقتها ورغم انك سعيدة وليس هناك ما يعكر صفو حياتك الا ان الدموع لا تتوقف على تلك الايام
وتتمنين من كل قلبك ان تدفعى كل ماتملكين مقابل ان تعيدى الكرة
وتدخلى سنة اولى من جديد

صديقة الطفولة والثانوى والجامعة
اختك فى الله
ش . ب
خريجة علوم 2006

واحدة بتحب البلد دي said...

بالاسلام نقدر نحلها ...
مش لاقية اي كلمات اعلق بيها علي خواطر حضرتك غير بنفس الدعاء اللي حضرتك ختمت بيه تعليقك
ـــــ
يا الله لا تحرمنا من تلك الوجوه
اللهم اجمعنا بها يوم القيامة وظلها بظلك يوم لا ظل الا ظلك
يا الله افرغ علينا صبرا من عندك


امام الجيل ...
يمكن الواحد مشغول دلوقتي بالتفكير في نهاية المرحلة اللي فاتت ولسه مفكرش في المرحلة اللي جاية
وايوة مقتنعة انه زي ما حضرتك قلت ان كل مرحلة ليها طعمها المختلف ..
لكن يظل بريق الجامعة شئ مختلف ..ليها طعم تاني مبيتكررش

واحدة بتحب البلد دي said...

احمد رفعت ...
سعيدة باول مرور ليك علي المدونة
ويارب الزيارة تتكرر دايما


بنت المدينة ...
ياااااااااااااااااه
ش .ب
بحالها بتزور المدونة
يا مرحبا يا مرحبا ...المدونة نورت
ليه بس يا بنتي تقلبي عليا المواجع
المشكلة اني عارفة اني مش حانسي ببساطة
وان الذكريااات كتييييييييييير اكتر من انها تتنسي
واني حاتمني لو ينفع استعيد ولو لحظات من الايام دي

سعيدة اوي بمرورك يا ش.ب
ويا رب يديم صداقتنا واخوتنا وتبقي طفولة وثانوي وجامعة وما بعد الجامعة حتي نهاية العمر ..ثم في الجنة ان شاء الله اخوانا علي سرر متقابلين

محمد بدرى said...

خمس سنين راحو وخمسين سنة جاية إنشاء الله

قصاقيص said...

احساسك عاي اوي
::::::::
مش عارفة اقولك مبروك علي نهاية دراستك ولا اقولك ايه بالظبط في حالة الاحساس المرهف الي انتي عايشاها
عموما هسمح لنفسي استعير كلمة من صديق ليا قالهالي قبل كده:.....0
إن أجمل الأيام هي اللتي لم نعشها بعد
،،،،،،،،،
تحياتي ويارب دايما الصورة تفضل عايشة جواكي

جمعاوى روش طحن said...

احاسيس رائعة
و خصوصاً انها 5 سنين بحالهم
" خمسة و خميسة يعنى "
بس بصراحة الله ينور

ابوزياد الفاتح said...

كويس كده
يعنى كان لازم الموضع الى يحزن ده
الواحد عيونه ادمعت والله
قلبتوا علينا الممواجع

ليه بس كده
كل ما الواحد يشوف ناس ويحبها
لازم يجى وقت نفترق فيه
عارفين اصب حاجه الواحد يفتقدها فى حياة الجامعه دى
الاخوان
تالعمل مع الاخوان والاثاره اللى فى شغلهم
وصحبتهم واخوتهم
ياااااااااه
مش متخيل اسيب الناس الحلوه دى وهم اعز الناس الى قلبى
واتنركهم ولا اراهم
اخوانى هم من كنت استند اليهم ويدعمونى بكل قوه
هم من جلست معهم وناضلت وكافحت من اجل رفعة دين الله
كيف اتركهم
لحظه صعبه جدا
اسال الله العلى القدير
ان يقبض روحى قبل هذه اللحظه
الموت اهو عندى من هذا الفراق
ربنا يجمعنا فى مستقر رحمته

elkamhawi said...

ياه ه ه ه
ده انتى تعبتى قوى قوى
دنا مش بروح غير الامتحانات وزهقان

بس الذكريات حلوة

صاحب البوابــة said...

اول مرة ازور مدونتك

لكنها ان شاء الله لن تكون الاخيرة ابدا

تحياتي لهذه الصور الرائعة

وادعو الله ان يوفقك في حياتك العملية

تحياتي

Anonymous said...

مش رح أعلق على التدوينة الرائعة وعلى ذكريات الجامعة اللي صارت مجرد ذكريات بكل ما فيها بناسها وأحداثها وأشياء كثيرة مش رح ترجع

تعليقي على المدونة الرائعة جدا والأغنية كمان رائعة جدا جدا:)

أسجل إعجابي الشديد بها

Anonymous said...

شعور صعب شعور الفراق ده

بس بمرور الوقت ومع حياة جديدة ومع ناس جديدة الواحد بينسي شوية

لان كل مرحلة ليها نجاحاتها

ياســــــــــر مدنـــــــــــــي said...

السلام عليكم ورحمه الله وبركاته...وميه مسه لو كنتم بتقروا التعليق باليل وصباحو قشطه لو كنتو بتقروا بالنهار ...وبصراحه أنا شخصيا بتمني اليوم اللي أخلص فيه ...وأخلص من المحاضرات والسكاشن والحضور والغياب والمدرجات والدكاتره والمعيدين والمذاكره والتعب والارف اللي انا في وخصوصا لان كليتي في قنا وعلي العموم ...الواحد عايز يشوف حاله بس حاسس إن الدراسه هي اللي مأخراني واللي في الخير يأدمو ربنا ...ويلا مش مهم

dead man said...

مش عارف .. بحس انه بس خوف من اللى جاى وحنين للماضي

بعد ما خلصت الجامعة كنت بقول أيام الجامعة أحلى أيام .. وايام الجامعة كنت بقول أيام الثانوى أحلى الأيام.. وأيام الثانوي كانت أيام الطفولة أجمل الأيام..

ربنا ميجبيش وحش
:)

انا قلب said...

اسال الله ان يوفقك في حياتك الباقيه
وصبرا فان الدنيا ساعه فاجعليها طاعة
ووفقك الله الي مايحبه ويراضه وجعلك الله نصرا وذخرا للاسلام والمسلمين
وبارك الله لك

ياســــــــــر مدنـــــــــــــي said...
This comment has been removed by a blog administrator.
واحدة بتحب البلد دي said...

محمد بدرى ...
يارب الخمسين اللي جايين -لو ربنا اراد وكان للواحد عمر - يبقوا في جمال الخمسة اللي راحوا واحلي منهم


قصاقيص...
إن أجمل الأيام هي اللتي لم نعشها بعد
،،،،،،،،،
جميلة اوي جملتك يا مي
سعيدة اوي بمرورك علي مدونتي
وباتمني لو زيارتك ليا تتكرر كتير

مدونتك من ارق المدونات اللي زرتها
تحياتي ليكي

جمعاوى روش طحن...
شاكرة ليك تعليقك
دي اول زيارة لحضرتك علي المدونة ....في انتظار تكرار الزيارة والتعليق

واحدة بتحب البلد دي said...

ابوزياد الفاتح...
فعلا اصعب الاشياء علي النفس عند نهاية المرحلة دي هيه فراق الاصحاب
ربنا يجمعك باخوانك علي خير دايما

elkamhawi ...
ما شاء الله الامتحانات بس وحضرتك زهقان
علي كده احنا مناضلين اننا بنروح سكاشن ومحاضرات وانشطة مختلفة


صاحب البوابــة ...
سعيدة باول زيارة لحضرتك ويارب الزيارة تتكرر باستمرار

واحدة بتحب البلد دي said...

سفير الود said...
جزاكم الله خيرا علي رايك
سعيدة ان الاغنية عجبت حضرتك

مصراوي أوي said...
اكيد كل مرحلة وليها طعمها ونجاحتها
انا واثقة من كده بس برضة المرحلة دي ليها طعمها المختلف ..مذاقها المختلف متهيالي مش حيتكرر

ياســـر مدنـــــــــــــي...
عارفين يا استاذ ياسر انك مش طايق الكلية ولا طايق قنا ولا طايق اي حاجة
بالراحة شوية بس
وزي ما انت قلت اللي فيه الخير يقدمه ربنا
ركز في المذاكرة انت بس ...وبلاش نت ومدونات
بدل ما اروح اشتكي لخالو اللي هو باباك وساعتها بقي احتمال تبقي مش طايق نفسك بالاضافة لكل اللي انت مش طايقه

واحدة بتحب البلد دي said...

dead man...
ويظل الحنين للماضي هو الشئ المتكرر في كل المراحل
سعيدة باول مرور ليك علي المدونة
يارب دايما

انا قلب ...
اللهم اميييييييييييين
جزاكم الله خيرا علي النصيحة والدعاء

محمد العنانى said...

اسالك الدعاء
وليكى تاج عندى

Anonymous said...

ربنا يوفك ان شاء الله فى حياتك كلها يارب وتكون ايامك الجيه احسن ديما يارب
ادعيلى انا با اخلص ومظنش انى هندم او هحن فى يوم من الايام لى ايام الجامعه

نبض القلب said...

ايام جميله ودايما كده الحاجه الجميله مش بنحس بيها الا بعد لما تعدى وتخلص
اصل الانسان مش بيحس بقيمه الشئ الجميل الا لما يضيع منه

elkamhawi said...

عندى سوال محيرنى قوى انتى ازاى بتحبى البلد دى

علاء said...

فعلا كانت اجمل ايام حياتي
يوم التخرج بقين باحضن كل أخ من إخواني و أنا هاكسر عضمه :)
من كتر ما انا حاسس اني هافارقه

- هافارق دفعتي اللي باجري انا و هم
كل يوم الكلية بالطول و العرض ورا السكاشن

- هافارق اخواني اللي عشت معاهم انطلاقي الشباب و الصحوة الشبابية الاخوانية اللي بجد مش سهل انها تتكرر تاني

- هافارق قعدات المذاكرة اللي مكنش لها اي علاقة بالمذاكرة :)
و كانت كلها ضحك و هزار


- و حتى الاخوات اللي دايما كانوا عاملينلنا مشاكل ( من غير ضرب لو سمحتوا ) في الكلية مع الحرس و كل يوم نتخانق مع واحد من الحرس عشان بيرخم على أخت من الأخوات

- هافارق المدرج اللي شهد ساعات نوم طويلة .. أقصد محاضرات طويلة

بس الحمد لله أديني اتخرجت و بقيت مهندس قد الدنيا
بس مش لاقي شغل ههههههههه

ادعولي :)لان عندي مقابلة بالليل

واحدة بتحب البلد دي said...

محمد العنانى said...
ربنا يعزك ويكرمك
جزاك الله خيرا عالتاج
جاري الرد عليه يافندم

Anonymous ...
جزاكم الله خيرا عالدعاء
اما بقي بخصوص ان حضرتك حتخلص ومتنظنش انك حتحن لايام الجامعه
ما اعتقدش
تقريبا كلنا كنا بنقول الكلام ده
لغاية ما تيجي لحظة نقف فيها ادام نفسنا ونكتشف ان حياة كاملة بنودعها بحلوها ومرها
ساعتها ومن غير ما نحس بنلاقي نفسنا بنحن لها من قبل حتي ما نسيبها


نبض القلب ...
فعلا مش بنحس بيها غير لما تعدي وساعتها نكتشف انها خلاص راحت وعدت ومش راجعة تاني
ربنا يرزق الجميع ايام جميلة في طاعته

واحدة بتحب البلد دي said...

elkamhawi ...
سؤال حضرتك وجيه ومهم وضروري وحتمي
ليه باحب البلد دي
ده كان تاني بوست ليا
بعنوان ليه باحبها؟؟؟
http://freedoooom.blogspot.com/2007/02/blog-post.html
اتمني يعجب حضرتك


علاء ...

طب الحمد لله مش بتوع صيدلة بس اللي بيجروا في الكلية من سكشن لسكشن ومن مبني لمبني
والحمد لله برضة مش مدرجات صيدلة بس اللي بيتنام فيها ..مدرجات هندسة كمان
الكليات كلها ما شاء الله نسخة طبق الاصل من بعض
الحمد لله ..انا كده اطمنت علي مستقبل التعليم في مصر


وبعدين بقي الاخوات بيعملوا مشاكل لا سمح الله
اطلااااااقا
ابسلوتلي

جزاكم الله خيرا علي المرور
وان شاء الله المقابلة تعدي علي خير

ابوزياد الفاتح said...

انا عملت مدونه يا اخت مروه
اسمها
www.islamnaaa.blogspot.com
ادخلى عليها وقولى تعليقاتك ورايك فيها
شكرا

Anonymous said...

shosho said...
وحشاااني جدايا موورة
كان في اغنية زمان مش زمان اوي كانت بتقول
الاييام الحلوة..بتعدي في ثوااني..
الايام الحلوة ما بترجعش تاني..
ياااه يابنتي فعلا الايام الحلوة بتعدي بسرعة جدا.بس الحمدلله اننا بنفضل نفتكرها بكل ما تحمل من ذكريات واشخاص
(فكرتيني بالذي مضى ودايما كدة مقلبة علي المواجع)
بس برضه بحب مدونتك واكيدبحب صاحبتها طبعا
ماتقلقيش هتفضلي تروحي الكليةكتير لمدة سنة او اكتر كمان بس المرة دي كضيفة يعني مش هينفع تدخلي سكشن وتجيبي ورق تاني.. و كل ماتعدي على مكان هتستعيدي ذكرياتك في هذا المكان ..المهم اننا مانبقاش من الذكريات وتفضلي فاكرانا على طول..
(اسفة لاني واضح اني زودتهاشويتين)
بس زي مابيقولو اسال مجرب
shosho

الحياه حلوه يلا نعشها بجد said...

هههههههههههههاى حلو اوى الموضوعيا امر

dOdO said...

اهلا بيكم انا جديد هنا
ادهم محمد اداب المنصوره سنه 2

بجد انا من كتر حبى ف اصحابى وزملائى بقيت بفكر فى اليوم ده من سنه اولى وبكنت بتمنى ميجيش ولكن هيهات هيهات اليوم ده جاى جاى

من كتر حبى ليهم قلت يا ريتنى ما عرفتهم انا عمرى ما حبيت حد كدا نهائى وكتيير عينيا بتدمع لما بفتكر اليوم ده او ابص ف صور الرحلات

وكل اللى بحاول اعمله انى مزعلش من حد ومزعلش حد منى عشان يفتكرونى ونفتكر بعض بالخير ان شاء الله

بوست ممتاااااااااااااااز

adhammahamed@yahoo.com