Thursday, July 5, 2007

ايام متتنسيش

راجعة من حفل استقبال نقابة االصيادلة لدفعة 2007 عمالة بافكر في ايام مرت وايام جاية

مرت ايام الجامعة خلاص ..وتحولت الي صفحات تضاف لدفتر الذكريات

ايام فيها خليط غريب مختلف من الذكريات ....لكن الشئ المشترك بينها انها كلها

ايام متتنسيش


اينعم كل عمر وله جماله ..

لكن بتفضل سنين الجامعة ليها طعم تاني مختلف

ليها طعم الانطلاق........ طعم البراءة..... طعم احلامنا اللي لسه بتحبي ومستنية لما تكبر وتقدر تمشي..

طعم الامل في بكرة يكون اجمل واروع واحلى من النهاردة
طعم مش ممكن يتنسي

حقيقي ايام متتنسيش
بحلوها ومرها...
بحزنها وفرحها ...
بضحكها وبكاها...
بكل ما فيها ..
مش بس ايامها ولا ساعتها ..لأ كمان بلحظاتها
لما باحاول افتكرها بالاقي نفسي بافتكر لحظات كان الضحك فيها هو اللي غالب ...

صحيح مش كل اللحظات دي فاكرينها وساعات بتفلت من ايدينا لكن بنحاول نحتفظ بيها جوانا لأكبر وقت ممكن

او بافتكر لحظات اكتئاب وللاخنقة من المذاكرة لكن بتفضل ذكريات الكتب والملازم والمحاضرات أول حاجة تشتاقلها بعد التخرج
او لحظات مذاكرة بالليل لوحدي مفيش معايا غير أكوام ورق وكبايات الشاي والقهوة من غير ما احس ان اخر الليل وصل غير في اليوم التاني لما ألاقي نفسي نعسانة في المحاضرة
ومش هانسى لحظات الجوع القاتل اللي استنينا عشانها المحاضرة الخامسة علي التوالي امتي تخلص
(قبل ما احنا نفسنا ما نخلص (بفتح الام

ده غير لحظات القلق والتوتر وأنا مستنية ورقة الامتحان توصل ولساني بيدعي ان كل اللي حاسه أنه اتمسح من ذهني يبقي لسه موجود
وللا رحلة مع صحابي نمت أحلم بيها او بمعني اصح معرفتش أنام من كتر ما بفكر فيها

ولحظات كنت بادعي انا وصحابي ان ميكونش في مكان في الكليه الا ويشهدلنا......

ايام كنت خايفه أحسن تعدي من بين ايديه من غير فايده لانها فعلا تستحق اني استفيد منها واحتفظ منها باجمل الذكريات واروع القيم

من الاخر كده أيام كنت باحس فيها اني ماسكة الدنيا كلها في ايدية
مفيش مكان للهم والخوف ..ومنعرفش كلمة مستحيل
بافتكر اخر يوم في الكلية وانا باودعها....

وانا بامشي في ساحاتها..

وباطلع سلالمها..

وادخل المدرجات والمعامل..

ابص لوشوش الناس ..وللاماكن اللي جمعت الوشوش دي مع بعضها لمده كام سنه متتاليه

واقعد افكر اني بعد ما اتعودت اشوف نفس المناظر وامشي في نفس الاماكن واقابل نفس الاشخاص.........مع التخرج كل ده بيتغير

...نستقبل دنيا جديدة

....غريبة

...مجهولة تفاصيلها بالنسبة لنا

جايز جوانا خوف وقلق ...لكن برضه بيملأنا الامل والتفاؤل ان بكرة ان شاء الله جايلنا بايام حتكون في جمال وروعة الايام اللي سبقته
ونيجي بعد 20 سنة نقول علي الايام دي برضة

كانت ايام متتنسيش









لتحميل الاغنية افعص هنا بس بشويش

ـــــــــــــــــــــــــــــــــــــــــــــــــ

اعلان هاااااااااااااااااااااااااااام

اخييييييييييرا دخلت عالم التدوين

صديقة الطفولة والشباب ( والشيخوخة ان شاء الله كمان...قولوا يارب ) ...شيماء

شيماء ..حقيقي مدونتك عاجباني...موضوعاتها الاولي بتقول انها ان شاء الله هتكون مدونة متميزة

زوروا مدونتها (شقاوة شعب ) وقولوا رايكم

ـــــــــــــــــــــــــــــــــــــــــــ

ملحوظة صغيرة ...في تاج اتبعتلي من فترة تقريبا من اربع مدونات..اعتذرلهم عن التاخير في الرد ان شاء الله البوست الجاي ارد عليه

39 comments:

علاء said...

كانت أبام من غير مسئولية
أو بمعنى أدق
مسئولياتنا كانت بتكون على مزاجنا
عايزين نعمل كذا
نقوم نهتم و نعمل
و نشتغل بس بمزاجنا

انما طالعين على حباة هتفرض علينا حاجات كتير
و شغل ربما نكون مش بنحبه
و مسئوليات ربما تكون اكبر مننا
بس لازم نواجهها
و منهربش منها

يمكن هو ده سبب خوفنا
الجامعة ايام النشاط و الانطلاق بعد حبسة سنين التعليم المدرسي
تكوين الفكر و الثقافة
الحركة بكل معانيها

الثورة و التمرد
حاجات كانت اول مرة تحصلنا
و هتنتهي بعد سنين بسيطة
و مش هترجع تاني
بتيجي مرة واحدة في العمر

عموما مبروك على التخرج و ربنا يوفقك و يحميكي

امام الجيل said...

الحمد لله ايام وعدت
بس الايام الجاية محتلفة اكيد تقريبا بعد الجامعة الواحد بدا يخش فى الحياة بجد لانه كان قبل كده اماله وطموحاته وافكاره كلها انه ينجح ويتفوق بس بعد كده هيخش لمعترك الحياة رحلة البحث عن عمل ومعاملة الناس بجد والاندماج مهم ليل نهار دنيا تانية خالص فعلا ايام الجامعة ايام براءة وممكن نقول طفولة مقارنة بما بعد ذلك لسه بقى الحياة والناس هيبانوا على حقيقتهم بالتوفيق يا رب

شقاوة شعب said...

ايام الجامعة احلى ايام العمر واللى ماعاشهاش صح عمره ما هيشوف زيها
وهى رصيدك للى جاى لان الجاى فوق الوصف والخيال
هتشيلى مسؤلية نفسك وهتعافرى فى الدنيا لوحدك وهتشوفى شخصيات ومواقف فى حياتك العملية لم تكونى تتخيلى وجودها
وهتبقى ذكريات الجامعة تهون عليكى وتعيشى معاها لحظات جميلة فى وسط زحمة الحياة
ربنا معاكى يا ميرة يوفقك فى اللى جاى ويحققلك كل امنياتك

الحلم العربي said...

الجاي أجمل إن شاء الله
كل عمر و له جماله و كل مرحلة ليها ذكريات حلوة
حسيت بكلامك اوي لأنه كان مسسبلة أزمة بعد الكلية ما عرفتش اطلع منها غير بأن الجاي إن شاء الله أحسن بكتير

ربنا يوفقك في حياتك القادمة و ينفع بيكي الأمة و بكل اللى اتعلمتيه في الكلية

و ربنا يجمل أيامك كلها
تحياتي

ولــــــــــو said...

زي ما المهندس علاء قال حلاوة ايام الجامعه انها بلامسئوليه كل اللي عليا اذاكر وحتى ده كان ف اوقات موسميه كان فيه دايما حد مسئول عنك
فكرتيني بأيام كنت باتمنى انها تخلص ولما خلصت ندمت انها مااستمرتش لاخر العمر
بس الحياه العمليه دي مرحله اثبات الذات بس تفضل ايام الكليه الافضل بلا منازع

Anonymous said...

ياه يا أختنا
ذكريتنا بالأيام الحلوة
أيام الدلع والهنا
أيام عدم المسؤولية في جانب من الحياة
حتى لما كنا شايفين الدنيا بمنظور البيئة اللي عايشين فيها
مش الوحوش اللي برة أسوار الجامعة
نكتشف بعد ما انتهت الجامعة
اننا كنا غلطانين لما كنا نتمنى نتخرج
كان هبل فعلا وعدم وعي للي ينتظرنا برة
هو مش هروب أو انهزام
لكن في الغالب حتى الناس اللي عشنا معهم أيام الجامعة
مش هم الناس اللي بنعيش معهم برة الجامعة
كأن كل فترة لها طريقة في التعامل

مذكرات طالب إخوانى said...

عارفة ليه أيام جميلة علشان فيها كل حاجة نفسك فيها ويارب تكون لدخولنا الجنة سببا

mo'men mohamed said...

انت عارفه اختى انا داخل تانية بيطرى يعنى مباقليش غير سنه بس فى الكلية
بس انت عارفة معنديش مانع إن أيام الغضب والحزن والزنقة فى المذاكرة ترجع تانى بس بشرط انى أفضل جانب الناس اللى بحبهم و اللى بعزهم و اللى فرحهم يفرحنى و بكاهم يقتلنى وابتسامتهم تحيينى ونظرات الرضا لى منهم تطيرنى فى السما من شدة نشوتى ولو حصل وحسيت ان زعلهم ده منى أبكى من جوايا و أصرخ و أبقى عايز أجرى عليهم و أقولهم سامحونى
بس للأسف فى حاجات كتير تمنعنى من أنى أعمل كده
السلام عليكم

هاني جابر said...

بداية الف مبروك علي التخرج
وان شاء الله ربنا يوفقك في الحياة المقبلة هي فعلا حياة تانيه مختلفه خالص عن الجامعه فيها مسئوليات وهموم ولكنها مع ذلك جميلة
ولكن طبعا ايام الجامعة لا تنسي
لانها فعلا عز الشباب وانطلاقه
وياريت كلنا نستغلها كويس
لا تنسينا من دعائك

ياسر مدني ...دينامو الإخوان said...

مبروووووووووووووووك
عليكي ركنه العواطليه..أصدي ركنه الخريجين....أصدي التخرج يا ستي

اصرار أمل said...

بارك الله لك فى وقتك ...
أنت الآن على أعتاب المستقبل ؛ وبيدك كل الامكانيات ؛ ذكريات تؤهلك لمستقبل مشرق باذن الله ؛
وطموح يعلو فوق هام السحب _ باذن الله _
اذا انطلقى ؛؛
حققى كل ماحلمتى به ؛
لا تدعى يوما يمر عليك دون أن تحاولى تحقيق جزءا من حلمك ..
لأن هذا هو مايتبقى ...
دعواتى لك بالتوفيق ياغالية ...
وباركك الله .........

واحدة بتحب البلد دي said...

علاء ...
ايام بتيجي مرة واحدة ومش بترجع تاني
وبنفضل نحن لها طول العمر


امام الجيل ...
ايام الجامعة كانت طفولة مقارنة باللي بعدها
!!!!!!!!
والناس هيبانوا علي حقيقتهم
!!!!
لا طمنتني

واحدة بتحب البلد دي said...

شقاوة شعب ...
شيمو
منورة المدونة يا قمر
في ايه يا بنتي
انتوا بتخوفوني كده ليه
ذكريات الجامعة هتهون عليا
!!!!!!!!
هو في ضرب بعد كده وللا ايه
لا متخوفونيش


الحلم العربي ...
الجاي أجمل إن شاء الله
ايوة كده
ارفعي من روحي المعنوية
اللي جاي اجمل واروع واحلي ان شاء الله
مختلف اه
لكنه ان شاء الله اجمل واحلي

منوراني كالعادة
تعليقك جميل زيك
ربنا يكرمك وشكرا علي دعائك

واحدة بتحب البلد دي said...

ولــــــــــو ...
للاسف مينفعش تستمر لاخر العمر
كلنا بنتمني لو ينفع
لكنها للاسف امنيات مستحيلة



بهاء ...
احم احم
الوحوش اللي برة اسوار الجامعة
!!!!!!!!!!!!!
هما اللي بيتخرجوا بيحصلهم ايه يا جماعة
وايه بالظبط اللي بينتظرهم
ومين الوحوش
انتوا خليتوا الدنيا عندي كحلي كده ليه
غمقتوها خالص

واحدة بتحب البلد دي said...

مذكرات طالب إخوانى ...
اللهم اميييييين
يارب اجعل كل خطوة لينا فيها في ميزان حسناتنا

mo'men mohamed ...
اكتر حاجة مش متخيلاها في الفترة اللي جاية هيه فراق اللي عرفتهم في الجامعة وعشت معاهم وقضيت وقتي وسطهم
هل خلاص ايامنا مع بعض بنودعها
وبعد ما كنا كل يوم مع بعض
دلوقتي لو اتقابلنا من جديد هتكون علي فترات بعيدة
ده اذا قدر واتقابلنا
ربنا يجمعني بيهم علي خير
ويجمع حضرتك باخوانك دايما علي خير

واحدة بتحب البلد دي said...

هاني جابر ...
الله يبارك في حضرتك
ايام علي اد جمالها وانطلاقها
علي اد ما هي ممكن تسرقنا وتعدي ما بين ايدينا من غير ما نستغلها صح
ربنا يتقبلها مننا ومن الجميع
ويرزقنا واياكم ايام كثيرة في طاعته



ياسر مدني ...دينامو الإخوان ...
مبروك عليا ركنة العواطلية
....
ماشي يا ياسر
...
مقبولة منك

واحدة بتحب البلد دي said...

اصرار أمل ...
امولة وصلت يا جدعان
هييييييييييه
عاش من شافك يا بنتي

ربنا يكرمك يا امل عالتشجيع ده
كلماتك فعلا مشجعة
وتعليقك حقيقي جميل

متغيبيش عننا كتير يا ستي
ولو الامتحانات هتاخدك مننا كده من بكرة اطلع مظاهرة ضد امتحانات

دمتي مشجعة لمن حولك

عيلة و عايزة افهم said...

ياااااااااااااااه يا مروة

فكرتيني بأيام ثانوية عامة لما كنت مش مصدقة ازاي حاسيب المدرسة و صاحباتي و المدرسين

إنما الحقيقة دلوقتي انا متطمنة شوية
اللي بيدخل كليتنا دي مش بتفرط فيه بسهولة :D

مستنية البوست الجاي

صاحب البوابــة said...

ذكريات جميلة

ستظل في ذاكرتك الى ماشاء الله

:)

تحياتي اختاة

امام الجيل said...

القبض على معتز منفى والجيزاوى بحبك يا مصر
تم إلقاء القبض صباحا على كل من المدون معتز عادل صاحب مدونة منفى
وأحمد الجيزاوى صاحب مدونة بحبك يا مصر
وذلك إثناء ذيابهم إلى الهايكستب بطرق مصر إسماعيلية الصحراوى للتضامن مع المحالين عسكريا
monzer they catch me in my way to cairoi donot know were they will take me nawtell all of them to take care and iam with u in modawn7"anafrom mo3takal
وما ألمنى اكثر ولم اقرأه إلا عند كتابة هذه الرسالة هي كلمته الأخيرة
donot forget me

وكانت رسالة أحمد الجيزاوى كالآتي
رسالة للجميع
أنا فى المترو واتقبض عليا خلى بالكم وتروحوا لوحدكم كانت رسالة معتز الساعة السابعة تقريبا، أما رسالة أحمد فبعديها بنصف ساعة تقريبا والامر بين يدي الله جميعا، وحسبى الله ونعم الوكيل
والسلام عليكم ورحمة الله وبركاته ...أخوكم منذر
نقلا من مدونة حين البأس...لاخويا منذر

Anonymous said...

مروة
انتي لو كنتي سألتي كنت قلتلك خليكي في الجامعة
أيام ما كنا نقول متى نخلص
كانوا الناس يقلولنا خليكم قد ما تقدروا حياة الجامعة ما بتتعوض
واننا راح نتمنى أيام الجامعة ترجع
بس كنا نقول نخلص ونرتاح من الهم وعمرنا ما نتمنى ترجع
بس اليوم
يا ريت لو لو كنت لسة طالب

يلا بنرفع معنوياتك

المواطن المطحون said...
This comment has been removed by the author.
المواطن المطحون said...
This comment has been removed by the author.
المواطن المطحون said...

بعد اذنك يامروه

انا كنت عايز اشوف رايكم
في اللي حصل معايا اناواصاحابي في جامعه الاسكندريه

عيزينها تبقي خضرا

طال الليل said...

السلام عليكم
الأخت الكريمة والله رجعتينا لأيام الكلية والماضى السحيق يللا ماشى الحال وأهلا بك زميلة فى دنيا الصيدلة المهنة التى هضم حقها عمدا- يعنى جات عليها-ولك منى تحية على مدونتك الراقيىة التى تبعث الأمل فى الصدور دخلت المدونة مرات وخايف أدمن
ومتعرفيش تعالجينى ولا حتى بنالوكسون
على فكرة كنت بحب الفارما جدا وكنت بحب الدراسة وبالرغم إنى مكنتش إخوان بس كان الكل من إخوانى وسلفى حبايبى وبصراحة هم الأمة محتاج التجميع وليس التشرذم واشهد شهادة حق إن معظم من إلتقيت من أبناء الدعوة الإسلامية شرفاء ومجتهدون خاصة الإخوان وللإخوان فى رقبتى دين كبير ما أوفيه ولو عشت أحاول خدمتهم العمر كله وقصدى بذلك معرفتى بمعانى كتاب الله من خلال الظلال للشهيد المغفور له بإذن الله سيد قطب

علاء said...

ده موضوع التجمع ياريت أعرف رأيك

المدوّن خانة

مش هنسى....... حسين رضا said...

حلمالحرية جزاكى الله خيرا مررتى بنا على لحظات لن تنسى من الذاكة جمعت كل المعانى الفاضة الخير العمل الحب الود الحرية الانطلاق اللا مستحيل الحلم يتحقق و........ويارب يبارك لك فى الايام الجاية

belal said...

هوا مافيش تحديث ليه ..التدوينة
كده قدمت أوي.أي نعم جميلة أوي.بس أنا قربت أحفظها ..
.....

حزيــــــــــــــــــن said...

مبرووك التخرج وربنا يوفقك ويحقق احلامك

ابو مفراح said...

اولا الف مبروك على التخرج
افتكرى تلك الايام اختنا فهى لن تأتى ابدا
الواقع مؤلم صراحه و لكن بشىء من الصبر سترين النجاح

dead man said...

عارفة.. لما كنت في الجمعة كنت بحاول اخلى صداقاتى في الاتجاه اللى يكمل بعد التخرج..

كنت فاكر ان الحياة ممكن تمشي كده.. مش عايز احبط .. بس تخيلي كام بني ادم من ايام الجامعة لسه اصحاب لحد دلوقتي

امام الجيل said...

يدعوكم موقع مدون خانه (تحت الانشاء)الى الاجتماع من اجل الاتفاق على الخطوات النهائيه لنشاء مجمع المدونين (مدون خانه)وذلك يوم السبت القادم الموافق 28 / 7 / 2007 وذلك الساعه 6 مساء يوم السبت فى مركز العربى للدرسات العنوان 23 شارع باهر زغلول من شارع المنيل

حلم واحدة بتحب البلد دي said...

عيلة و عايزة افهم ...
مع كل مرحلة في حياتنا بنسيبها ونتنقل للمرحلة اللي بعدها بنقول لنفسنا نفس الجملة
اعتقد كمان كام سنة - يحيينا ويحيكي المولي اصل سنواتكم مش زي سنواتنا
هابقي اتفرج عليكي وانتي بتتخرجي وزعلانة انك هتسيبي الكلية


صاحب البوابــة...
ان شاء الله تظل هذه الايام في الذاكرة وتضاف اليها ايام اخري في مثل جمالها تضاف ايضا للذاكرة

حلم واحدة بتحب البلد دي said...

بهاء ...
احم احم
كده بترفعوا من معنوياتنا
!!!!!!!!!!!!!!!!!!!جااااااااااااايز برضة


المواطن المطحون ...
ان ساء الله نتابع ونقول راينا

حلم واحدة بتحب البلد دي said...

طال الليل...
من ناحية حق المهنة المهضوم
فهو مهضوم مهضوم مهضووووووووم
مجتش عليها يعني
بخصوص الادمان...جزاكم الله خيرا ...متهيالي ده الادمان الوحيد اللي مش هاصرفله علاج
علي العكس يا رب يستمر
شكرا علي الكلمات المشجعه دي
ويارب يجمعك بكل من تحب ايا كانت توجهاتهم علي خير دايما


علاء ...
متابعين الموضوع يافندم لحظة بلحظة

حلم واحدة بتحب البلد دي said...

مش هنسى....... حسين رضا ...
اللهم اميييييييييييييين
حقيقي بادعي تكون الايام الجاية فيها نفس المعاني اللي كانت موجودة في الايام اللي فاتت


belal ...
احم
غياب خارج عن ارادتي ندعو الا يتكرر
وكويس يعني الغياب كان له فايدة...عشان الناس تحفظ كويس


حزيــــــــــــــــــن ...
اميييييييين

حلم واحدة بتحب البلد دي said...

ابو مفراح ...
واقع مؤلم ويحتاج صبر
اللهم ارزقنا الصبر والتوفيق



dead man ...
مش عارفة ليه معظم التعليقات ماشية في سكة الاحباط
هل فعلا الحياة مش بتمشي كده؟؟؟
وللا نقدر نخليها تمشي كده لو احسنا الاختيار
؟؟؟
سعيدة بمرور حضرتك كالعادة
المدونة منورة

أخ جامعة said...

باتنبألك بمستقبل غير اعتيادي

بالمناسبة ..
ليكي تاج تاني عندي .. ابقى خديه

Anonymous said...

السلام عليكم ورحمة الله وبركاته
فعلا موضوع مهم جدا وله ذكريات رهيبه محدش يقدر يتصورها غير اللى مر بيها وللاسف دى كانت ايام عمرها ما تتعوض بكل معانيها وبكل المهما وافراحها ولكن يبقى دورنا بره مستنينا زى ما كنا بنعمل جوه يااااااااه ذكريات ذكريات