Friday, June 8, 2007

انا واخويا الكبير ...لقطات في شريط الذكريات

اتفقت معاك بعد ما قريت موضوعك الاخير وعجبني جدا ... اني حانزل لينك لموضوعك عالمدونة عندي في نهاية موضوعي الجاي
وكنت ناوية اعمل كده وكان في مواضيع جاهزة عندي عالدرافت كنت حانزل واحد وفي اخره اسيب اللينك
معرفش ايه اللي خلاني اغير رايي
لكن في نهاية الامر لقيتني بافتح صفحة جديدة وباكتب بوست جديد

انا واخويا ..خواطر وذكريات


ابدا بايه ؟؟ابدا بايه
ابدا بطفولة مشتركة كنا فيها في نفس المدرسة... وللا ابدا افكار واراء متقاربة ...وللا ابدا بانتماء واحد للاخوان ...وللا ابدا بحاجات اتعلمتها منك ..
اللقطات كتير في شريط الذكريات
اقولك الاسهل ابدا باللي افتكره



اللقطة الاولي في شريط الذكريات

طفولة قضيناها مع بعض في نفس المدرسة<<مدرسة المدينة المنورة >> تقريبا كنا واخدين فيها مؤبد
ابتدائي واعدادي وانت كملت ثانوي ...لكن انا للاسف طلعت في نص المدة لان مفيش ثانوي بنات
افتكرت الاذاعة اللي كنا مسيطرين عليها كل واحد فينا في فصله ولما كنا بنيجي نجرب مقدمة الاذاعة ادام بعض في البيت ...وحفلة اخر السنة اللي غالبا كنت اطلع انا فيها وانت لا ...معلش بقي مش اي حد ...الرك عالشخصية( بهزر (بهزر ..اوعي تضرب
افتكرت سيارة المدرسة واحنا مستنينها مع بعض ادام البيت...افتكرت لما في فترة لغينا الاشتراك وكنت باروح معاك لما كنت بتلطعني لحد ما تخلص الماتش مع صحابك ...يعني اتلطع انا في الشمس وانت تلعب
اقول ايه بس .....انه حقا مجتمع ذكوري متسلط)
استني لما اروح انادي بتوع حقوق المراة ...قلنا بهزر
(من غير ضرب


اللقطة الثانية

لما كنا في اعدادي وفي ثانوي وكنا نقعد نفكر يا تري عازين نطلع ايه لما نكبر دكاترة ومهندسين وكلام من ده
كانت دايما اجابتك هي الاغرب
كنت عايز تطلع زعيم
نقولك رئيس او وزير
ترد تقول لا زعيم
الزعماء بيعيشوا في وجدان الشعوب وياثروا فيهم لكن الرؤساء لا
اقول ايه بس...كنت فاهم سياسة من يومك

اللقطة التالتة

حلمك انك تدخل اعلام او اقتصاد وعلوم سياسية لانك بتحب القراية وبتعشق السياسة من وانت صغير
وانتهي الحلم بدراسة حاسبات ومعلومات
بس حلم الصحافة فضل جواك ...كتاباتك بتقول كده
لما باقرالك اي حاجة باقتنع بانك كان لازم تدرس صحافة
انا عارفة انك بتفكر تدرس اعلام بعد حاسبات
عايز نصيحتي
نفذ اللي بتفكر فيه وادرس اعلام ...انت بتحب المجال ده فعلا وانا واثقة انك حتنجح فيه


اللقطة الرابعة

لما اكون سهرانة باذاكر وتكون انت اخر واحد ينام في البيت واشوفك قبل ما تدخل تروح عند عمر واسامة وتغطيهم كويس وتطمن عليهم...المشهد ده لما اشوفه من ماما عادي لكن منك انت كنت باقف ادامه كتير

اللقطة الخامسة

لما كان حد فينا يكون تعبان تعب بسيط وتلاقيه عامل دوشة وهاتولي ادوية وودوني للدكتور كنت دايما تقول ليه بتعملوا دوشة ..ليه الشعب كله لازم يعرف ان عندك مغص بسيط وللا سنانك واجعك... وابسط حل عندك بتقدمه خد مسكن واسكت
في الاول كان بيضايقني اوي الموقف ده لغاية ما فهمت ازاي وليه
فهمت لما كنت باشوفك باين علي وشك وفي عينيك انك في مشكلة لكن محدش فينا يعرف بيها غير بعد ما تعدي
فهمت ازاي اقابل الناس بابتسامة مهما كان اللي جوايا من الم او مشكلة
فهمت ان الناس ملهاش ذنب في مشاكلنا والامنا
فهمت واتعلمت ده


اللقطة السادسة

بعد يوم سفر متعب للقاهرة
وانت راجع من عشرينات تقعد تحكيلنا يومك قضيته ازاي
اد ايه بتحب الموقع ده والمكان ده والفريق ده
مصعب وهواري ومني ومروة ودعاء
كل مرة بتحكيلنا عنهم كنت بتشوقنا اننا نقابلهم حقيقي نفسي اقابلهم خاصة مني ...
المرة الجاية لما تسافر ابقي خدني معاك
مستنياني هناك عزومة من مني وعزومة من مروة ..بلاش تضيع العزومتين عليا
انا عارفاك ممكن تطمع في السندويتشات واروح انا في الرجلين
اي حركة ندالة ممكن اتصل بمني تقابلني علي محطة القطر واسافر لوحدي ...العزومة تستاهل يابني


اللقطة السابعة

لما كنت بتكلمني علي ( ملكة اليمن السعيد ) وعينيك بتلمع وانت بتتكلم... تعرف يا محمد باقعد كتير افكر في المعضلة اللي انا وانت عارفينها
وكلام استاذ ( م. أ) لما انت حكتله الموضوع ..ان كتير من خيوط الحل في ايديا انا وسمية كلامك عن المستقبل وحلمك واللي نفسك فيه
وولادك اللي حتطلعهم عباقرة ولما كنت اقولك طب لو مطلعوش عباقرة ....
ازاي كنت بتضحك ساعتها وتقولي يبقي العيب منها ولادي انا لازم يكونوا عباقرة
علي فكرة يا محمد ومن غير ما تحس بنفسك ولا تتنفخ يعني ....كلامك عن طريقة التربية اللي حتمشيها مع ولادك لو نفذته اكيد حيكونوا عباقرة



اللقطة التامنة

خلافنا الدائم علي نزولي الكتير ...واعتراضك علي خروجي الكتير من لقاء.. لدورة.. لمؤتمر.. لندوة...وكلمتك المفضلة محدش في المستقبل حيرضي يا بنتي انك تسيبي بيتك وتنزلي بالطريقة دي
(شكرا علي جرعة الاحباط يا عم)
المشكلة اني عارفة انك عندك حق... تعرف يا محمد كتير بافكر في كلامك ده وياما وانا باكتب جدول لتنظيم الوقت كان كلامك بيرن في وداني وكنت باحاول اقلل عدد الساعات اللي انزل فيها علي اد ما اقدر...
لكن جايز علشان عارفة اني مش حاعرف اعمل كده في المستقبل باحاول استغل الفترة دي علي اد ما اقدر



اللقطة التاسعة

حوارنا ونقاشنا المستمر علي شغلنا مع الاخوان ...
(ولما نقعد نتفزلك ونقارن بين شغل الجامعة (اللي انا فيه ) وشغل المنطفة ( بتاعك
واختلافنا المستمر ما بين قناعتي ان المستوي التربوي للافراد قل بدرجة ملحوظة وده موضوع خطير لازم يستوقفنا قبل اي شئ تاني
ورايك ان ده ضريبة في ظل الانفتاح وتزايد الاعداد واننا لازم نتقبل ده ونتعامل معاه


اللقطة العاشرة

لقطة مش ممكن تتنسي
لحظات اعتقالك ..ايام اعتصامات القضاة
تعرف يا محمد ايامها واحدة صاحبتي اتصلت بيا ولما عرفت قعدت تعيط وتقولي هما ليه بيعملوا فينا كده
قعدت اهديها واقولها اني مش زعلانة
سالتني انا اقصد ايه وازاي مش زعلانة
قلتلها محمد راح ياخد شهادة الجودة وجاي ....
يومها ماما قالتلي ازاي بتقولي كده وكانك مش هامك
بس انا فعلا مكنتش زعلانة
لاني كنت مقتنعة يا محمد انك كنت محتاج الفترة دي
واكتشفت بعدها لما قريت ورقة كنت كاتبها هناك وكنت ناوي تبعتهالنا انك ازاي كنت محتاج الفترة دي وانك قبلها كنت بتدعي ان ربنا يرزقك عمرة او اعتقال
واد ايه انت استفدت في الفترة دي


اللقطة الحداشر

دي ما افتكرتهاش لانها لسه محصلتش
لقطة باتمني اشوفها بعد عشرين سنة
انت وملكة اليمن السعيد وولادكم
وماما وبابا
وانا وسمية واسامة وعمر وولادنا
كلنا متجمعين مع بعض عندك في بيتك بمناسبة الترقية الجديدة
قاعدين مع بعض نفتكر ايام قضيناها وذكريات جمعتنا واحلام عشناها مع بعض واحنا صغيرين



اللقطة الاتناشر

ودي برضة ما افتكرتهاش لانها برضة لسه ما حصلتش
اللقطة دي بقي احلي لقطة
اكون قاعدة بافتكر الايام دي وييجي في بالي اني عايزة اشوفك وف لحظة تكون ادامي
عارف الكلام ده فين وامتي
ان شاء الله في الجنة
ربنا يجمعنا احنا وباقي اهلنا واحبائنا في جنته




قبل ما انهي موضوعي حبيت اقولك

شكرا علي حاجات كتير مقلتهاش ومكتبتهاش


51 comments:

marwa salah said...

بجد بجد ربنا يخليكم لبعض، أجمل حاجة فى ذكريات الاخوات انك تحس رغم ان احداثها جميلة اوى بس بتفكرك بمغامرات تم وجيرى.

وبعدين استغربت اوى انه بينتقد انك بتخرجى كتير كنت بقول يمكن عشان اخويا انا مش من الاخوان لكن واضح يا بنتى ان كلهم كدا، يلا اخواتنا ومضطرين نستحملهم.

عاوزة اقولك انى مستنيااااااااااك فى مصر وعزومتك فى الحفظ والصون ومحدش هياكل ساندوتشاتك وانا موجودة، انتى بس انوى انك تيجى وكلمينى وهستناك على محطة القطر انا ومنى.

مروة - عشرينات

Ahmed Shokeir said...

عادة مايتذكر الإنسان في ذكرياته

الوالد او الوالدة أو الصديق او الحبيب

إنما تكون الذكريات مع الأخ نادرا مانراها

تحياتي واسمحيلي أعنونه عندي في

Post of the day

ابوزياد الفاتح said...

موضوع جميل فعلا
بس الذ1كريات مع الاخوه صعبه شويه بالنسبه لى
بتبقى ذكريات مؤلمه جدا
يمكن حالتك تختلف علشان انتم الاتنين اخوان
غير حالتى انا لاء لاء
ربنا يكرمكم يارب
ياريت تزورى مدونتى
السلام عليكم

allfollowsome said...

بوست كويس جدا
وثانيا واضح انه انسان متفهم جدا

وصراحة مستغرب جدا من دعوة يارب عمرة او اعتقال
!!!!!!
تحياتى

محمد عـنـانـى said...

تقريبا هيعتقلوكى قريب اوى
انا عارف الى بيكتب خواطر هو بيحبها بيكون مسافر كندا
لما اشوف اخوكى عايز كمان تروحى لحقوق المراء
مجتمع ستات واخدا حقها وحق اتنين تلاته
هههههههههههههه
تحياتى

الحلم العربي said...

طبعا دفعني الفضول اعرف مين أخوكي و لما دخلت مدونته عرفته
محمد السيد اللى بينهي كل تعليقاته في عشرينات ب
مش حاسكت

ربنا يخليكوا ليعض و تفضل نظراتكوا لبعض دايما احترام و حب متبادل ...مش كل العائلات فيها كده و ده أكيد من التربية السليمة

ربنا يوفقكوا يارب في حياتكوا
تحياتي

Anonymous said...

ذكريات جميلة
وأسلوب جميل في الكتابة
الله يحفظكم لبعضكم
ويديم بينكم الحب والود
اللي مش موجود بين كل الإخوة
ويا رب يقق لك أمنياتك
ويجمعكم في الجنة ان شاء الله

Mohamed Abdelgeleel said...

اولا يعني انا نفسي اختي تبقي بتنزل مع الاخوات كتير ثانيا هو في اخت بتشكر في اخوها كدا ربنا يوعدنا ثالثا ربنا يخليكوا لبعض رابعا شغل الجامعه احلي بصراحه هو مش احلي لكن يعني الواحد بيحس بالخطورة واحساس الفرح لما يبقي بينفز كلام ربنا في وسط كام واحد مش بينفزو فا بيحس ان ربنا اسطفاه

مشروع انسان said...

ما شاء الله لا قوة الا بالله والله الواحد مش عارف يقول ايه بس انا دعيت الاول عشان متقولوش بيحسد ولا حاجة ربنا يخليكوا لبعض فعلا قليل اوى اما بنسمع عن قصة كده بين اخت واخوها يعنى ممكن تبقى بين اخين او اختين بس اخ واخت بتبقى قليل ومتزعليش من حكاية انه عايزك تنزلى اقل يعنى اكيد خايف عليكى وعلى مصلحتك عشان تعرفوا بس مش تقولوا الافضل دائما ربنا يخليك يا محمد

ياسر مدني ...دينامو الإخوان said...

أنا ابن خالك علي فكره وده للعلم للي بيقرا مش ليكي لان انتي اكيد طبعا عارفه بن خالك مش ناسياه وعلي العموم

انا عارف ان انتو بتحبوا بعض اوي وعشان كده مش حنقولو ذكري جميله منسنهش علشان نتذكر ممكن تقولوا انكو عايشين بيها وموجوده جوه قلوبكو جوه عنيكوا

وعلي العموم انتوا عاشرتوا بعض علي تعظيم الشعائر وتطبيق الشرائع فأصبحتوا أصحاب المشاعل والمشاعر

ولا ايه؟؟؟؟؟؟؟

Anonymous said...

www.khirat-elshater.blogspot.com مدونات ابناء المعتقلين وخاصة مدونة ابناء المهندس خيرت الشاطر

عصفور اسكندرية said...
This comment has been removed by a blog administrator.
حلم الحرية said...

marwa salah ...

مروة صلاح بحالها في مدونتي
يا قهلا يا قهلا
وانا اقول المدونة منورة

مش حاعلق طبعا علي حكاية ان اخوكي برضة بيقول انك بتخرجي كتير
شكل كل الولاد كده
يللا نقول ايه بس
علي رايك اخواتنا بقي ومضطرين نستحملهم

اما بقي العزومة
مش عارفة اقولك ايه
انتي كده حتخليني ابدا صيام من دلوقتي استعدادا للعزومة بتاعتكم
وشكل محمد حيبيعني وحترسي علي انكم حتستنوني علي محطة القطر

مستنية اليوم ده
انا واثقة انه ان شاء الله حيكون يوم جميل

حلم الحرية said...

Ahmed Shokeir...
طبعا اسمح اووووي
احنا نطول يافندم

مدونة حضرتك ما شاء الله عليها
انا باتابع كتابات حضرتك دائما وسعيدة اوي بزيارة حضرتك لمدونتي


ابوزياد الفاتح ...
اكيد في ذكريات حلوة مع اخواتك حتي لو مش اخوان
حضرتك بس تبص للنص المليان من الكوباية
دور علي اللي بتتفقوا فيه وانسي اختلافكم
زرت مدونة حضرتك ما شاء الله بداية موفقة

حلم الحرية said...

Taher ...
هو فعلا كده
والدعوة كل اللي قراها ساعتاها استغرب منها اوي
سعيدة باول مرور لحضرتك عندي واتمني ميكونش الاخير

محمد العنانى ...
ليه بس كدده
مين جاب سيرة كندا
وبعدين هما لسه مفتحوش فرع للبنات هناك

حلم الحرية said...

الحلم العربي ...
بالظببببببط
محمد اخويا هو تقريبا اشهر معلق في عشرينات
بيدخل عشرينات اكتر ما بيدخل علي مدونته
و بيعلق هناك اكتر ما بيكتب في مدونته
جزاكي الله خيرا علي دعاءك الجميل
وفعلا زي ما قلتي التربية ليها دور كبير ربنا يخليلنا بابا وماما ويباركلنا فيهم ...ده بوست تاني ان شاء الله يبقي عليهم


بهاء ...
اللهم امييييييييييييين
جزاكم الله خيرا علي الدعاء

حلم الحرية said...

محمد عبدالجليل ...

نعلق بالترتيب
اولا
هو انا لسه كنت باعلق علي تعليق مروة صلاح فوق باقولها واضح ان كل الاخوات الولاد كده
كويس والله ان في حد مش كده
لحظة بقي انادي اخويا عشان حضرتك تقنعه
ثانيا
اه والله في...واكيد برضة اخوات حضرتك بيشكروا فيك بس جايز مش ادامك
ثالثا
اللهم اميييييين
جزاكم الله خيرا علي الدعاء
رابعا
هو انا مقتنعة ان شغل الجامعة احسن حركيا ودعويا لكن شغل المنطقة تربويا اعلي كتير
وفي كل الحالات بنحمد ربنا عز وجل علي انه اختارنا للعمل في دعوته وندعي ان ربنا يستعملنا ولا يستبدلنا

حلم الحرية said...

امام الجيل ...

احم
يعني هو بالصراحة مش حكاية خوف اوي
هو رايه اني مزوداها في الخروج
يعني شايف اني كده مش محققة التوازن المطلوب ما بين خروجي وقعدتي في البيت

اما بقي حكاية الافضل...
اروي وانا قلنا ان الافضل دي مفيهاش نقاش
ده حتي البوست ده اكبر دليل علي كده
في اخ يكتب يشكر في اخته زي ما انا كتبت اشكر في اخويا
يبقي الافضل وللا لا

حلم الحرية said...

ياسر مدني ...دينامو الإخوان ...
ولو اني كاتبه في المدونات اللي بازورها اسمك وجمبه انك ابن خالي بس نقدر نقول تاكيدا للمعلومة ماشي


وبعدين ايه الكلام الكبير ده
ـــــــــــــــــ
انتوا عاشرتوا بعض علي تعظيم الشعائر وتطبيق الشرائع فأصبحتوا أصحاب المشاعل والمشاعر

ــــــــــ
بجد جملة حلوة اوي
ربنا يكرمك يا ياسر

جزاكم الله خيرا يا استاذ
نردهالهم في موضوعاتكم

أُكتب بالرصاص said...

بجد استمتعت جدا


ربنا يديم بينكم هذه المحبة والألفة

وينفع بكم
ويجمعنا واياكم في الجنة


أمين

همسة قلم said...

ربنا يديم حبكم واخوتكم :)
من أجمل الكلمات اللى قرأتها من اخت لأخوها
ربنا يجمعكم دايما على الخير وفي الخير وللخير :)

محمد السيد..مش حاسكت said...

لالالالالالالالالالالالا ...
الكلام ده كتير أوي يا جماعة ...
علي رأي هنيدي ....
كده حابكي ... حابكي ... حابكي "سأبكي"

وبعدين مش عارف ألاقي وقت للأوتوجرافات دلوقتي ... ولا الكام برواز ولا الصورة الكبير اللي حتتعلق بطول العمارة كلها؟

وبعدين يعني الواحد ميعرفش يعمل حاجة لله ابدا كده "نسأل الله الإخلاص"

إنتو أولادنا برضه يا بنتي ... إحنا بنحاول نسيب حاجة للأجيال اللي جاية بس ...

إيييييييييييييييه !!!

إحنا عايزين بس لما نموت تفتكرونا بالخير وتقولوا كان لينا أخ كبير ومحترم وكويس وفضله علينا وحنين علينا ومحسسنا بالأمان والحنان وبيخلي باله علينا ومش قادين نعيش من غيره و ........

تعرفوا علي أيامنا ... إحم إحم ... أنا حاسس الحكاية وسعت مني كده

كفاية كده ؟؟؟ كفاية ... ماشي ...

محمد السيد..مش حاسكت said...

تعالي هنا بقي ...
بقي انا مكنتش عارف أطلع في حفلة آخر السنة ؟ ده كان بمزاجي يا ماما ...

وأيوة زعيم يعني زعيم ..... هو في حد زيي في الدنيا دي ؟؟

"علي فكرة فعلا ... لو كل واحد يحط في دماغه إنه مفيش زيه في الدنيا فعلا حينجح ... علي الأقل في حاجة واحدة ... لأنه فعلا مفيش حد زيك في الدنيا يبقي مقلق ليه؟"

أما الإعلام .... ياسلام ....
آآآآآآآآآآآآآآه يابلد ..بس خلاص عشان المراراة بتيجيي علي السيرة دي ...

محمد السيد..مش حاسكت said...

حكاية النوم دي بقي ؟؟؟

مش بأقولك اولادنا ...

خلاص بقي .... ملوش لازمة الإحراج ده ... أحسن وشي احمر علي الآخر ... ولا أحسنها طماطماية عند بتاعة الطماطم اللي في السوق "فاكرة ياسمية -أختي التانية- بنت بتاعة الطماطم"

أما بقي التعب ..... والله والله والله .... الناس ملهاش ذنب في إنك تعبان ولا حتي جسمك ولا سنانك حيموتوك ....
مش من حقنا نزعج الباقيين .... أما الباقيين .... هم شايفين إن من حقهم يزعجونا ... وإحنا من حبنا ليهم ... مضطرين نتقبل إزعاجهم لينا ياستي ....

حنعمل إيه ؟؟؟ مش عايزين يفهموا ...

*************************
عشرينات دي بقي ..... سلام مخصوص ....

الحلم الحقيقي اللي عشته لحظة بلحظة ...

يمكن من بعيد .. يمكن بالتعليقات ... يمكن بعلاقات خفيفة اتعرفت خلالها علي بعض العشريناتية هناك ....

إنما أحلي موقع ... أحلي مكان ... أحلي صحاب ...
من أول مني سليم .... بسلام مخصوص جدا جدا جدا .... لأفضل إنسان اتعرفت عليه في السنة الأخيرة ...
مصعب بيه ... .بيومين بيات عنده في البيت أنا وأحمد صاحبي ...
مروة صلاح ... الهدوء البساطة .... والأريحية والقلب الجامد في العزايم والترحيب بيك ..تشيل منك أي رهبة ...

هواري باشا طبعا .... أقول إيه بس بيحاول يقلدني وينزل شعره علي عينيه ..بس علي مين ؟؟؟

دعاء .... عروسة الموقع الحديثة ...
وكل البشر اللي هناك ....

محمد السيد..مش حاسكت said...

مش عارف هو المفروض أعلق علي نقطة نقطة .. ولا أعمل إيه ؟

ولا المفروض أتكلم عليكي إنت ؟؟؟

ولا أتكلم عن فخامة سعادة سمو حضرة معالي سياتي ....؟

نسيتي تقولي التواضع الشدييييد علي فكرة ....

ولا بمكن المفروض معلقكش خالص ؟؟؟

عيالي عباقرة يعني عباقرة بإذن الله .. وحتشوفوا ...

زي ما بأقولك .. حتروحوا من عندي في البيت إنت وسمية وماما ... تقعدوا تحكوا وتتحاكوا عن عيالي ومراتي والبيت عندي ...


وعشان خاطر اي حد في الدنيا ... أي نعم إنت مش بتنزلي أوي " باسحب ناعم متصدقوش " .... بس اقعدي في البيييييييييييييت أكثر من كده ....
بس مش حأزود ... عشان في حقوق مرأة وبنات بيدخلوا هنا ....

في ضريبة لكل حاجة .... وزمان كان في تعذيب وبهدلة وتربية قوية .. لكن كان فيه عيوب .. منها قلة الانفتاح ورفض الآخر والتقليدية ...دلوقتي بينعكس الكلام ده ... ولا يوجد عصر أو جيل خالي من المشاكل والعيوب ..

وياااااااااااارب عمرة .. أو اعتقال تاني "ده أنا متطولتش حتي يابنتي -14يوم بس "؟؟

بس انت شفت فين الورقة دي ..؟ يالهوووووووووووووووووووووي

وربنا يجمعني باللي في بالي ... وبيكم في الدنيا وفي الجنة علي خير إن شاء الله

محمد السيد..مش حاسكت said...

بصي بقي يأنا حأنقل الكلام ده كله في البوج عندي


يمكن ألاقي معجبين هناك برضه .....

متضحكيش أوي كده ....

إنت عارفة إني مكتفي خلاص .....

محمد السيد..مش حاسكت said...

بصي بقي يأنا حأنقل الكلام ده كله في البوج عندي


يمكن ألاقي معجبين هناك برضه .....

متضحكيش أوي كده ....

إنت عارفة إني مكتفي خلاص .....

قضية عم أحمد Ahmed Case said...

ما شاء الله حلو أوي شريط الذكريات ده وحلو أوي ان نتذكر في ايامنا الماضية أجمل ما فيها ورائع ان تتغني باخيكي .

بوست رائع جدا عجبني جدا فعلا وأحييك بشده وفعلاً شوقتيني في التعرف على أخوكي الكريم .

انتى عارفه ان من أكبر نعم ربنا عليا انه رزقني بأخنين بحبهم أوي والله فعلا نعمة ان الواحد يكون عنده أخت حنينه عليا وتحبه كده نعمة متسويش كنوز الدنيا .


تحياتي

عصفور اسكندرية said...

اهلا مروه بجد البوست ممتاز مع مرتبه الشرف
وانا رأيي ان الاعدام القادم سيكون لرمز من رموز الفساد وهو الحاج ابو جمال وبعدها ستكون شراره البدايه والنهايه
بدايه عصر جديد ونهايه انطلاقه فاسده
وياريت تشرفيني علي مدونتي حتي نتواصل معا حتي تم اعدام الرمز
mat7on.blogspot.com

ياسر مدني ...دينامو الإخوان said...

أي خدمه الكلام الكبير كله بيطلع من عندنا وبعدين محنا مقضينها جمايل من زمان ..ولا شفناش اي حاجه في موضوعاتي ولا ايه؟؟؟

ابوزياد الفاتح said...

ليكى تاج ارجو استلامه
والرد عليه
اوعى تطنشى
ثانيا انت بتزورى المدونه ومش بتعلقى ليه طيب
لو مش ناويه تعلقى على اى موضوع يبقى متزورريهاش تانى
ايوه
كده ازعل بجد
لازم اللى يزور يعلق
اتفقنا
السلام عليكم

Alaa said...

ربنا يحفظكم و يهديكم و يثبتكم و يجمعكم في الجنة
أخوكي شخص محترم
و كتّيب جدا جدا
شكله دحيح :)
وقف في الشمس بس عشان يكتب و يسجل اللي بيحصل
أحسب وقفته هذه في ميزانه ان شاء الله

لكي تاج عندي في المدونة
استلميه لو سمحتي

Anonymous said...

ربنا يخليكم لبعض يا مروة

والله انا حبيت بيتكم ده كله بما فيهم الملكة بتاعتكم اللى لسه اجراءات انضمامها لم تكتمل
ياريت تخلصواورق الانضمام سريعا وبلاش عطلة مادام انتى وسمية فى ايدكم الحل.

..
كنت عايزاكى تكتبى على وصلة النت التانية الخصوصى اللى محمد دخلها فى البيت لكم، واللى هبلتنى فى الاول بس كانت سبب انى اعرفكم كلكم
..

اما بقى موضوع العزومة، انتتى عارفة، واسأليه كل مروة اقوله هات مروة معاك، يابنتى هو انتى م عارفة مكان محطة القطر زى ما مروة قالت لك تعالى واحنا هانستناكى على المحطة
انا نازلة اجهز نفسى ابقى .. "وبحبك اوى يا ميرو"

Anonymous said...

ذكريات جميله
ربنا يتمها على خير طول العمر
ويخليكوا البعض
حقيقى الحب الصادق بجد واللى مفيش من وراه مصلحه هو حب الاخوات
فربنا يحببكم فى بعض دايما

ibn nasser - ابن ناصر said...

موضوع رائع وجميل وباين علي اخوكي انه مناضل,, سلامي ليه
تحياتي

elkamhawi said...

ربنا يخليكو لبعض
مفيش فى الدنيا حاجة احسن من اتنين اخوات يحبوا بعض

خليك فى البيت said...

ندعوكم لزيارة مدونة خليك فى البيت والمشاركة فى الحملة

MoHaMmAd said...

ربنا يخليكوا لبعض..ونحاول نكون زيه كدة فى حبه لأخواته...بس هما يقدروا الحب ده...ويا رب يا رب عمرة أو اعتقال...والكبيرة (الشهادة فى سبيلك) أمين

حلم الحرية said...

أُكتب بالرصاص ...
اللهم امين
اسعدني بالطبع ان يستمتع احد بقراءة ما كتبت
جزاكم الله خيرا علي المرور والتعليق

همسة قلم ...
يللا بس هو يقدر
منورة المدونة يا اسماء
جزاكي الله خيرا علي دعاءك

حلم الحرية said...

محمد السيد ...

اخويا جه... اخويا جه

لا يا شيخ

لسه واصل

مش عارفة اعلق علي كل كلامك اقول ايه

اولا انت رغاي اوووووووووووي
امال عالطبيعة لا ليه

ثانيا
يعني بخصوص البرواز والصورة اللي بطول العمارة متقلقش بنجهزها وهنعلقها يعني احنا عندنا كام محمد

ثالثا
حفلة مين بس اللي بمزاجك
خليني ساكتة

رابعا بقي
بتسحب ناعم ايه بس ..متصدقهوش يا جماعة
يعني انت تسحب ناعم هنا وتقولي انزلي براحتك عشان حقوق المراة والبنات اللي تدخل وتقرا
ماشي يا محمد
برضة هانزل كتير


خامسا بقي ودي الاهم
ايه يا عم التواضع الفززززززززززيع ده
كده ممكن نصدق

حلم الحرية said...

احمد رفعت ...
ربنا يجمعك انت واخواتك علي خير دايما
وفعلا دي نعمة تساوي الدنيا كلها

مستنين شريط ذكرياتك مع اخواتك

تحياتي
وشكرا لتعليقك


المواطن المطحون ...
اعتقد التعليق ده خاص بالموضوع اللي بعده
بس ميضرش
اكيد كلنا في انتظار اعدام الرمز ده ولو اني كنت اقصد المعني الحلو للرمز بس مش مهم مهو ده رمز برضة
ان شاء الله ازور المدونة واعلق كمان

حلم الحرية said...

ياسر مدني ...دينامو الإخوان ...
جمايلك محفوظة يافندم
احنا نقدر نقول حاجة


ابوزياد الفاتح...
تم استلام التاج وجاري التجهيز للرد عليه
اخلص امتحانات وافضي بس وارد ان شاء الله

حلم الحرية said...

علاء ...
اللهم امييييين
من ناحية كتيب ..اخويا فعلا كتيب
بس حكاية دحيح دي
ما اعتقدش
خااااااااااااالص
محمد مش بيطيق حاجة اسمها مذاكرة
انا حتي معرفش جاب مجموع الثانوية العامة ازاي
يقعد يذاكر تساوي عنده انه رايح يقتل نفسه

اما التاج
تم استلامه زي اللي قبله وان شاء الله ارد عليهم بس لما افضي واخلص امتحانات
جزاكم الله خيرا

حلم الحرية said...

منى سليم ...

مني وصلت
هيييييييييييييييييييه
لولولولولولي
استني اعمل فرح

منورة المدونة يا بنتي

تعليقك فرحني اوي

وبيتنا اللي بتحبيه كله بيحبك بما فينا الملكة اللي حتنضم ان شاء الله

اما بقي وصلة النت لسه كنت باكلم ماما وسمية علي اللي بنعمله فيكي بالوصلة دي
معلش بقي استحملي
اللي يعرفنا لازم يستحمل


بخصوص العزومة شكلي كده هاتهور واعملها واجي لوحدي


الجملة الاخيرة مش عارفة ارد غير بكلمة واحدة
اني احبك في الله

حلم الحرية said...

mohamed gado...
اللهم امييييين
فعلا حب مش وراه اي حاجة طبيعي انه هو اللي بيدوم


ibn nasser - ابن ناصر ...
يعني نقدر نقول عليه كده

حلم الحرية said...

elkamhawi ...
امييييييين
فعلا مفيش احسن من كده في الدنيا

شكرا لتعليقك

خليك فى البيت ...
جاري زيارة المدونة ومتابعة الحملة

groslag ...
اميييييين
ان شاء الله هيقدروا
وان شاء الله يتحقق الدعاء
عمرة او اعتقال ثم شهادة في سبيل الله

جهاد خالد said...

ربنا يخليكم لبعض
بجد بوست مؤثر جدا مع ان اسلوبك عادي
بس احساسك عالي اوي



مدونة لذيذة
متابعة ان شاء الله

MOSLEMA - مُسلِمَة said...

السلام عليكم ورحمة الله وبركاته

الحمد لله رب العالمين بدأت عالم التدوين
واللهم افتح بها وبي لأمتنا

ومنتظرين حضراتكم

وياريت تاركونا وردنا الجماعي على……..

www.ana-moslema.blogspot.com

dead man said...

اسمحيلي ارد علي محمد الأول

طبعا يا عم مادام البوست عنك طول في التعليقات .. يا بخت من كانت الحكومة قريبته ياعم
:))

طبعا مش قصدى الحكومة النظيفة لا سمح الله

مستنى اشوفك يا مولانا

أما يا مروة بقة تقدري تعتبري العزومتين بقوا 3 ..

ربنا يخليكو لبعض

Alaa said...

لماذا التعليقات على آخر بوست
هل يؤلم الرصاص ؟

سوكــا said...

بخ
انا جييييييييييييييييييت
لا داعي للهتاف:)
يالهوي يامروة مشوار صعب اوي يااوختشي لحد هنا
علي حسب ذاكرتي والله اعلم يعني اول مرة اعبرك واعلق عندك
عشان منساش بقي .. مبروك عالمدونة نياههاااااااهاهاهاههههااااااا
تعرفي لما قولتيلي اقري البوست ده لما نزلتيه كنت ناوية ارد والله من اوائل الناس واكسر حالة الخصام التعليقاتي اللي انا عملاه مع المدونات والمنتدي
بس انت عارفة بقي ربنا يسامحها دي كلية وانتي عارفة اللي في قلبي ناحيتها .. طبعا بالاضافة للكسل وسنينه
يوووووووه عالرغي المهم
انا داخلة ابهدل محمد
تعرف خسارة فيك النيك نيم اللي انا عملاه عالماسينجر ده وفرحانة بيك وقايلة اخويا حبيبي ده احلي اخ في الدووونيا
بتسيحلي ؟؟؟؟؟؟؟؟؟؟؟؟؟؟؟
ماشي لينا بيت
وبعدين مين دي اللي بنت بتاعة الطماطم يابني دي كانت ايام الطفولة
الله يرحم ... وقاعد جنب المسجل ولا راضي اوطيه ولا راضي اوطيه
مش حازود في الكلام بقي وانت فاهم وانا فاهمة ومروة فاهمة

ثم مروة مش قالت حاجات كتير يابني انت حاجة جامدة زي ما انت عارف بس انت مش مقدر نفسك ... فين ايام القصص وربع التمن اللي كان اللي يقري القصص يدفعه ولا ايام ما ماما بتقفشنا واحنا مش نمنا وقاعدين نتفرج عالتليفزيون
وحرب المخدات لما ماما تنزل ولا ايام المدرسة ومواعيدك المظبوطة وقعدات ماقبل النوم والحكاوي بتاعتها وخناقتنا عشان انا عندي مشروع وانت عايز الكمبيوتر ومروة في النص وغيره ... لا لسه في كتيييييييييييييييييييييير

ممممممممممممم كنت حاقول ايه تاني
اه مش حازود فالكلام عشان احنا عيلة رغاية بالفطرة والناس بتزهق مننا بسرعة
كلامي لمروة صلاح ومني وهواري
ياجماااااااااااااعة والله البنية عندها اخت اصغر منها بسنة وبتروح معاها في كل حتة هي بس مدفوووووووووووونة في عمارة عشان كده مش بتبان كتير ... عشان بس محدش يعمل حسابه في عزومة لمروة بس ده حيبقي طييييييييييييب اوووي ... بس حبيت اقول نحن هنا بس من باب اثبات الحصور ... اروح اكمل التكييف بقي

عارفة اني نورتت
:))