Saturday, June 23, 2007

من وحي مؤتمر المدونين


تابعت تغطيات المدونين لمؤتمر المدونين تمنيت لو كتب احدهم عن اهم شئ في المؤتمر من وجهة نظري
عن المعني الذي استفدته ربما اكثر من اي شئ اخر في المؤتمر بخلاف التعرف علي اصحاب المدونات
(علي اعتبار ان (معظم المدونات من البنات اللاتي تعرفت عليهن كن حديثات التدوين ولم اكن اعرف مدوناتهم



عن هذين النموذجين اتحدث

عن تلك الجلسة التي جمعت المدونين حديثي التدوين باثنين من قدامي المدونين
(عبد المنعم محمود ( الاخواني )...علاء سيف ( الليبرالي
عن التقاءهم مع شباب المدونين وتواصلهم معهم...مع تنحية اي اختلافات في الايدولوجيات والقناعات
ان نلتقي علي الشئ المشترك بيننا.....اننا كلنا مصريين ...مدونيين ...يجمعنا حلم الحرية لهذا الوطن
ان نقتنع ان اختلافنا اختلاف تنوع لا اختلاف تضاد
كلنا لنا نفس الهدف..... ان نري مصر افضل واعلي واجمل ....ربما تختلف الطرق التي اخترناها للوصول لهذا الهدف ....لكن يظل لنا نفس الهدف ...ان تتخلص البلد من الفساد والديكتاتورية ينعم بديموقراطية حقيقية

منذ فترة حضرت ندوة لدكتور عصام العريان ركز علي هذه النقطة بالتحديد
الانفتاح علي الاخر...اننا لسنا الوحيدون علي الساحة ...هناك اخرين يحبون بلدنا كما نحب بل واكثر ....هم يعشقون ترابها....يعملون من اجلها ليل نهار
ربما اخترنا طرقا مختلفة لكن يظل الهدف واحد يستحق ان نتعاون من اجل الوصول اليه


اتمني لو نري جميعا الامر من هذا المنظور....
وعندما اذهب لصديقتي الاخوانية لادعوها لحضور نشاط لاحدي الاسر في اتحاد الكلية اتمني ألا اراها تنظر لي بدهشة
واستنكار وتسالني :انتي بتعمليلهم دعاية !!!؟؟
ايوة باعملهم دعاية ....ما الذي يمنع اني اعمل لهم دعاية واشارك في انشطتهم


اتمني الا اري تعليقات مدونين الاخوان تقتصر علي مدونات الاخوان ...ويتحول الامر الي اننا ببساطة - بنتكلم ونرد علي بعض- اتمني ان اري تعليقاتهم عند المدونين من غير الاخوان
ان ينتشروا
يتبادلوا الافكار
يندمجوا بالاخرين
ان يفيدوا ويستفيدوا من الجميع ايا كانت تيارتهم او اتجاهاتهم
ببساطة ....ان يوصلوا الرساله التي من اجلها اخترت التدوين واختاره غيري من الاخوان
ان نقول لغير الاخوان اننا

ربما نختلف في الاتجاهات ..في القناعات ....لكن يظل المشترك بينا اكثر بكثييييييييييييير
انسانيتنا...وانتمائنا الأكبر لوطننا وامتنا
ـــــــــــــــــــــــ

علي هامش السفرية

منك لله يا عيلة فضحتيني انتي وصفاء ...انتي علي مدونتك وهيه عالمنتدي
مكنتش واحدة كانز معزومة عليها
بجد كان يوم زي العثل
ـــــــــــــ
الي ثنائي عشرينات الرائع
مني سليم ومروة صلاح
بجد بجد
شكرااااااااااااااااااااا
علي العزومة والاكلة والقعدة والتمشية والرغي والهزار
علي كل حاجة
شكرررررررررررا
حقيقي اليوم كان رائع
كنت محتاجاله فعلا

29 comments:

Alaa said...

كلامك مهم فعلا
نحن كلنا نعمل من أجل مصر
طبعا أنا انحاز لأصحاب النهج الإسلامي و لكن هذا لا يمنع أبداً من العمل يدا بيد مع كل من يعملون من أجل حرية مصر و حرية التعبير عن الرأي

و لابد أن نتعاون فيما اتفقنا فيه
ساعة لما قعدنا كلنا لم نتكلم عن الاختلافات اطلاقا و لكن تحدثنا عما يمكن أن نتعاون فيه لعمل تكتلات مدونين مصريين أصيلين مع اختلاف أحزابهم و تجهاتهم

هذا هو العمل الصحيح

ربنا يبارك فيكي و يحميكي
آمين

إخوانى مخربش said...

هى المشكلة ببساطة فى نظرية الاستعلاء

وان كنت انا من مؤيدى النظرية

ولكن لست من مؤيدى من يطبقها بهذه الطريقة الخاطئة

ايوة انا عارف ان الحل لا يمكن يكون الا بالاسلام

بس ده مش معناه ان اى حل تانى يبقى حرام

ممكن يكون ناقص او مبتور مش كامل

بس مش حرام

والامام البنا قال
فى الرسائل نقلا عن القاعدة الذهبية للشيخ رشيد رضا

نتعاون فيما اتفقنا عليه ويعذر بعضنا البعض فيما اختلفنا فيه

Mai_Jeneen said...

هي هي هي
كان ناقص الصورة بس !!!

بس تصدقي يا مروة كلامك في الجون جدا
لأن فعلا المفروض يبقى فيه انفتاح اكتر من كدة من المدونين و المدونات الاخوان

فيه حاجة مينفعش ننكرها ان كل انسان بيميل للي يقاربه في الافكار ... حتى في الكلية مثلا تلاقي كل شلة ليها فكر معين بيصاحبوا بعض و يتكلموا مع بعض

إنما ده مش معناه إن الشلة دي مايبقاش ليها علاقة بحد تاني
و للاسف ده شوفته عند كتير من المدونين و المدونات انهم مابيردوش او يتفاعلوا غير مع الاشخاص اللي بنفس فكرهم

انا مبسوطة قوي انك طرحتي الموضوع ده ...

مشروع انسان said...

صحيح والله كنت عايز اتكلم وبصوت عالى جدا فى الحكاية دى ان فيه مننا متطرفين للجماعة وحسب حتى فيه من المدونين الاخوان منعزلين عن الناس بشكل كبير تلاقى الاخ ميخشش الا عند كام واحد بالاسم وهكذا الاخت لازم ننفتح يا جماعة على كل الناس وكل الشخصيات مش اخوان وبس ياريت كل المدونين الاخوان ينطلقوا كده يعنى انا حتى مش عارف احشر نفسى فى مدوناتهم مش عارف ايه التابة دى احنا دعاة مش موظفين يا جماعة لازم ننطلق بدعوتنا فى كل مكان وكان نفسى اجى المؤتمر بس ملحوقة باذن الله وجزى الله خيرا تلكم الخطوات وجعلها فى ميزان حسناتك

AbdElRaHmaN Ayyash said...

كلام جميل اوي
انا كنت هناك فعلا
بس انا اتأخرت شويتين
اما عبدالمنعم و علااء
فأنا أحترمهم كنموذجين لمن يتقبل الرأي الاخر بل ويتعاون معه في القضايا المشتركة

محمد عـنـانـى said...

اكيد اكيد مهم اوى يكون فى تواصل بين كافه المدونين سواء اخوان اوالليبرالين
واى مدون
او نزيل هذه الفروق لان غالبا هناك هدف واحد يسعى اليه الجميع مع اختلاف المعتقدات
رغم انى دائما ارى ان هذه التفرقه ليست موجوده ولكن ربما يكون هناك من يفرق
فهدفنا واحد
وطرقنا واحد
وبلدنا وحداه
تحياتى

belal said...

أؤيد أسادن وأبايع كلامك حضرتك والإخوة المعلقين
..
لكن في النهاية شئ طبيعي أن تكون أكثر تعليقاتنا عند الإخوة والأخوات
....

حزيــــــــــــــــــن said...

اعتقد ان مستوى النضج الذى تحدثتى به يدفعنى الا قول لا شئ فانت قلتى كل شئ الا انى وبالرغم من انى لست اخوان واجتهد ان اكون سلفى لكنى لن اتابع مدونة علاء ومنال ابداً
انا بشعر بالاحتقار لما بدخل هذه المدونه
ابقى ارجعى زورينى هتلاقى ليكى لينك عندى
فاتك تدوينات كتير عندى
منها شعر نزل فى الجرايد اتمنى اعرف رأيك

جهاد خالد said...

كلام سليم جدا يا مروة
مشكلة المشاكل فعلا في زمننا ده
إن احنا مش فاهمين معنى الاختلاف
الاختلاف طبيعي جدا عشان يكون فيه تكامل
وما ينفعش الكون كله يبقى متطابق
والا مش هيبقى فيه تجدد وتنوع وحيوية
ومش بس لازم نتقبل الاخر
لا احنا نفسنا نسعى لايجاد نقاط التقاء بينا وبين الاخر
لازم ننفتح صح


معلش انا رغيت كتير
بس الموضوع مهم فعلا
تدوينة جميلة
جزيتِ خيرا

Anonymous said...

السلام عليكم
سألت سؤال فى المدونه عندى ويهمنى جدا اعرف رأى المدونين و ازاى هيجوبوه
عسى ان تعم الافاده
.
.
.
الدعوه عامه

طالب اخوانى said...

فعلا .. من كلامك .. الواحد كان نفسه يحضر المؤتمر .. إن شاء الله تتعوض فى غيرها .. ولوإنى اشك ..
فى رعاية االله

Alaa said...

نذكركم بوجودكم على قائمة المطلوبين في هذا الموضوع
http://msh-ana.blogspot.com/2007/06/blog-post_12.html

تاااااج

اسماء العريــان said...

عارفه يا مروة انك انتى واختك معندكوش ... مش عايزة اكمل لانى هغلط

بدل ما انتى يا بنى ادمه جيتى الوقفه مقولتليش ليييييييييييييه ؟؟؟؟

يعنى تبقو فى القاهرة ومتقولوش .. ماشى هتتردلكو .. لانى لما ابقى فى اسكندريه مش هاقولكو

جهاد خالد said...

إذا كنتِ ممن يرون للفتاة المسملة
دورا هاما في الحياة
إذا كنتِ ممن يحلمون بفتاة تصلح لتربية الاجيال
شاركينا آراءكِ ومقترحاتك
في مدونة
بـنـاتـيـت
www.banateet.blogspot.com

لكِ من القلب أعذب التحايا

Mohamed Abdelgeleel said...

طالما اتعزمتي علي كنز فيه هيفاء يبقي تشربيه لكن متشتريهوش وبعدين انتي بنت وهيفاء بنت يبقي مفيش مشاكل

sharkawoo said...

فكرة الأنفتاح والتعرف علي الآخر هذا شئ جميل جداً .. ولكن بالطبع من غير ذوبان ونسي من نحن ... :)

فكرة تبادل الخبرات والأفكار وطرق التفكير ... حينها تعم الفائدة ...

والحكم الباقية ... التعاون فيما أتفنا عليه .. ويعذر بعضنا بعض في اختلفنا عليه ...

me said...

كان نفسي أبقى معاااااكم
ونتعرف على بعض
بس يلا خيرها في غيرها إن شاء الله
على فكرة
انتِ مدونة متميزة يا مروة
:)

Anonymous said...

مروة..هوه انتى كمان كنتى موجودة

:(

قدر الله وما شاء فعل

------------
اما هن كلامك
موافقة عليه تماما
انا شايفة اننا ممكن نركز مع نفسنا اكتر فى اليوم
بمعنى ايييه؟؟
يعنى انهارده مثلا عاوزة ادخل 3 مدونات لأفكار مختلفة
واشوف عندهم ايه الاخبار
الموضوع ده بيفرق معانا جدا
انك ازاى ممكن تلاقى حد مش متفقة معاه بنسبة كبيرة جدا
وفى نفس الوقت قادرين تتكلموا
وباسلوب موضوعى وراقى

بحاول بس تقدرى تقولى لسه طفل بيحبى
لما اعرف امشى
هقولك ان شاء الله
دعوااااتك

حلم الحرية said...

علاء ...
كنا بانتظار ان حضرتك تكلمنا عن القعدة دي بالتفصيل بس يللا خيرها في غيرها
جزاكم الله خيرا علي المرور والاضافة


إخوانى مخربش ...
نتعاون فيما اتفقنا عليه ويعذر بعضنا البعض فيما اختلفنا فيه
ــــــــــــ
الجملة دي باحلم اننا نرفعها شعار كلنا ...لسنا نحن فقط كاخوان
لكن الجميع
شكرا علي المرور والراي الكريم

حلم الحرية said...

عيلة و عايزة افهم ...
عيلة وصلت
هييييييييه
منورة البلوج يا قمر
بالظبط زي ما قلتي
ايوة هنبقي بنميل للي بيحملوا نفس افكارنا لكن ده ميمنعناش اننا نندمج بالاخرين بحدود طبعا


امام الجيل...
اللهم امين
عجبتني اوي جملة احنا دعاة مش موظفين
يا تري الكل عارف وفاهم كده ؟؟؟؟؟؟؟؟

حلم الحرية said...

AbdElRaHmaN Ayyash...
فعلا نموذجي علاء وعبد المنعم وتعاونهم اعتقد من الاشياء اللي نتمني اننا نشوف زيها كتير سواء علي مستوي المدونين او جميع العاملين في العمل السياسي


محمد العنانى ...
احنا اللي بنصنع التواصل المطلوب ده بيننا وبين الاخرين
ولو كلنا مقتنعين بضرورة التواصل اكيد كلنا هنحققه

حلم الحرية said...

belal...
باتفق مع حضرتك طبعا
اكثر
وليس كل تعليقاتنا

شكرا علي التاييد والمساندة


حزيــــــــــــــــــن ...
قد تكون مدونة علاء ومنال بالذات فيها ما ترفضه لكن ماذا عن باقي المدونات اللي لا تحتوي علي شئ يمنع متابعتها
هل نتابعها
؟؟؟؟
اعتقد سؤال ضروري نساله لنفسنا
جاري متابعة مدونة حضرتك يافندم
جزاكم الله خيرا

حلم الحرية said...

النجمة الصامدة ...
ارغي براحتك يا قمر
المدونة مدونتك
بالنسبة لتعليقك
لخصتي وجبتي من الاخر
الحل في كلمة واحدة
اننا نفهم معني الاختلاف


حراس الحقيق ...
علم يافندم
ان شاء الله نتابع السؤال والاجابات والاراء

حلم الحرية said...

طالب اخوانى...
ان شاء الله تتعوض في حاجة احلي كمان


علاء ...
مش ناسية والله
نفس التاج مبعوتلي من اربع مدونين باعتذر عن التاخير لحضرتك وليهم
بس حقيقي مش في مود ينفع ارد فيه علي اي اسئلة ليا
قريبا ان شاء الله ارد

حلم الحرية said...

اسماء العـــــــريان ...
مييييييييييين
موووءة
لولولولولولي
منورة المدونة يا جميل

بالراحة علي نفسك بعدين يجرالك حاجة انتي لسه صغيرة يا بنتي

انتي تقدري اصلا تيجي اسكندرية ومتقوليش
دي يبقي فيها دم
دم دم دم
وبعدين مين هيعبرك ساعتها ويتمشي معاكي عالكورنيش وللا في شارع خالد بن الوليد
يللا مستنيينك
انتي بس تعالي واحنا هنظبطك


النجمة الصامدة ...
المدونة جميلة يا نجمة
ان شاء الله نشارك بالافكار
بس هيه تجيلنا الافكار واحنا نشارك علطول

حلم الحرية said...

محمد عبدالجليل...
هو حكاية اتعزمت دي بتفرق مين اللي عازم
يعني لو حد قريب مني وفاهم الموضوع غالبا باعتذرله واقوله مينفعش عشان مقاطعة
لكن لو حد مش عارفني كويس باضطر اقبل منعا لاحراجه
وان كان في الموقف ده بالذات هما دوروا علي حاجة مش مقاطعة بس ملقوش


sharkawoo ...
اكيد طبعا الاندماج وتبادل الافكار والخبرات دون ذوبان

جزاكم الله خيرا علي التعليق

حلم الحرية said...

khadiga ...
ربنا يكرمك يا خديجة
وانا كمان كان نفسي اقابلكم واتعرف عليكم
بجد كان نفسي اقابل اي واحدة من المدونات اللي انا عارفاهم
خير تتعوض ان شاء الله مرة تانية

الفجرية ...
يا بنتي اطفال مين بس ده انتي استاذة
ربنا يكرمك يا اسماء
بجد انتي من المدونات القلائل اللي النقد السابق ده بعيد عنهم
متقلقيش انتي كده اتعلمتي المشي

بالنسبة للمؤتمر
بجد كان نفسي اقابلكم هناك
قدر الله وما شاء فعل

واكيد لو حد منكم نزل اسكندرية يصيف يبقي يقول
عايزين نتقابل يا بنات

wayfarer said...

ربما نختلف في الاتجاهات ..في القناعات ....لكن يظل المشترك بينا اكثر بكثيييييييييييييرانسانيتنا...وانتمائنا الأكبر لوطننا وامتنا
بالطبع هذا هو المهم الذي يجب عليه أن نتفق و نجتمع و لأني أعتقد أيضا في قرارة نفسي أن الحياة لن تستقيم إلا بمنهج الله عز وجل (دين الأسلام الحنيف) هذا علي الرغم من أني لست أخواني أو أنتمي إلي أي تيار سياسي أو كيان فأني فقط أحلم بأن نخلص جميعا النية في أن نبحث عن ما فيه الصلاح و الفلاح و الخير سواء كان بيدي او بيد غيري.
و غيرا محتكرا لفكرة أني أملك مقادير تؤهلني لأن أكون مرجعية يقاس علي بل أقيس ذاتي علي مرجعية الرسول صلي الله عليه و سلم و الصحابة الكرام ساعيا نحو صالح الأفكار يؤيدها الأغلبية و لا يهم علي يج من طرحت
و دعني أؤيد كلامك و أضم صوتي إلي ضرورة أن نجلس معا لنفهم أن كل منا حينما أهتدى إلى ما أهتدى إليه من فكر لم يكن إلا باحثا عن نفس الهدف الذي أبحث عنه
و هو مصلحة البلاد و العباد

يلا مش مهم said...

الله ينور عليكي
انت ضربتي علي امر في منتهي الاهمية
مساحات الاتفاق
ونقاط التماس
التي تجمع بين الفصائل او الافراد
ويجب ان نتيقن من ان التباين والاختلاف سيظل موجود ابد الابدين حتي بين ابناء الفكرة الواحدة والجنس الواحد وهذا من رحمة الله بنا
ولكن من المؤسف ان تجد البعض يصر علي ان يعيش في فضائه الشخص او التنظيمي
ولا يسعي الي البحث عن تلك المساحات وهذه النقاط
واعتقد ان من هذا هو ديدنه في التعاطي مع المختلفين عنه سيذهب الي ان يجعل نفسة اداة لقياس الحق والباطل والصح والخطاء واي اخر يخالف معاييره فسيكون اما علي باطل او علي خطأ
ويللا مش مهم