Sunday, January 6, 2008

(عني اتحدث ....شخابيط حرة (2

عني اتحدث

اغيب عن نفسي
وأظل أبحث عني
اقابلني في الزحام

ثم اتوه مني
...أقابلني
فأسالني
متي سأعود؟؟؟؟


قابلت صورتي علي مرايتي

بصيت عليا وللأسف معرفتنيش

دورت جوايا عليا لكن ملقتنيش

في المراية لقيت الملامح تشبهني

لكن ملامحي من جوه مش هيه هيه
لقيتني باسأل نفسي
ليه لما بادور جوايا عليا مش بالاقيني؟
بجد هو انا رحت فين ؟؟؟
راحت فين الانسانة اللي كنتها في بداية التزامي؟؟
راحت فين الهمة العالية اني أسمع فاطبق بعدها علطول ؟؟
راح فين احساس الندم الشديد بعد الذنب مهما كان صغير.. او التقصير في الشغل مهما كان بسيط؟؟
راح فين الشغل اللي كنت باستشعره بقلبي الاول واحقق معناه جوايا قبل ما ابدأ انفذه؟؟
راح فين الاقبال علي شغل الدعوة بهمة ورغبة وحب ؟؟......ليه كله بئا روتيني ومش زي الاول!!؟
راح فين الاصرار اللي كان بيخليني اتخطي اي تحديات كانت بتقابلني؟؟... هو نَفسي مبقاش طويل زي زمان وللا ايه...وعزيمتي راحت فين!!؟
راح فين التفاؤل حتي في احلك المواقف ... اللي صحباتي من كتر ما كانوا مستغربينه فيا كانوا بيعتبروه عيب من عيوبي لانه مش مناسب لعصرنا بكل احباطاته؟؟
راحت فين الضحكة اللي كانت من القلب بجد ؟؟....ليه حتي الضحك مبقاش له طعم زي الاول!!؟

هوه أنا رحت مني فين؟
حاسة ان أنا مش أنا
باحاول ألاقيني وأرجعني ومش عارفة
باحاول كتير .. ومش عارفة اذا كنت هاوافق أرجع معايا للطريق من تاني وللا هاعاندني
عموما... الفترة اللي فاتت كانت فيه وقفات كتير بيني وبين نفسي
قعدت أنا ونفسي مع بعض ...واتناقشنا واتكلمنا كتير ...حاولت أقنعني بان غيابي طول واني لازم أرجع معايا للطريق اللي رسمناه زمان لينا
وافقت مبدئيا اننا نبدأ سوا سكة الرجوع
أينعم السكة شكلها طويلة وصعبة
لكن أنا و نفسي قررنا مع بعض اننا نمشيها سوا وهنشجع بعض
وأكيد ان شاء الله هننفذ قرارنا وهنمشي في الطريق لغاية ما نوصل بسلام
في بداية الطريق... لقينا ضيفين بيحاولوا ينضموا لينا في رحلتنا
الضيفين هما الخوف والأمل
الخوف من اني أتعب مني وأسيبني في نص السكة ومكملش
والأمل في اننا نقدر نوصل لنهاية الطريق بسلام
اعتذرت بأدب للخوف .....وقررنا أنا ونفسي اننا يكون معانا في الرحلة رفيق طريق واحد وبس

رفيق اسمه الأمل

الأمل في اني أتصالح معايا للأبد

الأمل في اني مبعدش عني تاني واني حتي لو بعدت أرجعلي تاني بسرعة

الأمل في اني أنا ونفسي نرجع نشتغل بهمة زي زمان ...ونحلم زي زمان ..ونفرح بجد زي زمان

الأمل في اننا نقطع الطريق اللي اختارناه من غير تكاسل أو فتور

الأمل في اننا نعيش ونموت واحنا علي نفس الطريق

الأمل اني دايما أكون أنا

ــــــــــــــــــــــــــــــــــــــــ




38 comments:

FadFadA said...

يااااااه
بجد جميل جدا
فيه كلمات حلوة قوي لعلي سلامة بيقول فيها
قلت أبص في المرايا
يمكن أكون احلويت
فضلت داير أبص
ماخليتش ولا مرايا في البيت
في الحمام في الاودة في دولاب
او متعلقة علي الحيط
شفت
سكت شوية
وبعدين اتخضيت
معقولة انا ضيعت العمر ده كله
وزي مارحت زي ماجيت
معقولة أنا عمري ما فكرت ولا اتغيرت ولا حبيت
وازاي ساكت علي روحي ده كله
وليه استنيت
ياريتني ما كان عندي مرايا
وياريتني ما بصيت

بجد أجمل احساس
أن نكون نحن , و لسنا غيرنا
و أوقات كلما اقتربنا منا , نجد الطريق أبعد
و أوقات أخرى يكون أقرب مما نتصور
المهم أن نبدأ في الاقتراب
و بالتأكيد سنصل ... إلينا

محمد

چــِنـيـن ... عيلة و عايزة أفهم said...

يااااااااااااااه يا مروة

بتتكلمي من جوايا اوي

: (

لو لقيتي نفسك ابقي اسأليها إذا كانت شافتني انا كمان : (

امام الجيل said...

بيسموها حلاوة الابتداء
مع بداية الالتزام والتعرف على طريق ربنا
والمشاعر الغضة النقية اللى كانت جوانا
والنقاء والصفاء
وسرعة التلبية وسرعة الاستجابة
وسرعة الاقبال
وسرعة التوبة
وعظم الذنب
وعظم فوات الاجر
ووووووو
نحلم ان تعود هذه الايام
حينها كا تطير قلوبنا فرحا بربها
واستمتاعا بعبادته
ومناجاته والقرب منه
ولكن الله يحبك
ان دلك على الطريق مرة اخرى
وبدأتى السير فيه
فالامل الامل
لا تتركيه يتخلى عنك
ولا تتركى نفسك للخوف
فكثير ما يقعد
وكما قيل
لا تعجب للهالككيف هلك فالهالكون كثير
ولكن عجبا للناجون كيف نجوا فالناجون قليل

استعادة حلاوة الابتداء محتاجة تعب وجهد ومشقة كبيرة
ولكن العزاء انها حلاوة

tamooh said...

روعة يا مروة بجد

روعة

كملى ..لانك بجد

بدورى معايا على نفسى

يارب نلقاها

نفسى ونفسك

Anonymous said...

انتى فعلا اتغيرتى اوى مش هيا دى مروه الى اعرفها بجد معنتيش زى الاول فعلا بس انا متفئله جدا انك هترجعى زى الاول و احسن فى وقت قليل جدا ان شاء الله و هعرف احبارك ديما من مدونتك وهستنا مواضيعك و ردودك على طول
اشوفك على خير

محمد عبد القوى said...

صحيت فى يوم لاقيت فيه حاجة نقصانى
بصيت لروحى لقيت فى روحى أنسان تانى
سألت نفسى دا مين وأمتى أحتلنى وأمتى
أرجع للكنته زمان وألاقى عنوانى
_______
الأبيات اللى فوق هى محاولة سريعة منى لتوضيح مدى تشابة الحالة وأن دى مش حالتك واحدك دى تقريباً حالة عامة ( قريت شعر بالمعنى ده بس مش فاكر كلماته )،وممكن تقرى أخر بوست فى قلم الحرية..فيه معانى مشابهة وإن كنت عارف سببها

Anonymous said...

بجد جميلة

وبتعبر عن اللي جوايا

ممكن ايميلك

حائر في دنيا الله said...

لقيت نفسي أوي في النص الأولاني من الكلام في الموضوع دا تحديداً
وحين دخل الأمل اندهشت نفسي كثيراً فأنا كثيراً ما أترك كل المكان للخوف فقط ولا أشعر براحة نفسية أكبر سوى عندما أتذكر الأمل
وخاصة
الأمل في رحمة الله

لك تحياتي
السلام عليكم

حلم الحرية said...

FadFadA ...

كنت قريت كلمات علي سلامة قبل كده وسمعتها من وجيه عزيز
ووقفت كتير علي اخر جزء في كلماته
ـــــ
ياريتني ما كان عندي مرايا
وياريتني ما بصيت
ـــــ
ولقيتني باقول لنفسي بالعكس ياريتني كنت بصيت من زمان
ياريتني كنت بصيت بدري شوية

........


و أوقات كلما اقتربنا منا , نجد الطريق أبعد
و أوقات أخرى يكون أقرب مما نتصور
المهم أن نبدأ في الاقتراب
و بالتأكيد سنصل ... إلينا
ــــــــ
لا تعليق

سوي

تري هل نصل؟

حلم الحرية said...

چــِنـيـن ... عيلة و عايزة أفهم ...

هو انتي نفسك ضايعة انتي كمان

عموما لو لقيتها في السكة هابقي ابعتهالك
ولو اني واثقة اني مش هاقابلها ولا هالاقيها ...لانك لازم انتي اللي تدوري عليها وتلاقيها

ابقي طمنيني علي امتحاناتك

حلم الحرية said...

امام الجيل ...

و...و...و...و..
كل هذا نفتقده

الغريب اننا نعرف الطريق لاستعادة كل هذا
ولكننا نكتفي بالحلم بالعودة اليه

اللهم ارزقنا الثبات علي طريقك


تعليق مميز
جزاكم الله خيرا

حلم الحرية said...

tamooh ...

ايه ده
شكلنا كتير
هنجمع بعض وننزل ندور علي نفسنا اللي تاهت مننا

يارب كلنا نلاقي نفوسنا ...نفوس نقية ...مخلصة ..مطمئنة ان شاء الله

حلم الحرية said...

Anonymous ...

طيب يا بنتي لما انا اتغيرت ومبقتش زي الاول
مش تسالي عليا مالي
وللا تطمني عليا
مش جايز فيه عندي مشكلة

صحيح
انا عندي فكرة احلي
اسهل بدل ما تفتحي الاكبسلورر ومواقع ومدونات ..دوشة يعني
كلميني عالماسنجر وانا هاقولك اخباري

يللا سلام مؤقت ومستنياكي تكلميني
بدل ما انتي عاملة بيات شتوي ومش معبراني خالص

حلم الحرية said...

محمد عبد القوى...

صحيت فى يوم لاقيت فيه حاجة نقصانى
بصيت لروحى لقيت فى روحى أنسان تانى
سألت نفسى دا مين وأمتى أحتلنى وأمتى
أرجع للي كنته زمان وألاقى عنوانى
_______

احم
دي محاولة سريعة
:)
بجد
ما شاء الله
راااائعة

واضح ان الحالة منتشرة اوي فعلا

حلم الحرية said...

Anonymous ...

جزاكم الله خيرا علي التعليق وعلي راي حضرتك

اما بخصوص الايميل
انا حاطة في صفحة البروفيل بتاعي ايميلي علي الجي ميل
وبارحب باي تواصل عن طريقه
7elm.el7orya@gmail.com

ومعلش باعتذر عن وضع ايميل الياهو او الماسنجر لاني مش بافضل وضعهم عالعام

حلم الحرية said...

حائر في دنيا الله ...

كنت مثلك اترك المكان للخوف قديما
لكنني اليوم قررت الا يكون له مكان عندي
وان استبدله بالامل
خاصة كما ذكرت الامل في رحمة الله

جزاك الله خيرا علي التعليق

Anonymous said...

ما شاء الله .. أنا بصراحة كان نفسي ماحدش يعلق على التدوينه دي خالص .. لأنها تسربت منك إلى المدونة .. يعني حاجه شخصية قوي مش من حق حد يكلمك عنها حتى لو بكلمة برافو .. عموماً وبما إن الموضوع يمكن التعامل معه كخاطرة أدبية لها بعد نفسي ممكن أقول كلمتين :
ياما قالوا لنا مستحيل .. أحلامكو دي مش ممكنة
وحكوا لن ع الليل الطويل .. اللى محاصر حلمنا
بس احنا عدينا الصعاب .. طلنا بأحلامنا السحاب
وإيماننا في قلوبنا ما غاب
ولمسنا بإدينا القمر


يعني نقدر يا مروة نصنع المعجزات لو بس عندنا الطاقة النفسية اللى اسمها الإرادة
بالتوفيق الدائم إن شاء الله

Anonymous said...

هي الخطوة الأولى في العودة
أن نبدأ بالبحث عن أنفسنا
ثم تليها وضع أول قدم في طريق العودة
ونبذ الخوف
والاستعانة بالله
والتمسك بالأمل
بكل تأكيد ستكون النتيجة كما نحب
جميل ما كتبت أختي الفاضلة
جزاك الله خيرا

Eman Eltaher said...

معلش دى ظروف و بتعدى بسرعة ان شاء الله على الانسان و بيرجع متفاءل و يتطلع للدنيا باشراق و همة و يرجع لالتزامه دايما

تحياتى على البوست اللى بيعبر عن ناس كتير منهم انا
أقولك بقى ايه كمان اتغير فيكى

انك مزرتينيش من ساعتها !!!!!! :)))))

Anonymous said...

جميلة جدا
كويس انى لقيت زميلة بتحب الكتابة وموهوبة بالشكل دة

أتمنى تشرفيني

فرنسا هانم said...

هوه أنا رحت مني فين؟
حاسة ان أنا مش أنا
باحاول ألاقيني وأرجعني ومش عارفة

زحمه ياولداه
كم عيل تاااه
مروه
ازيك
اول زياره ليه هنا الاقيكى تايهه ومركبه ميكرفون على المدونه وكل البشر عمالين يدوروا عليكى
يلا
حصل خير
يارب يلاقوكى
بس انا عايزه اقولك صح
وانا داخله المدونه شايفه واحده بتجرى شبهك الخالق الناطق
تكونشى انتى ؟؟؟؟؟؟؟؟

dandana said...

اول زيارة يا مروة


ولاقيتك تايهة


هممممممممم


عارفة ...الشعور دا يجيلنا لما نكون ننتقل من مرحلة مهمة لمرحلة اهم فى حياتنا

تفائلى تانى ....لأنك داخلة على شئ مهم فعلا...وقيم جدا

هاتعرفيه اكيد...لما تحددى الطريق

وبعدين فى بشرى خير

انك قعدتى مع نفسك...وبداتو تحاولو

اكيد خير

تحياتى

مدونتك غنية وحلوة

مرسى ع الزيارة وان شاء الله اجى هنا كتير

ayman_xp_1978 said...

السلام عليكم ورحمة الله وبركاته
الاخت الكريمة مروة
احييك على هذه الشجاعة فى الطرح وعدم الحرج من ان تكشفى بعض عيوب نفسك وان كان الله قد امرنا ان نستر عيوبنا ولا نفضح انفسنا فيزيل الله ستره عنا
- بالنسبة لموضوع الفتور الدعوى .
فهو فعلا ظاهرة متفشية فى كثير من الاخوة والاخوات ويرجع ذلك للعديد من الاسباب
اولها : المعاصى والذنوب التى تحرم الرزق وهذه المشاعر الجميلة التى عشناها اول ما التحقنا بالدعوة اظنها كانت رزق لا يعطيه الله لاحد الا اذا تخلى عن ركااااااااام الذنوب الذى عم وطم على الجميع ولا ازكى نفسى فانا اول واكبر العصاة ولكن حسبى ان الله سترنى فلا احب ان اهتك ستره على
ثانيا : عدم استشعار الغاية فاذا كان العمل وهو الوسيلة يتكرر وتمل النفس منه فان استشعار الغاية ((الله غايتنا)) يهون كثيراً على صاحب الدعوة ويجعلك تحتسب الوقت والجهد فى سبيل رفعة شان الاسلام والدعوة
ثالثاً : عدم التجديد والابتكار فى الوسائل لذلك يصبح العمل روتينى ولا يوجد به جديد
رابعا:غياب الاخ او الاخت مع مسئول واحد لفترة طويله يجعله يمل خصوصا اذا كان هذا المسئول روتينى فى تكليفاته وتحركاته
خامسا: ربما يكون لدى الاخ او الاخت رؤية تسبق رؤية مسئوله او من معه فى نفس اللجنة وتقابل اقتراحاته بالاستهزاء او التاجيل غير المبرر او جربناها ولم تنفع مما يزيد من الم الاخ ويجعله يقرر ان يعيش روتينى مثل الاخرين
والاسباب كثيرة .................
اقترح للعلاج
اولا .ابعد عن المعاصى
ثانيا. ضع امام عينك دائما الله غايتنا
ثالثا.حاول ان تكون مبتكرا
رابعا. اجتهد ان تغير مجموعتك او مسئولك (مليش دعوة ليست دعوة للتزمر هههههههههههههه)
خامسا. اذا كنت صاحب راى دافع عنه دائما ولا تياس واصبر فمن داوم قرع الباب يوشك ان يفتح له
سادسا. الرجوع الى البدايات وتذكر ايام الالتزام الاولى ومدى شغفك وحبك للدعوة وكم فرد ادخلته الدعوة (وطفشت كام الف واحد هههههه)وحاول ان تتصل بهم وتجدد علاقتك بهم
سابعا. احرص ان تكون صاحب حال مع الله بان تكون فعلا رجلا ربانياً لك ورد قرآنى وان تنصب قدماك لله والناس نيام وانت تصلى
ثامنا. ان استطعت ان تكون مسئول لمجموعة جديدة ممن دخلو الدعوة على يديك فان ذلك يزيد من الهمة والنشاط وتستشعر فعلا انك تورث الدعوة والروح التى عند الشباب تزيد الحماس وتعالج
الفتور
تاسعا. وهذه خاصة باصحاب المدونات ان نقلل من الهزار فيما لا يفيد لانى صراحة كثيرا ما اجد بعض المدونات عليها بوستر ضد المحاكمات وصورة انا من مدونى الاخوان ثم بعد ذلك هزار من اجل الهزار ومواضيع لا تمت لا للدعوة ولا للدين بصلة وان كان المزاح جائز لكن يكون مثل الملح فى الاكل وخصوصا بالنسبة للداعية . وللاسف كثيرا ممن يدخل لا ينظر ما الذى سيستفيد منه اكثر مما يبحث عن موضة جديدة فى التدوين او نكتة ظريفة او عنوان بوست مثير ونرد على بعض ردود روشة !!!
عاشراً. ابحث عن موطن تميزك لتخدم من خلاله الدعوة .فاذا كان موطن تميزك الكمبيوتر والنت اجتهد ان تخدم دعوتك من خلاله وكيف تكون وتكونين فعلا شعلة نور تهدى اناس الى الله. ولا نجعل النت مجرد ترفيه.واذا كان العلم اجتهد ان تدرس العلم الشرعى وتدرسه للناس فى المساجد والحلقات .المهم ان يكون لك مجال تفرغ فيه طاقتك حتى ان كانت خلاف وظيفتك الدعوية فانك تسعى لتطوير نفسك وتبحث عن طريقك انت الى الجنة
تلك عشرة كاملة اردت ان انصح بها نفسى واخوانى فى هذا المجال
اسف للاطالة

الربان said...

تحياتي

اعتقد ان معظمنا كبشر...نشعر بنفس مشاعرك اي نشعر في وقت ما...بأننا لسنا نحن....لكن البعض منا همته قوية يستطيع ان يسترد نفسه بسرعة و بثقة و اطمئنان...و البعض يستردها بعد معاناة
و البعض الاخر لا يستردها اطلاقا.

علي فكرة البوست معناه ان لديك نفس لوامة...وهي نعمة من الله لانها لا تستكين
ولا تتجمل لصاحبها...انما هي كثيرة اللوم له حتي ينفض عن نفسه الكسل او
يصحح الخطأ ان أخطأ.

تحياتي و تقديري

Anonymous said...

شريط "ايامنا الحلوة "للشيخ محمود المصرى يتحدث عن هذا الموضوع باستفاضة..استمعي اليه وان شاء الله يفيدك

we are not terrorists said...

الى كل الشباب المسلم العربى المهتم بقضيتنا
الى كل من يسعى ان يكون ايجابيا
شاركونا مدونتنا نحن لسنا ارهابيين
وساعدواعلى نشرها خصوصا للغربيين
اتمنى ان اجد تفاعل منكم واتمنى ان يتعاون معنا كل صاحب مدونة هادفة
www.youth-4-peace.blogspot.com

حلم الحرية said...

صلاح جلال ...
ياما قالوا لنا مستحيل .. أحلامكو دي مش ممكنة
وحكوا لن ع الليل الطويل .. اللى محاصر حلمنا
بس احنا عدينا الصعاب .. طلنا بأحلامنا السحاب
وإيماننا في قلوبنا ما غاب
ولمسنا بإدينا القمر
ــــــــــــ
استاذنا صلاح جلال
بعد هذه الكلمات بالتاكيد لا تعليق
كلمات حضرتك دي احفظها كنشيد وباحبها جدا جداااااا
جزاك الله خيرا علي التعليق
سعيدة جدا بزيارة حضرتك للمدونة

حلم الحرية said...

بهاء ...
بالفعل هي الخطوة الاولي ...وتنتظرنا بعدها خطوات وخطوات
نسال الله عز وجل انه يعيننا عليها ويرزقنا الثبات

حلم الحرية said...

Eman Eltaher ...
احم احم
يااااه ده كمان اتغير فيا
معلش يا ايمان اعذريني
تايهة بئا وبادور عليا ...فتلاقي الزهايمر اشتغل ونسيت اكتب تعليق عندك رغم اني قريت اخر بوست وعجبني جدا كالعادة
جاري متابعة الموضوع والتعليق يافندم

حلم الحرية said...

مصطفى السيد سمير ...
علي فكرة زملاء المهنة كتير بيعرفوا يكتبوا كويس اوي وموهوبين اكتر مني بكتير
بس يمكن حضرتك مدورتش كويس

جاري زيارة مدونة حضرتك اللي مبدئيا قراية موضوعين بس فيها بينبئوا بموهبة رائعة ما شاء الله

سعيدة باول زيارة لحضرتك واتمني لو تتكرر كتير

حلم الحرية said...

فرنسا هانم ...

خالتي فرنسا جت يا اولاد
منورة البلوج

وبعدين لما انتي شوفتي واحدة شبهي الخالق الناطق بتجري مش تمسكيني وتنادي عليا اجي اشوف دي انا وللا لا
امال بئا لو مكنتيش سامعة صوت الميكروفونات اللي بتنادي
اقول ايه بس
يللا مش مهم المرة الجاية بئا لو لاقيتي حد ابقيه امسكيه ونادي عليا
سعيدة بزيارتك دي اوي
مستنياكي تكرريها علطول

حلم الحرية said...

dandana ...

مش عارفة انتوا حظكم رائع كده ليه
كلكم اول زيارة ليكم عندي وجيتوا لاقيتوني تايهة
مش تختاروا طيب وقت كويس تيجولي فيه

يللا مش مهم

متهيالي انتي حطيتي ايدك علي حاجة مهمة ...شعور التشتت والتوهان اللي بيقابلنا عند الانتقال من مرحلة لمرحلة
وازاي ان المهارة الحقيقية هيه اننا نعرف نعدي الفترة دي بنجاح

اسعدتني زيارتك واسعدني اكتر تعليقك

حلم الحرية said...

ayman_xp_1978 ...

ربما هو اطول تعليق يصلني علي المدونة
......وكذلك اقيمها

جزاكم الله خيرا كثييييرا علي التعليق ده
حقيقي افادني جداااا

حلم الحرية said...

الربان ...

ربنا يجعلنا من هؤلاء الذين يستردونها سريعا
وان يرزقنا نفوسا مطمئنة
اللهم امين

جزاكم الله خيرا علي التعليق وعلي رايك

حلم الحرية said...

Anonymous ...

جاري البحث عن الشريط وسماعه

جزاكم الله خيرا علي النصيحة

حلم الحرية said...

we are not terrorists ...

جاري زيارة المدونة ونشرها
ربنا يتقبل منكم

حمدي المتولي said...

{يَا أَيُّهَا الَّذِينَ آمَنُواْ اصْبِرُواْ وَصَابِرُواْ وَرَابِطُواْ وَاتَّقُواْ اللّهَ لَعَلَّكُمْ تُفْلِحُونَ }آل عمران200

دواير said...

بجد كلمات جميلة...........يا ريت الواحد يقدر يلاقي نفسه