Monday, February 12, 2007

نحن الاخوان ..دائما في انتظار.. المحنة


في البداية اعتذر للصديقة العزيزة مني سليم علي استعارة عنوان موضوعها في ولاد البلد

لما قريت المقال كنت ناوية ارد علي بعض النقط اللي ذكرت في المقال زي اسئلتها

لماذا لا يغيرون ويجددون أنفسهم سياسيا وحركيا حتى يتغير ما بهم؟..

لماذا دائما ينتظر الإخوان المحنة ليعيشوا أدبياتها أكثر من النظر في معنى وحقيقة الموقف؟

او ما ذكرته في مقالها

حول الإخوان على مدار تاريخهم السجن لمعسكر تربوي وروحي يعكفون فيه على قراءة الأوراد وإقامة الصلوات الليلية والمحاضرات التثقيفية الدينية

او ما ذكرته ايضا علي لسان صلاح عيسى
أن رفض الإخوان الحديث أمام النيابة قد يعكس خوف من إثبات الاتهام عليهم لشيء يعرفوه هم جيدا ويحاولون إخفائه لأن التهمة الموجهة إليهم خطيرة بالفعل.


كنت قررت اني ارد علي النقط اللي فاتت لكن لقيت اخويا محمد رد علي النقط دي في عشرينات وعلي مدونته

ولقيت عشرينات ولاد البلد بينشروا رد عصام فؤاد


متهيالي الردود دي استوفت كل النقط


بعيدا عن المقال والنقط المثارة فيه استوقفني شئ اخر هو اللي بدات بيه موضوعي

العنوان اللي اختارته مني سليم

دائما في انتظار.. المحنة


اللحظة الانسانية اللي بيقضيها الاخوان في انتظار المحنه


باكلم صاحبتي عالماسنجر في بداية حملة الاعتقالاات قالتلي كلمة مرت عليا قبل كده اكتر من مرة لكن المرة دي كانت اول مرة تستوقفني

- احنا من بداية حملة الاعتقالات محضرين الشنطة ومستنين


كانت دي اول مرة اقف عند الكلمة دي واركز فيها

مستنيين

تخيلوا الاحساس ده ..........

اسرة في انتظار ان عائلها يتاخد من وسطهم

اب في انتظار زوار الفجر ياخدوه من وسط اولاده

ابناء بيحاولوا ييستوعبوا الموقف ان والدهم احتمال في اي لحظة يغيب عنهم

وان مفيش بايدهم اي شئ لمنع ده

ان شخص يتوقع الاعتقال في كل لحظة

انه يعيش في انتظاره ...

ان يعيش في انتظار اللحظة التي حياخدوه فيها بعيدا عن اهله

ازاي يكون احساسه بالامان فيما يفترض انه وطنه وهو بانتظار كل ده


قد يكون الاعتقال في حد ذاته محنة

لكن في رايي محنة انتظاره وفقدان احساسك بالامان وقتها رغم ان ده اقل حقوقك في وطنك متهيالي محنه اشد واقسي

انتظار الاعتقال في كل لحظة وفقدانك للامان
بينما كل تهمتك هي ...هي ..هي

لأنني عرفتُ وجهتي
لأنني ارتضيتُ منهجاًيَنمُّ عن هويتي
لأنني أعيش في ظلال سنتي
لأنني أسير في سنا عقيدتي
لأنني أريد نهضةً لأمتي
تلك تهمتي



26 comments:

محمود سعيد said...

تجهيز الشنطة مش انتظار للمحنة
صحيح هى محنة
لكنه إستعداد لها
تجهيز

لذلك أرى أن العنوان الصحيح هو :
نحن الاخوان ..دائما في إستعداد.. للمحنة

AbdElRaHmaN Ayyash said...

تمام زي ما محمود بيقول
في استعداد
أنا فعلا وبدون مبالغة دايما بلاقي شنطة وادلي جاهزة
ولما مثلا بلاقيهم بيتصلوا الساعة 4 الفجر ( الاخوان أقصد)ويقولوا لبابا انزل اتفسح ..
ألاقيه قاام وصلى ركعتين وبدأ يقرأ قران ويطلع شنطته
وينادي علينا ...
دي حياتنا
وده الصراع
ودول الاخوان
هييجي وقت غيرنا هيندم انه متعبش زينا
وانه على الاقل .. مأخدش شرف البداية في الدنيا ..
ده غير الثواب اللي بنأمله من ربنا في الاخرة
التدوينة جميلة
والمدونة بداياتها رائعة
سلام

حلم الحرية said...

اتفق معاكم انه تجهيز الشنطة مش انتظار للمحنة بقدر ما هو استعداد ليها

جايز اختياري للعنوان كان بحكم انه العنوان الاصلي لمقال مني علي عشرينات

لكن انا كنت اقصد اتكلم علي اللحظات دي ..
لحظات الاستعداد حسب التسمية اللي اختارتها حضرتك.....قد تكون استعداد مادي بتجهيز الشنطةو استعداد نفسي بتربية النفس علي الصبر علي المحنه اللي جاية
ايوة استعداد
لكن ميمنعش انه استعداد قاسي تفقد فيه ابسط حقوقك في وطنك ....حق الاحساس بالامان

صحيح الاستعداد للمحنه ده قاسي لكن في نفس الوقت حتلاقي معظمنا مستعدين بطريقة او باخري
مستعدين للمحنة
لاننا لما اختارنا السكة دي كنا عارفين ان عمرها ما حتكون مفرشة بالورود
مستعدين للمحنةلان لينا هدف اعلي واسمي نشوف بلدنا في احسن حال
مستعدين للمحنه لاننا عارفين انه كل ما حتزيد المحنة حيزيد معاها الثواب ان شاء الله

استعدادنا للمحنة ما ينفيش صعوبتها

رغم اني شايفه ان المحنة دي بالذات رغم صعوبتهامن احلي المحن ...بيروح الاخ يتربي هناك احلي تربية او نقدر نقل بيعيش في احسن معسكر اعداد يرجع بعده واخد شهادة الجودة........نحسبهم علي خير ولا نزكي علي الله احدا
ندعي ربنا ان يرزقهم الصبر الثبات

None said...

اذا احنا كنا اليومين دول بنجهز الشنط
فد لحد مايجى اليوم اللى يجهزوا هما فى الشنط
موضوع رائع
وسلاااااااااام

اروي الطويل said...

تعرفى ان بوستاتك اكتر من رائعه بكتيييييييييييير اوى فعلا انتى فنانه خلتى الواحد عاوز يعيط معلش فى يوم ها ييجى ول واحد هياخد حريتى
على فكره اتمنى اتعرف عليكى

شذى مولوتوف said...

صديقتى يالى بتحلمى بالحريه
مقالاتك كلها رائعه اما موضوع الاخوان ده فانا حاسه اننا مش لازم نسكت
انا حاسه كأن

فار رابط فيل من رقابته وساحبه
ربنا يكرمك وانا فعلا نفسى نكون اصحاب على الميلات بجد

انى احبك فى الله
واتمنى انك تزورينى على المدونه

عبدالمنعم محمود said...

الاخوة الكرام المعلقين في البداية انا استخدمت الشنطة دي مرتين أول مرة هي جاتلي اني قبض علي من ميعاد والتانية انا الللي نزلت اشتريتها بنفسي لا ن وضعت في قضية وقررت اسلم نفسي
المهم يا سادة يا افاضل انا مش بنكر طبعا الاسباب وقدر ربنا
واللي الحمد لله انا عن نفسي قابل بيه
لكن فين الاخد بالاسباب
لحد امتي نقعد نتكلم عن المحنة
لابد من ان يكون فيه يوم نتكلم دورنا تجاه رفض الظلم
لازم يكون لينا صوت مسموع نقوله للنظام

لاخوان القيادة يعني اللي هي صامته عشان احنا عايشين في تنظيم ابوي
هو عامل زي الاب اللي خايف علي عياله
لازم نقول للاخوان اننا حركة مصرية عشان مصر مش عشان الاخوان
واحننا مقررين التضحية من زمان
يبقي سيبونا نعبر عن قضيتنا في الشارع
وبالصوت العالي نخرج ونقول وكمان نقوله ل للنظام الفاسد ده لا ومليون لا
يا جماعة انا خلاص مخي مشلول وعاجز التفكير بسبب الصمت
محدش قادر يحس باللي بفكر فيه
نموذج واحد بس من الناس اللي مسجونة
ايمن عبدالغني وهو امين قسم الطلاب بالجماعة انا اتعرفت عليه في القضية الاولي لي في 2003 لما اتقبض عليه معاه في الميعاد وعرفت ان دي كانت المرة الخامسة في حياته
وبعد كده اتقبض عليه في نهاية 2003 مرة تانية
وبعد كده دخل معايا في القضية في عام 2006
وبعد كده اتفبض عليه في القضية دلؤت
للمرة السابعة
لحد امتي حنفضل نقول حسبنا الله ونعم الوكيل ونسكت ونروح ننام في بيوتنا
زي الخرفان منتظرة الجزار الي جي يدبحها
انا امي بتتصل بي يوميا من مرتين لثلاثة لتتطمئن علي انه حتي اخر مكالمة لم يتم القبض علي
وده نموذج ناس كتييير اوي
يل ريت نبطل نحسبن وبكون لينا موقف

Anonymous said...

شوفى ياستى
دولة الظلم ساعة ودولة العدل الى قيام الساعة

المشكلة ان احنا اللى اتدبسنا وعيشنا فى الساعة بتاعت الظلم

هانعمل ايه بقى ؟
كتبت علينا خطى ... ومن كتبت عليه خطى مشاها

والله دايما أسألنفسى الناس دى بتجيب الاصرار العجيب ده منين؟
وده اللى مخلينى معجب جدا بالاخوان

عمر عاشق القرآن said...

أكيد الاخوان مش بيحبوا المحن ولا الاعتقالات ولا بيحبوا التعذيب والاهانة .. مفيش حد بيحب يتبهدل ..

لكن الاخوان أصحاب مبدأ و صاحب المبدأ لا يعبأ بما يمر به لأنه فى النهاية سيحقق غايته ..

غايته مش ان البلد تبقى كويسة لا غايته هى الجنة


اه نسيت أقولك المدونة جميلة واضافة فى عالم الاخوات

حلم الحرية said...

fnan_geology

تعتقد اليوم ده جاي؟؟؟؟؟؟؟؟؟؟؟؟؟؟؟؟؟؟

اروى الطويل
جزاكي الله خيرا
لو اعرف ان بوستاتي حتخليكي تعيطي مكنتش عملتها ...انا اقدر برضة

مستنية اتعرف عليكي

shozy85 said
احبك الذي احببتني فيه
اساسي طبعا ان شاء الله اننا نبقي صحاب
اما بقي زيارة المدونة ...جاري التنفيذ يافندم

حلم الحرية said...

عبد المنعم محمود

حضرتك في كلامك وضعت ايدك علي النقطة اللي اقصدها

احساسك وانت بتمر باللحظات دي سواء وانت بتجهز الشنطة
او من الناحية التانية لما جهزوهالك
ودي ممكن اتكلم عليها اناعلي اعتبار اني شاركت في تجهيز شنطة اخويا لما اعتقل ايام اعتصامات القضاة

احساس بالظلم ماليك
احساس مستمر بالقلق وعدم الامان زي اللي بيخلي والدة حضرتك تتصل مرة واتنين تطمن

احساس بالعجز ...
وده بالذات بقي بيقتلني ..اني ادام كل ده متكتفة ..مفيش حاجة بايدي اعملها

زي ما حضرتك قلت راسي بينفجر مع كل لحظة تفكير
جايز نكون مش بنحسبن وبس وبنقوم بادوار قليلة بس مش كفاية
انا باكتب كلامي ده..بعد ما بلغونامن كام ساعه خبر اعتقال خالي ضمن المعتقلين من اخوان الاسكندرية
طب رد فعلنا ايه؟؟ لا شئ
عملنا ايه؟؟لا شئ..
عجز عجز عجز
مش بقوولكم احساس يقتل

عايزة اعمل حاجة ..

ايوةالاب دايما عنده مبررات لخوفه علي اولاده
ايوة في ثقة في اخوان القيادة
..بس مش عارفة.. حيكون طبيعي ومتفهم لو طلب الاولاد من ابوهم انه ميخفش عليهم
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

حلم الحرية said...

حسن محمود
ايوووووووون ..
هو ده التفسير ... احنا اتدبسنا وعشنا في الساعه بتاعه دولة الظلم

بس هانت ان شاء الله بكرة تيجي دولة الحق ونتمتع بيها...و لو احنا متمتعناش اكيد ولادنا ان شاء الله حيتمتعوا بيها


omar مشروع بطل
فعلا اصحاب المبدا لا يعباوا باي عقبات في الطريق
طالما هدفهم غايتهم ادام عنيهم

sharkawoo said...

واحد صحبي لسه متأخذ والده من يومين مع ال 81 واحد

الباب خبط الساعة 1.30 فهو كان صاحي فوالده صحيت فأول حاجة بتقولهالوا أمن الدولة

قالها آه :)

فدا أصبح طبيعي ...

ولكن ما أشعر بيه إنه نوع من الجهاد....

ونوع من المرابطة.....

أعاننا الله عليها وأزاح عنا تلك الغمة....

مريض نفسى said...

من وصايا الامام الشهيد حسن البنا احياء اللغة العربية والمحافظة عليها
ارجو مراجعة الاخطاء الاملائية فى العنوان للضرورة
حياك اللة ورعاكى يا اختاة

انحلت سيور العربه وسقط المهر من الاعياء said...

السلا م عليكم

هى سنه من سنن الله ليميز الخبيث من الطيب
والاخوان هم با قة الو رد وعطر اليا سمين وامل ه>ه الا مه اللهم فك اسر هم
تحيا تى

Anonymous said...

سلام عليكم,,

أولا التدوينة راااااائعة .. ثانيا بحس اننا فى ناحية مهملنها أوى يا جماعة..هيه توعية الناس..أو يمكن لأنى حسه انى مقصرة فيها فشايفة ان الكل مقصر..الله اعلم
ألاف وملايين مش فاهمين يعنى ايه تعديلات دستورية ولا خطرها ولا كل البهدلة دى ليه وانها مش حاجة بسيطة..

كام واحد لسه مش عارف فكر الاخوان بشكل واضح

كام واحد لسه عايش فى دور أكل وشرب ونوم بدون محاولة وضع نفسه فى أى مجال للاشتباه

كل دى ناس عاوزة مجهود مننا ودراسة لشخصايتهم وازاى توصل افكارنا إلى حين ميقتنع الاب ان الاولاد مش خايفين , وكبروا شوية ممكن نوجه جهدنا للفئة دى..بس يارب نوفيها حقها لانها هى الأغلب

www.elfagreya.blogspot.com

IBN BAHYA - إبــن بهيـــــــــــــة said...

بجد إحساس فظيع للجميع .. وطبعا كما تفضلت افتقاد كامل للأمان والحياة العادية كبقية خلق الله .. هي ضريبة يدفعها الإخوان منذ ستين عاما ومازالوا وسيظلون يدفعونها من حياتهم وحياة أسرهم إلى أن يقضي الله أمرا كان مفعولا

ربنا يهد المفتري ومن وراءه واللي جنبه كمان
تحياتي

IBN BAHYA - إبــن بهيـــــــــــــة said...

تعليق صغير عل تعليق صغير
الأخ الكريم محمود سعيد
تعليقاتك تعجبني
شكرا لك

Anonymous said...

سلام
انا واحد من ميليون ايراني كتبت عقايدنا في الصفحات الوب. لكن في الايران نحنلا حريه و لا قانون في القرائات النصوص الانساني. مثلكم: انا احب الحريه و نشاط. بارك الله
العزره انا لا اسسلط باللغه العربيه بنحو الجيد. لكن بالفارسيه اكتب هذاالجملات: ما ايراني هار ا در مبارزه براي آزادي همواره همراه و يار خود بدانيد.
adres: avareh58.bliogfa.com

Anonymous said...

المدونه جميله جدا جزاك الله خيرا اما بالنسبه للكلام عن المحن يا جماعه الاخوان حياتهم كلها محن عادى يعنى انا الصراحه الاخوان ملهاش طعم من غير المحن دى ثانيا لابد من الابتلاءات هى دى سنة ربنا كده والا كان نشك فى انفسنا لو لم نبتلى بالمحن والاعتقالات فدا شىء اساسى فى دعوة الاخوان وعاملين حسابه المهم يا صاحبة المدونه خللى بالك من نفسك واسالكم الدعاء السلام عليكم

Anonymous said...

اخوكم فاتح روما ابوزياد

حلم الحرية said...

supato0sharkawoo...
فعلا رباط وجهاد...بندعي ربنا نكون اده

مريض نفسى ...
لو في اخطاء املائية ..نعتذر عنها لانها اكيد جت بدون قصد
بس انا مش فاهمة العنوان فيه ايه؟؟؟

الجحيم هو الحقيقه ...
حاستعير كلمتك واكملها من عندي
الاخوان ورد تصر الدولة علي قذفه بالاحجار

حلم الحرية said...

الفجرية ...
ده المفروض دور كل واحد
لو مش في ايدينا نخرج مظاهرات او اعتصامات فاقل الادوار هو نشر الموضوع بين الناس

IBN BAHYA

ربنا يهد المفتري ومن وراءه واللي جنبه كمان

اميييييييييييييييييييييييييين
من قلبي باقولها

حلم الحرية said...

الاخ الايراني او الاخت الايرانية
بداية سعيدة جدا بمرورك علي المدونة
ولو اني مفهمتش الكلام المكتوب بس برضة سعييييييييييييييييدة جدااااااااا

فاتح روما ابوزياد
فعلا نشك في نفسنا لو مفيش محن
اصله طريق جهاد واحنا اختارناه
ازاي يكون جهاد من غير محن

همسة قلم said...

كلمة الاخ فاتح روما ابو زيد فكرتني بكلمة قالهالي الحاج فرج النجار احد الرعيل الاول للاخوان اثناء حوار كنت عملته معاه من فترة عن قصة للامام البنا كان في زيارة لاحد القرى تبع محافظة المنوفية والناس استقلت الامام بالطبل والزمر وفرحة طاغية علشان الامام البنا رايح يزورهم وكان فيه مسجد صغير في بداية القرية فطلب انه ينزل يصليركعتين فيه ولما نزل وصلى جلس يبكي بكاء شديد ويناجي الله ويقول هو انا مش على الطريق الصح كل الانبياء كانوا الناس بيقابلوهم بالطوب والضرب وانا الناس بتستقبلني فرحانة بالطبل والزمر يارب انا عملت حاجة غلط علشان الناس تستقبلني بالصورة دي؟؟؟؟؟

فهمتي حاجة اختى الحبيبة ..الامام البنا لما حس انه مافيش محنة ومافيش اعتراض ومافيش ناس بترفض دعوته والناس بتستقبله زي ما بيقول بالطبل والزمر حس انه فيه حاجة غلط رغم انه ماكنش غلط
فياترى الاعتقال اللى بيتعرض ليه افراد الدعوة الان مش رسالة اننا على الطريق الصح

وعشت كتير مع والدي الله يرحمه وشنطته جاهزة ومتوقعين هجومهم في اى لحظة واى وقت بعد خروجه من المعتقل في قضية 95 المشهورة
ومع ذلك بحس اني مخنوقة من السكوت ولما بشوف الشرفاء والناس اللى زي دول ورا القضبان واحنا مهما عملنا اما بتتكمم افواهنا او بيعتقلونا او بيخوفونا
عامة الظالم ليه يوم واحنا بقى مستنيين اليوم ده :)

معلش طولت عليكي
أسماء

حلم الحرية said...

همسة قلم
طولتي ايه بس يا اسماء البيت بيتك اصدي المدونة مدونتك
فعلا عندك حق...احيانا بنلاقي كل حاجة ماشية تمام والدنيا جميلة ووردية ساعتها نقلق ..احنا اختارنا طريق جهاد لو مفيهوش صعاب يبقي ازاي جهاد

جزاكي الله خيرا عالمرور يا اسماء