Friday, February 23, 2007

شعار المرحلة ...الاصلاح ..راح راح


حراك سياسي ...معارضة ..مظاهرات ..اعتصامات ...لافتات ..ونداءات ...
عايزين

اصلالالالالالالالالالالالالالالالالالالالاح


واخييييييرا الحكومة سمعتنا ( اينعم الموضوع طول عقبال ما سمعتنا معلش اصلي سمعها تقيل حبتين ) لكن اخييييييييييييييرا قررت الحكومة انها تتنازل وتعمل اصلاح في البلد

نصحي في يوم نلاقي الرئيس بيقدم باقتراحات لمجلس الشعب بشأن بتعديل الدستور


جميل جدا هوه ده اللي نادينا بيه كتير
الدستور فيه بعض المواد المكبلة للحريات ولازم طبعا تتعدل



وتيجي التعديلات وتيجي معاها الصدمة

نلاقي اللي المفروض يتساب بيتعدل
واللي عايز يتعدل سابوه

اوضاع مختلة في وطن موجوع
********

مادة زي المادة 77 الخاصة بتحديد مدة لبقاء الرئيس في منصبه الكل مجمع علي تعديلها ...لكن نلاقي مواد كتير تتعدل وتفضل 77 قاعدالنا مبتتغيرش
الكل يجتمع علي عدم المساس بالمادة 88 ..ونلاقيها بتتعدل ويتلغي معاها الاشراف القضائي


مش باقولكم اوضاع مختلة في وطن موجوع

********

كله كوم والمادة 76 دي كوم تاني تتعدل مرة عشان التمديد وبعدها بسنتين تتعدل تاني عشان التوريث
واحنا قاعدين بنتفرج

فعلا اوضاع مختلة في وطن موجوع

********
لا وتجيلك المادة الخامسة ...حيضيفوا عليها فقرة تحظر اي نشاط ديني ومحدش يقول دي جاية عشان الاخوان
يا جماعة احنا كده كده جماعه محظورة يعملولنا قانون جديد ليه...المادة دي بتقول لاي مواطن ناوي يعمل اي نشاط ديني من اي نوع ..انسي(مع ان نفس الدستور بيقول ان الاسلام هو الدين الرسمي للدولة )!!!؟


*********

اما بقي المادة الكارثة 179 ونص قانون مكافحة الارهاب
دي بقي بتقول للشعب بحاله.. احساس الامن انتهي ...
لا حرمة بيوت ولا حرمة للحريات الشخصية ولا هواتف ولا مراسلات
من هنا ورايح حياتك مذاعة علي الهواء مباشرة عند الامن لو هما عايزين


********

علي راي استاذ صبحي صالح

النظام مذعووووووووووور

خااااااااااااايف

خايف من الاسلاميين...راح حط فقرة تحظر اي نشاط ديني

خايف من الاحزاب ....عندنا قانون احزاب لسان حاله بيقول ابقي قابلني لو عملت حزب

خايف من العمال..عدل 11 مادة تمهيدا لالغاء الاشتراكية

خايف من القضاة فعدل المادة 88وبيها يبقي لغي الاشراف القضائي علي الانتخابات

خايف حتي من افراده ...بمعني تاني خايف من نفسه...وعدل المواد 85,84,82 علشان ميكونش له نائب


يعني نظام خايف من الاخوان
وخايف من العمال
وخايف من القضاة
وخايف من الناس كلها
وخايف حتي من نفسه
خايف من كل ده وقال بيسمي اللي بيعمله تعديلات

**********

تعديلات ايه دي اللي تيجي وتجيب معاها الاعتقالات والمحاكمات العسكرية ومصادرة الاموال واغلاق الشركات وقمع الحريات


اللي لاحظته وفهمته

ان التعديلات جت صحيح

لكن

الاصلاح

راح راح




تنويه مهم اوي خالص جدا

سعادة فخامة حضرتي مستعدة لتلقي اي اقتراحات او اعتراضات علي اي غلطات قانونية ممكن تكون جت في الموضوع...اصلي انا بعيد عندكم تخصصي صيدلة..واللي كتبته ده جبته من قراية او سماع ..من الاخر ...متدقوش علي اي غلط

37 comments:

Anonymous said...

السلام عليكم
مفيش شىء هايروح باذن الله وانما التقصير منا نحن لابد ان نعمل بجد اكبر واجتهاد الغلط فينا مش فى غيرنا
ثانيا لازم نتوقع كده شىء طبيعى اللى بيحصل ده والا مكنش ده بقى الحزب الوثنى الدينوصرانى
المهم احنا فين
مينفعش نسكت ومينفعش نمل من المطالبه بالاصلاح
لانه لو سكتنا على كده هم هايفرحوا جدا لانه ده اللى عايزينه هم المهم نشتغل ومحدش يياس يا جماعه
كده الشغل بجد هايحلو اكتر
وتوقعوا مزيد من المحن الفتره القادمه
اخوكم ابوزياد فاتح روما

Anonymous said...

اختى الكريمه
الكلام كله اللى كاتباه ده مش قانونى
كده انت بتسبى النظام
وبتسبى الرئيس
وكده تتعرضى للحبس لمدة ست اشهر
اما لة سببتى دين الله
تاخدى مكافاه
متستغربيش اصله احنا فى دوله بيقولوا انها اسلاميه ودستورها من الاسلام جاى
مع انى اشك فى ذلك
دستور بيقول انه رئيس الدوله اعظم من دين الله
دستور اخر زمن
اما موضوع مش تخصصك فدا عادى يعنى
ماهو فى كتير اليومين دول بيتكلموا وبرضه مش تخصصهم
مثل فاروق حسنى
عمل نفسه شيخ وراح يسب فى الحجاب
ماهو مش متخصص برضه ولا ايه؟
وكمان الريس بتاعنا
متخصص بس فى العسكريه والطائرات
راح مسك دوله بحالها وحكمها وبرضه مش متخصص
بالزمه ده كلام برضه
وكمان سوزان مراته
اكيد عارفنها طبعا
متخصصه غسيل وطبيخ راحت اتخصصت ومسكت برضه الدوله تامر وتنهى براحتها
مع انها مش متخصصه
ولسه
اللى يعيش ياما يشوف ربنا يخلعنا منها على خير بقى وخلو بالكم من نفسكم
اصله الامن كده كده
هايشوفكم ويراقبكم
سواء بقانون او من غير قانون
سلام عليكم
اخوكم فاتح روما ابوزياد

Anonymous said...

معلش انا كلامى كتير بس باصدق ما القى فرصه وافضفض فيها شويه لانى مشحون بصراحه على الاخر نسالكم الدعاء
الاسلام هو الحل شرع المولى عز وجل

AbdElRaHmaN Ayyash said...

والله راح
ومعادش منه غير سراب
اما بالنسبة لتعديات القوانين
فدي حكايتها حكاية
ربنا يستر ويمنعوا احتفال ليلة القدر وللا مولد النبي صلى الله عليه وسلم لأنه نشاط ديني
دولة تعبانه

None said...

ادخل عندى ضرورى جدااااااااااااا
وانصر الطلبه المفصولين

وسلاااااااام
https://www.fnangeology.com/

عمر عاشق القرآن said...

اللى تحرك من أجل الاصلاح هما الاخوان بعض الحركات المدنية وبعض المثقفين مش الشعب

تحرك حوالى 3% من الشعب فقط

الاصلاح لم يأتى الا اذا تحرك الشعب كله

"ان الله لا يغير ما بقوم حتى يغيروا ما بانفسهم"

طول ما الشعب سلبى لن يتغير شىء
والاصلاح فات فات و فى ديله سبع لفات

daktara said...

دي اول مره ليا هنا بس انا سعيد جدا جدا اجدا بيكي
ارائي عن الاخوان ستيجدينها في مدونتي
والي الامام دائما

شــــمـس الديـن said...

بصراحة

احسن رأي عجبني هو رأي عمر مشروع بطل

هو معاه حق ... شعب مصر الحقيقي متكلمش ... و مش عارفة ايه اللي هيخليه يتكلم , لما يتسحل ولا ايه بالضبط

علي فكرة الحكومة بقت ممشاية البلد علي مصلحتها و بتفصل دستور مش العكس ...

بس انتوا مش ملاحظين حاجة ؟؟؟ ان التدوين خلانا نسمع اصوات كتيرة و نسمع بعض اكتر من الاول ... علس الاقل كل واحد مش بقي حاسس انه لوحدة و دي في حد ذاتها ميزة

عامة
ربنا يستر و سعيدة بمروري علي مدونتك :)

إبـراهيم ... said...

إزيك يا مروة ، يا واحـدة من الإخوان !!!! ، مش المفروض يعني تكتبي إنـك من الأخوات :)



تعرفي إن حدسي طلع صحيح !!!


أصل دماغي قعدت تودي وتجيب ، مين يا ترى ؟؟؟1 من الإخوان !!!!!



طبعًا أنامعرفكيش



حتى يثبت العكـــــس :)


سلاااااامي لصمصم

Anonymous said...

والله انا زهقت

انا بقالى سنتين او تلات سنين تقريبا متابع القرف ده وكل يوم الحال فى النازل ومن أسوأ لأسوأ واللى كنا بنشتكى منه من 3 سنين دلوئتى بنقول ياريته فضل وبقى

قبل كدة كنت عايش مريح دماغي من كل ده...اينعم ماكنتش عيشة بل كانت حاجة حيوانية كدة...زي اى شاب مصرى ماهو مقضى حياته...مش فارقة بأة بيعمل اية او عايش ازاى او هدفه اية المهم انه بيضحك وبيستمتع باللحظة اللى هو فيها وخلاص....هنقضى الليلة على قهوة اية يا شباب؟ هنروح فين النهاردة؟ وخلاص هو ده اكبر أمل فى الحياة...ولو فيه امل تانى هيكون دنيوى يعني موبايل جديد رنة حلوة او تى شيرت جديد وخلاص...صحيح هى حيوانية ومالهاش معنى الحياة بالشكل ده...بس فيها راحة دماغ..

دلوئتى بأة....كل يوم مواقع الاخبار والعربية والجزيرة واخوان اون لاين والمصرى اليوم وتقارني كل ده بالاهرام والجمهورية تلاقى البون شاسع والصدع عميق والشق متسع ولا يوجد ما نعبر عنه بكلمات سوى حسبنا الله ونعم الوكيل

كل يوم مصيبة جديدة و للاسف اتعلمنا من حكامنا بقت كل حياتنا -مواطنين- بنشجب ونستنكر..
اية ده؟ هو كيلو البصل بقى ب 5 جنية؟ منهم لله
اية ده؟ والطماطم بقت ب 2.5 جنية؟
منهم لله
واللحمة غليت والسمك غلى والفراخ مفيش؟
حسبنا الله ونعم الوكيل
اية ده كمان؟ وكمان ننوس هيورثها؟ ربنا عالظالم

الخ الخ الخ...

طيب والحل يا أختاه؟

حاجة من اتنين
اما نتحرك ونعمل حاجة-وطبعا الخروج على الحكام ممنوع وحرام فى عقيدة أهل السنة والجماعة والخروج يشمل المظاهرات والاعتصامات والمنشورات والخطب التهييجية للجموع كما يكون الخروج بالكلمة (كما حدث عندما قال زعيم الخوارج الذي خرجوا من ضأضأه -عبد الله بن سبأ- اعدل يا محمد فكان هذا خروجا بالكلمة وعده العلماء خروجا صريحا )

او الحاجة التانية نصبر ونحتسب ونقوى علاقتنا بالله اكتر وده الطريق الاصح وهو طريق الانبياء-استعينوا بالله واصبروا- وده اللى عمله الامام احمد بن حنبل ساعة المحنة عندما اجبر العباسيون الأمة على المقولة الكافرة بأن القران مخلوق وعلموها فى المساجد فكانوا بذلك واضحي الكفر ولكن الامام رفض دعوة علماء زمانه بالخروج على العباسيين وكذلك فعلا عبد الله بن عمر رضى الله عنه فى زمن الحجاج الطاغية المبير وووو والامثلة كتير

فيه بأة حاجة تانية بتحصل للاسف للبعض

وهو الارتداد تانى لما كان قبل ما كان والرجوع القهقرى لزمن الدعة والهوان وهو : نقضيها وانسى وبلاش نكد وبلاش نشيل هم احنا هيجيلنا الضغط من متابعة كلام الحكومة ده يا عم..ما تيجي ننسى ومانقرفش نفسنا..تعالى نوعد بعض ما نفتحش موقع اخبار تانى ....بس اللى الايجابية نورت جواه عمرها ما هتنطفى يا أختى

وعموما ربنا يهدينا أجمعين حتى يرتاح بر أو يستراح من فاجر

والله المستعان

إنسان || Human said...

واضح ان دمك محروق جامد ..........الأحوال مشقلبه اللي بالطول بقى بالعرض ...يارب تكون المرحله الأخيرة لأن لما الفرخة بتدبح بتفرفر بتضرب في كله

Anonymous said...

السلام عليكم
الشعب كله كاره النظام وتعب من اللى بيعمله ده لكن الناس كلها خايفه
لازم نكسر حاجز الخوف ده فى نفوس الناس دى
فعلى الاخوان اخلاص النيه لله وحده والعمل من اجل دين الله
لانه كل اللى بيحصل لنا ده من عدم الاخلاص
لازم نعمل اكثر منهذا
فين الاخوان وفين شغلهم
لازم الشعب ده يصحى بجد
التوعيه الجاده والعمل الدؤب المستمر
بكل الوسائل
باحلم لو عاد الاسلام يحكم من تانى
ويخلى صحارى الاوطان خضره وامانى
اسالكم الدعاء اخوتتى
فانا فى امس الحاجه له تلك الايام
ونسال الله الاخلاص والثبات
اخوكم ابوزياد الفاتح

Anonymous said...

ادعو جميع اخوانى واخواتى بعدم الياس
لا تياسوا فنصر الله قريب
ثانيا لماذا تنتظرون النتائج
اعملوا فقط من اجل الله ولدين الله فقط
اما النتائج فهى على المولى عز وجل
لا تنتظروا اى نتيجه

فقط اعملوا لرفعة هذا الدين والنصر من عند الله
عدم الياس والتمسك بالامل هو شعار المرحله المقبله
وياما دقت على الراس طبول
وايه رايكم بقى
دعوة الاخوان مالهاش طعم من غير اللى بيحص ده
دا اختبار
هانشوف فيه انفسنا
هل نحن نعمل بحق لدين الله ولا مش شغالين اصلا
والاسلام هو الحل شرع المولى عز وجل
اخبرنى استاذى يوما عن شيئا يدعى الحريه
فسالت الاستاذ بلطف ان يتكلم بالعربيه
اخوكم ابوزياد الفاتح

واحـــد مـــــن الـنـــاس said...

مفيش فايدة
لا اصلاح ولا بتاع

التغيير
والتغيير فقط

حلم الحرية said...

aboziad alfateh ...
واضح ان حضرتك مشحون فعلا
اما بقي كوني باسب النظام وحاخد ست اشهر
مش عارفة اقول ايه
... فعلا كده حضرتك طمنتني

AbdElRaHmaN ...
الدولة مش تعبانة وبس...دي في الرمق الاخير وحتموت لو ملحقناهاش

omar مشروع بطل ...
هيه دي المشكلة
3%بس من الشعب اللي قررت تتحرك طب طب والباقي؟؟.. هل مش حاسين بالكارثة اللي جاية ؟؟
وللا يمكن مش عارفين؟؟
وللا جايز عارفين وخايفين؟؟
في جميع الحالات هيه مشكلة ان 3%بس من الشعب اللي يتحرك بينما الباقيين نايمين في العسل
ساعتها ييجي دور كل واحد فينا في نشر الموضوع ..
ومتهيالي دور مش سهل ولا صغير

حلم الحرية said...

daktara ...
سعيدة باول زيارة لحضرتك هنا
نتمني لو تتكرر الزيارة
احنا رافعين شعار زورونا تجدوا ما يسركم ...بس انتوا زورونا

شــــمـس الديـن...
عندك حق راي عمر مشروع بطل فعلا نقطة مهمة تستاهل انها تستوقفنا كلنا
اما بخصوص التدوين ..هو خلانا نسمع بعض ونعرف افكار بعض ونتلاقي بافكارنا يمكن اكتر ما بيحصل عالواقع
وده جميل في حد ذاته
سعيدة بمرورك يا شمس


إبـراهيم ... معـايــا ...
من الاخوان ..من الاخوات ..متفرقش كتير ..كلها حرف واحد

حلم الحرية said...

islamist Bloke said...

لا لالالا...مينفعش نزهق
لو زهقنا يبقي حققنلهم اللي هما عايزينه
مش حنزهق ولا حنمل
مش حنتعب ولا حنكل
مش حنتنازل عن حق مصر اللي استباحوه لنفسهم
واللي مننا كان في يوم مش همه حاجة ولا بيفكر في حاجة ...مينفعش يرجع زي ما كان
لان زي ما حضرتك قلت ..اللي الايجابية نورت جواه عمرها ما حتتطفي تاني
اما بخصوص الحلول المتاحة ..ايوة حنصبر ونحتسب
لكن برضة حنشتغل عشان مصر
بنشر الموضوع خصوصا ان زي ما اخونا عمر قال النسبة اللي اتحركت 3% بس
حنفهم الناس ونوعيها
ولو متاح نقول لا بصورة سلمية في اعتصامات ومظاهرات ومؤتمرات حنقولها

Human said...
مش دمي انا بس اللي محروق
ده دمي ودم الشعب كله
حلو اوي تشبيه حضرتك الفرخة لما تدبح بتفرفر وتضرب كله
فعلا اشد لحظات الليل ضلمة هيه اللي قبل النور
وان شاء الله النور جاي...هانت خلاص
...بس احنا نصبر علي اخر لحظة ضلمة

حلم الحرية said...

aboziad_alfateh ...
اخبرنى استاذى يوما عن شيئا يدعى الحريه
فسالت الاستاذ بلطف ان يتكلم بالعربيه

بصراحة البيتين دول في الجووووووووون
كلمة حرية اختفت من قاموسنا العربي
ياتري امتي تعوووود؟؟


واحـــد مـــــن الـنـــاس ...
الخوف انهم يقرروا التغييير
لكن يكون التغيير من الاب الي الابن
وساعتها لا عزاء للشعب المصري في القيدة مصر

أُكتب بالرصاص said...

اول مرة اكتشف المدونة دي
وحبييت احيييكي عليها

أممكن ؟

أحمد عبد الفتاح said...

aأنا سعيد جدا اني بقرا مدونه لاخت
هو الموضوع اتاخر بس جميل
ربنا معاكي
وشدي حيلك

Anonymous said...

شوفى ياستى
هو من الأول مكنش فيه اصلاح علشان يروح

وانا حقيقى مش عارف الاخوان ليه ساكتين هموا اللى ممكن يحركوا الشعب
انما والله أعلم الشعب خلاص مابقاش فيه حيل انه يعمل اى حاجه

ربنا يستر علشان التعديلات دى بتفكرنى بأيام السادات لما كان القول السائد انا هافرمك بس بالقانون

ده شكل حلم الحرية بعيد قوى
بس خير
خلينا وراه
ورانا ايه
سلام

Anonymous said...

السلام عليكم ورحمة الله
طبعا حضراتكم شايفين اللى حاصل فى مصر والتعديلات الدستوريه
طيب هنعمل ايه دلوقتى
لازم نقوم بحمله لتوعية الناس باللى هايحصل واللى هايجرى
والا اذا تمت الموافقه على التعديلات دى
هتصبحوا الصبح كده هتلاقوا جمال باشا اصبح ريس
وبيحاول يعمل تعديلات علشان ابنه يمسك برضه بعده
وكمان مدونة حضرتك دى وغيرها
هتتشمع بالشمع الاحمر
لانها تعتبر من الانشطه السياسيه والدينه التى ستحظر
اما معنى الحريه
فدا شىء اكيد انها راحت خالص من القاموس العربى العربى
واصبحنا ناكل الفول بطعم الذل والاهانه
ونحلى كمان بالظلم
ونشرب مياه الاستبداد
ونلبس ملابس القهر
ونركب سيارة او اتوبيس الخنوع
ونتعلم سياسة الصمت ونستريح فى مظلة
التدهور
ونمشى على طريق الانحلال
ونصطاد فى بحار وانهار الغربه فى اوطاننا
ونذاكر فى كتاب التوريث
بدلا من كتاب التاريخ
ونمتحن فى لجان التعذيب
ونسكن فى المعتقلات والسجون
ونتغطى ببطانية الهوان
ونستشق هواء القهر
ونعالج فى مستشفيات الاستبداد التخصصى
ووننام على سرير الامنيات
ونحلم باحلام الاسلام
وقد نسيت طعم الاكله اللذيذه التى هى الوحيده القادره على اشباع الجوعى واطعام الشعوب
الا وهى الحريه
نسينا طعمها
حتى اصبحت اجسامنا
ناقصه العناصر الحيويه والفيتامينات الضروريه للحياه
الا وهى
فيتامين ح ر ي ة
اى فيتامين حريه
ورغم كل ذلك ما زلنا ننادى بالحريه
وسندرجها فى القواميس العربيه
وتذكروا لايغير الله ما بقوم حتى يغيروا ما بانفسهم
وحسبنا الله ونعم الوكيل
اخوكم ابوزياد الفاتح

Anonymous said...

لكننا رغم هذا الذل نعلنها
فليسمع الحر وليصغي لنا البشر

إن طال ليل الأسى واحتد خالبةُ
وأرق الأمة المجروحة السهر

فالفجر آتٍ وشمس العز مشرقةٍ
عما قريبٍ وليل الذل مندحرُ

سنستعيد حياة العز ثانيةّ
وسوف نغلب من حادوا ومن كفروا

وسوف نبني قصور المجد عاليةً
قوامها السنةٍ الغراء و السورُ

وسوف نفخر بالقرآن في زمنٍ
شعوبهُ في الخنا والفسق تفتخرُ

وسوف نرسم للإسلام خارطةً
حدودها العز والتمكين و الظفرُ

بصحوةٍ ألبس القرآن فتيتها
ثوب الشجاعةِ لا جبنُُ ُ ولا خورُ

يرددون وفي ألفاظهم هممُُُ
ويهتفون وبأقوالهم عبرُ

من كان يفخر إن الغرب قدوتهُ
فنحن قدوتنا عثمان أو عمرُ

أو كان يفخر بالألحان ينشدها
فنحن ألحاننا الأنفالُ والزمرُ

درب الجهاد لِزاماً في عقيدتنا
والناصر الله منه العون نتتظرُ

بيتنا القديم said...

كل ليل لازم يكون له نهار

وكل اول ويبان له آخر

وهيجي بكره مهما دائت علينا

Anonymous said...

الولد الصغير الفلعوص
اللي طالع من البيضة بيصوص
بعد ما ضيع القطاع العام وراح للخصوص
و البنوك اتشفطت منها كل الفلوس
أصله شويه كده لسه مأموص
لأنه عاوز ياكل كل حاجة حتى العصعوص
فأبوه حيساعده و يغير له كل النصوص
و الدستور حيبقي بالكلمات له مرصوص
و حيقعد و يربع رجليه فوق كل الرؤوس
مصرى

Anonymous said...

اولا... صدقينى لو اتجاه الاخوان المسلمين لو من الاول غلط أو حتى أصبح غلط مكانش حد عارضه ...عشان كده طبيعى جدآ اللى بيحصل ده

تانى حاجة الحمد لله ان شعبنا لسه بخير وعنده قدرة على التمييز بين الحيتان والاخوان... وبكده لسه فى أمل ان الحق ممكن يرجع

وبالنسبة للاعتقالات وغيره من المهازل اللى بتحصل فدى ضريبة بيدفعها أى حد فى أى مكان عشان ينشر الحق .. وده يثبتلنا اننا الصح... وبيثبتلهم انو مش ممكن حيقدر يوقف ناس هدفها فى الاول والاخر ربنا

abuzeid said...

صدقونى مفيش امل فى الشعب المصرى مهما نحاول مفيش فايدة
دا الشعب الوحيد اللى هيفضل طول عمره كدا شعب مجهد وتعبان
وهوا الشعب الوحيد اللى محتل من ابناء بلده
محتل ولكن مش محتل
انا بصراحة تعبت
لم يبقى سوى الدعاء

Anonymous said...

رسالة الريس حسنى الى شعب مصر يقول فيها

والله يا شعب هاوريكم
وفوق دماغكم لأديكم
ذل وخضوع ... رضى وخنوع..وعلى الحديدة هاخليكم
لا حد هايقف في طريقي...وإلا السجن يكفيكم
وجمال إبني هايمسككم...وعلى كيفه هايطيح فيكم
البلد بتاعتي أنا وحدي .. و
والراجل فيكم يعارضني.. وهاخليه آية ليكم
الإخوان ليكم عبرة ..وكفاية مش هاتنجيكم

حلم الحرية said...

اكتب بالرصاص
مدونتي ترحب بحضرتك وترفع شعار زورونا تجوا ما بسركم بس انتوا زورونا


احمد عبد الفتاح
سعيدة بمرور حضرتك اتنمي مواضيع المدونة تعجبك

حسن محمود
صح ..التعديلات بتقول ان المرحلة اللي جاية حتكون كده
حافرمك بس بالقانون ربنا يستر علينا وعلي مصر
اما بخصوص حلم الحرية فزي ما حضرتك قلت
خلينا ورااااااااااااااااه
مهما طال الوقت
احنا وراااااااه

حلم الحرية said...

سمسم
صحيح كل ليل لازم يكون له نهار
اينعم ليلنا طاااااااااااااااااااااااال اوي بس اكيد النهار جاي
سعيدة بمرورك

Anonymous
كام بيت في الجون
هيه المشكلة في الواد الصغير ده
عشانه يتعدل دستور دولة بحالها
اقول ايه بس
لكي الله يا مصر

Helium Atom
فعلا ضريبة ولازم ندفعها
عمر طريق المناضلين ما كان مفروش بالورود
طريق النضال والجهاد دايما مليان اشواك
واحنا لما اخترناه كنا عارفين ان الطريق مش سهل
الحمد لله علي كل حال
ربنا يرزق الجميع الصبر والثباااااات

حلم الحرية said...

amr
لالالالالالالالالالالالالالا
متقولش مفيش امل
ان شاء الله في امل
بلاش نوصل لحالة الياس دي والا تبقي الحكومة نجحت في اللي عايزاه
ده لسه في امل ..(في امل وعمر ومحمد كمان)ههههه
مهما طال الظلام لازم النور جاي
زمهما تعبنا حييجي علينا يوم ونرتاح
وبعدين تبقي حاجات كتير غير الدعاء
تبقي الدعاء وتوعية الناس ونشر كل ما يخص الموضوع واننا كلنا نتفق علي رفض الوضع
ان كلنا نقول لا
لو كلنا قلناها اكيد ساعتها حنتحرر



aboziad_alfateh
شاكرة لحضرتك الابيات الرائعة اللي اضفتها في تعليقاتك
رسالة الريس حسنى الى شعب مصر يقول فيها

عجبوني اوي اخر بيتين
والراجل فيكم يعارضني.. وهاخليه آية ليكم
الإخوان ليكم عبرة ..وكفاية مش هاتنجيكم

نفسي الناس تفهم كده ومتحققش اللي الحكومة عايزاة
نفسي الناس تشيل الخوف من قلبها
نفسي الناس تاخد من تجربة اعتقال الاخوان صبرهم علي المحنة
بدل ما تاخد من التجربة خوف من تكرار الامر معاهم

بحب الاسلام said...

السلام عليكم ورحمة الله وبركاته
جزاكم الله خييرا على هذه الردود المفرحه شعار المرحلة هوه صلح صلح واحنا نهد بيتهيالى كده افضل
مش عارف هيه البلد عايزانا ايه بالضبط نبقى ايه شباب فاضى ومفرغ من كل حاجه ولا نبقى ايه حسبنا الله ونعم الوكيل فيك يا مبارك انت واللى معاك

حلم الحرية said...

بحب الاسلام

هما عايزينا نكون كده
بس احنا مش حننفذلهم حلمهم
حنكون جيل مثقف وواعي ..جيل يبني بلده كاجمل ما يكون..جيل حرية بلده حتيجي علي ايديه
سعيدة بمرورك عالمدونة ونتمني زيارتك تتكرر

enas said...

جزاكم الله كل خير

حلم الحرية said...

enas....
جزانا واياكم
سعيدة بمرورك علي مدونتي وبانتظار تكرار الزيارة

Anonymous said...

اختى فى الله
جميلة هى مدونتك هى اضافة الى ميثاق شرف الكتاب الى ميثاق شرف الافكار الى اضافات الاخوان المتتالية
شكر الله لك وحفظ قلمك
مصعب

حلم الحرية said...

مصعب احمد الشهيد said...

جزاكم الله خيرا اخي علي هذه الكلمات
سعيدة باول مرور لحضرتك عالمدونة
اتمني تتكرر الزيارة ونشوف تعليقات لحضرتك علي المدونة كتير