Wednesday, May 16, 2007

ياما دقت عالراس طبول



ليه بيحصلنا كل ده؟؟؟


اعتقالات...محاكمات عسكرية...مصادرة اموال..اغلاق شركات

ليـــــــــــــــــــــــــــــــــــه


؟؟؟؟؟؟

الاخوان مش هما اللي هربوا فلوس البلد برة وسرقوا البلد
ولا الاخوان هما اللي قتلوا الناس في العبارة

ولا الاخوان هما اللي حرقوا القطارات

ومش الاخوان هما اللي وقعوا الطيارة

ومش هما اللي دخلوا المبيدات المسرطنة

ولا الاخوان هما اللي بيعذبوا الناس في اقسام الشرطة

ومش الاخوان هما اللي بيكمموا الافواه وبيكبتوا الحريات ويقفلوا الصحف

ولا هما اللي بيزوروا الانتخابات

مش هما


امال لـــــــــيـــــــــــــــــــــــــــــــه


ليه بيحصلنا كده

؟؟؟؟؟؟؟؟؟؟؟؟؟؟؟؟؟؟

ايوة عارفة الاجابة لكن السؤال باطرحه مش من باب الاستفهام باطرحه من باب التعجب او الاستنكار


مخنوقة ومتضايقة

احاسيس كتير مالياني

احاسيس بالظلم وبالعجز ...بالقهر وبالمرارة

ومع كل خبر جديد بخصوص المعتقلين الاحاسيس دي بتزيد وتزيد

بيملاني احساس بالظلم وانا بتابع اللي بيحصل لعبد المنعم

وباغرق في احساس بالعجزوانا باشوف عائشة بتبكي وهيه بتنادي عد يا ابي
وبيملاني احساس بالمرارة وانا باسمع معاذ بينادي ابي انت حر وراء السدود
ومقدرتش امنع دموعي وانا باشوف دموع سارة وهيه بتسال لماذا تاخذون مني عائلتي؟؟

من كام يوم ولاول مرة من بداية الاعتقالات يتغير احساسي لاحساس بالفرحة بعد ما قريت خبر ان مجلس الدولة يبطل قرار رئيس الجمهورية بإحالة الإخوان للمحاكمات العسكرية
بعدها بسرعة وكانهم خايفين احسن بعدين نصدق ان في حاجة اسمها سيادة قانون واستقلال قضاء في ظرف ساعات يتقدم طلب الطعن وخلال ايام تعقد محكمة منتدبة من مستشارى رئيس الجمهورية والوزراء ( يعني خصم وحكم في نفس الوقت ) يعني محكمة خاصة واجراءات خاصة في يوم خاص بتنظر في قضية خاصةبعدها ييجي الحكم الصدمة

وارجع الاقي نفسي مالياني مشاعرالاحباط والعجز والظلم من تاني

لكن


لا

مش حاسيب المشاعر دي تتمكن مني

مش حاسيبها تسيطر عليا

لااااااااااااا

لاااا عالية اوىىىىىىىىى

باقولها لهم وباقولها لنفسي قبلهم

يجرالنا مهما يجرالنا

يعملوا مهما يعملوا

مش حيهمنا

مش حنضعف

مش حنبطل

مش حنسكت

مش حنمل

مش حنسافر

اعملوا مهما تعملوا

ياما دقت عالراس طبول


اعتقالات
...ياما اعتقل الاخوان...دخلوا المعتقلات وهما اخوان وخرجوا وهما برضة اخوان
لكن الفرق انهم خرجوا اقوي واشد واكثر عزيمة لمواصلة الطريق


لو علي مصادرة الاموال
..مش اول مرة تتصادر ده مجموع اللي اتصادر لغاية دلوقتي حسب كلام النائب محسن راضى 100 مليون جنيه
يصادروها لو عايزين ..

بس هما نسيوا ان الاخوان مش باموالهم
الاخوان برسالتهم
بدعوتهم ..
بجهادهم

لو علي اغلاق الشركات
ياما اغلقت شركات للجماعة سواء عام 48 أو عام 54
وايه اللي حصل بعدها..بنرجع نبني من تاني..

ازمة صعبة صحيح بنمر بيها دلوقتي
لكن وزي ما بيحصل كل مرة
حنحتوي الازمة وحنكمل من جديد
حنواصل من تاني دعوتنا وطريقنا


حنواصل بعزيمة اقوي وهمة اشد
ايوة حنكمل اقوي واشد
التجربة بتقول كده
التاريخ بيقول كده

التاريخ بيقول ان7 انظمة حكم مرت علي الاخوان
كلهم حاولوا القضاء عليها
لكن منجحوش
اصل الاخوان رساله وفكرة
والافكار مش ممكن تموت

..جايز الافراد يموتوا لكن الفكرة لا

جايز الافراد يتحبسوا لكن الافكار لا
مبتحبسهاش اسوار ولا بتقيدها معتقلات

جايز الاموال تتصادر لكن الافكار لا
مهما حاولوا يصادرواافكارنا
برضة الافكاربتنتشر
من الاخر يعملوا فينا مهما يعملوا
طالما في سكة ربنا
مش حيهمنا
طالما عشان خاطر مصرنا
مش حيهمنا


احنا اختارنا الطريق ده واحنا عارفين انه طريق جهاد
اختارناه واحنا عارفين ان طريق الدعوات دايما مليان محن وابتلاءات
اختارناه واحنا عارفين انه محتاج صبر وتضحيات
اختارناه واحنا عارفين انه مش حيكون مفروس بالورود
كنا عارفين اننا حتقابلنا فيه صعوبات واشواك
حتقابلنا لكن حنصبر عليها
سنصبر لاننا نعلم كلما زاد الابتلاء زاد الثواب ان شاء الله
سنصبر ونصبر ونصبر
سنصبر حتي يعجز الصبر عنا

من هنا ورايح
مشاعري اللي فاتت حاستبدلها بمشاعر تانية

مشاعر

امل
و صبر

وثبات

وعزة
واصرار علي الاستمرار

واخيرا رجاء ودعاء ان نكون ممن قال الله عز وجل فيهم
(إنه من يتق ويصبر فإن الله لا يضيع أجر المحسنين)
سمعت نونية القرضاوي ولقيتها بتعبر بالظبط عن اللي جوايا ..اسمعهوها معايا واقروها ...واخيرا قبل ده وده عيشوا معانيها


صبرا أخي في محنتي وعقيدتي*** لابد بعد الصبر من تمكين
سنعود للدنيا نطبب جرحها***سنعود للتكبير والتأذين
تالله ما الدعوات تهزم بالأذى *** أبداً وفي التاريخ بر يميني
ضع في يدي القيد ألهب أضلعي *** بالسوط ضع عنقي على السكين
لن تستطيع حصار فكري ساعة *** أو كبح إيماني ورد يقيني
فالنور في قلبي وقلبي في *** يدي ربي وربي حافظي ومعيني
سأعيش معتصما بفضل عقيدتى *** وأموت مبتسما ليحيى دينى



ملحوظة صغيرة

الموضوع ده انا نزلته قبل كده وبعدها بساعتين رفعته عالدرافت عشان كان محتاج تعديلات ...خلال الساعتين دول اخونا محمود سعيد كان دخل وكتب تعليق ..ومشكورا صحح لي معلومة بخصوص الابيات لاني مكنتش اعرف انها نونية القرضاوي...وبما ان تعليقه اتحذف لما رفعت الموضوع انا قلت احقاقا للحق انوه عن الامر

36 comments:

الحلم العربي said...

جميلة مشاعرك كمدونتك
أنا قريت مقالة قبل كده عن كيفية تعامل الاخوان مع الابتلاءات و انهم بيعتبروها موسم للصبر و التصبر و التجلد و بياخدوها كنوع من تجديد النوايا لله....
النصر هييجي هييجي ان شاء الله و علشان ييجي لازم يتحمله الرجال على أكتافهم .......و من لها غير المخلصين ؟!!!
تحياتى

Alaa said...

السلام عليكم
اي مصلح في التاريخ لاقي من ألوان العذاب و الاعاقة مالم يجده اي انسان
و لو قرأتي رسالة بين الامس و اليوم التي وضح فيها الامام البنا لاخوانه ما سوف يلاقونه من اضطهاد الحكام و جهل الشعوب
سترون ان هذا امر طبيبيع ان يحدث لدعوة الله في مجتمعاتنا
اللهم اهد قومنا فانهم لا يعلمون
جزاكم الله خيرا على النصيحة يا اختي الكريمة

عصفور المدينة said...

القضاة ثلاثة قاض في الجنة وقاضيان في النار

عاشقة الرحمن...سميه العريان said...

الطريق مش سهل

ولازم ندفع ثمن الحريه

ياسر مدني ...دينامو الإخوان said...

من وهب نفسه ليعيش لدينه ولله عاش متعبا ولكنه عاش عظيما ومات عظيما

ولا انتو ايه رأيكو...؟؟؟

AbdElRaHmaN Ayyash said...

:)
ما هم لو ماتوا مش هيقدروا يعملوا حاجه في الفكرة
الاشخاص بتموت
لكن بيبقى ذكرها
والافكار عمرها ما بتموت
خصوصا ان الرسالة ربانية
والفكرة مش فكرة بشر

Anonymous said...

الموضوع عجبنى اوى عل اد ما هو محبط بس بيعبر فعلا عن الى جوايا برضه
انا مش اخوان بس فعلا بحبكو نفسى ابقى زيكو
و ربنا اكيد جنبكو متقلقوش وبشر الصابرين
وانا وثقه ان الفرج قرب خلاص مهو مظنش انه ممكن يكون فى اسؤ من كده وضع ف اكيد الفرج خلاص قرب

AHMED SAMIR said...

ربنا يفك سجنهم ان شاء الله
على الرغم اني مش اخواني الا اني متعاطف معاهم تماما...يكفي انهم ناس محترمة وعمرهم ما اذوا حد
تحياتي ليكي

Anonymous said...

رغم اختلافى الفكرى مع الاخوان الا ان قلبى معهم (دون عقلى )

حلم الحرية said...

الحلم العربي ...
فقه المحن والابتلاءات جزء مهم لاصحاب الدعوات...
في كلمة بحبها اوي
(لابد للصحوة الاسلامية من ميلاد , ولابد للميلاد من مخاض, ولا بد للمخاض من الام , وسيزول الألم ويبقى الثواب بأذن الله)

علاء ...
اللهم اهد قومنا فانهم لا يعلمون
رغم كل اللي بيعملوا فينا بس بجد احيان كتير بالاقيهم صعبانيين عليا
ما هو اللي بيعمل الحاجات دي ومش حاسس ببشاعة اللي بيعمله ولا بجزاؤه عند ربنا في الاخر ولا بيعمل لليوم اللي حيقف فيه ادام ربنا ويساله هل حكم وعدل وللا ضيع الامانة
لازم يصعب علينا
اينعم اللي بيحصلنا صعب بس واقع الامر ان اللي اللي الحكومة بتعمله في نفسها باخطائها دي اصعب واصعب

حلم الحرية said...

عصفور المدينة ...
هل هناك من يسمع


عاشقة الرحمن...
بندفعه
وحندفعه
وحنفضل ندفعه
لغاية ما نحصل علي الحرية قريبا ان شاء الله

حلم الحرية said...

ياســــــــــر مدنــي ...
حلوة اوي الجملة دي
عاش متعبا ولكنه عاش عظيما ومات عظيما
فعلا
صدقت


AbdElRaHmaN Ayyash ...
زي ما حضرتك قلت
الافكار مش بتموت خاصة لو الرساله ربانية

حلم الحرية said...

Anonymous ...
انا فرحانةاوي بكلامك ده وتاكدي ان الاخوان برضة بيحبوكي زي ما بتحبيهم
وان شاء الله الفرج قريب

A.SAMIR ...
اللهم امين
ما هو نصيب الناس المحترمة دلوقتي المعتقلات اما الناس التانية نصيبها المناصب والسلطة
اقول ايه بس
لكي الله يا مصر

مصطفى محمود...
يكفينا انه يكون قلبك مع الاخوان
ده كفاية اوي
وياريت يبقي قلبك مع الاخوان ودعاءك كمان معاهم
ان ربنا يرزقهم الصبر و الثبات وان المحنة تمر علي خير

ياسر مدني ...دينامو الإخوان said...

أنا عايز أقول لو كانت دجت ( مش دقت )علي الراس طبول ده معناه إن الموضوع عادي لا والله انا شايف ان الموضوع مش عادي بس إحنا حنصبر لان احنا مبتلين ومعانا ربنا وياما دجت علي الراس طبول ولا ايه......؟

مشروع انسان said...

عجبنى اوى الهتاف اللى بيقول
ان فى مصر قضاة لا يخشون الا الله
برضه فى مصر قضاة لا يخشون حتى الله
ان هؤلاء عذابهم شديد ان لم يتوبوا ويرجعوا وكما قال الرسول عن القضاة قاض فى الجنة وقاضيان فى النار
بس والله ده طريق الدعوات وده بيثبت للواحد انه صح فكم من رسول اوذى ومن داع ابتلى ومن مصلح حورب
اللى بيحصل ده اذا محصلش كنا نتاكد اننا على باطل واننا ماشين فى طريق غلط لكن النصر قريب جدا وان النصر مع الصبر المهم الثبات على هذا الطريق نسال الله الثبات وان تزيدنا تلكم الضربات قوة واصرار
والله اكبر ولله الحمد

قضية عم أحمد Ahmed Case said...

الله يسامحك انا مكنيش ناقص اسى وحزن وعضب من البلد .
بس معاكي حق الشريف الان اصبح مكانه السجن تو الرف .
ربنا يكون مع الاخوان ومع اي حد مصلح بيحب مصر .
لك الله يا مصر وبتحب عصبن عن عين التخين

همسة قلم said...

جبتي المفيد يامروة
مش اول مرة ومش هتكون اخر مرة
يمكن شكلها غير المرة دي لكنها مش غريبة او جديدة تحصل في الاخوان

وعلى رأي سمية العريان الطريق مش سهل
وطالما اننا ارتضينا الطريق ده من البداية يبقى الصبر والرضا لازم يكونوا الرفاق في الرحلة دي

وياحنا ياهما

:)

belal said...

كنت عاوز أقول إن الأغنية اللي حضرتك حاطاها حلوة

Anonymous said...

موفقه

BELBESY said...

طيب والاخر ايه ؟

خلينا واقعيين

ايه اتغير وايه هيتغير

معلش بحب الواقعيه

يا ترضى بالواقع يا تختارى شعور العجز

طيب ايه رايك ما كلنا عارفين اللى فيها

طيب ايه رايك تشكيهم لله بينك وبينه طول العمر

ولو حد جه عليكى ثورى وولعى فيهم

انا بصراحه جه الماوس كده صدفه وكنت لسه هقفل الصفحه لقيت اغنيه فى برنامج التحميل

حملتها
الله الله الله

والله جميله جدا ربنه يجازيكى كل خير
انا محتاج تشجيع من النوع دا دلوقت

بجد متشكر موت

حقى اهرتل said...

انا كنت من غير الصحاب صاحب قلق
وكنت عايش ف الحياه ع المفترق
مين اللى قال انك هتقدر تنتفض
من غير ما حد يشد ايدك م الغرق

elkamhawi said...

ربنا اكيد هيفرجها

Anonymous said...

DR/MY SISTER
my blog domain whas changed
the new
http://ibnyosry.maktoobblog.com/

Anonymous said...

إن النصر مع الصبر
وإن الفرج ممع الكرب
وإن مع العسر يسرا

wayfarer said...

في زمن تتوه فيه الحقائق و يضحى المظلوم أمام القاضي ظالما لأنه حمل حلما أو فكرة
و لكنها ضريبة من يحمل الأفكار من يحمل حلما لوطنه قدره أن يحترق من أجل الحلم حتي يصبح حقيقة هكذا قال التاريخ
..........................
أضحيت أتعجب هل أنتهى زمن غاندي؟؟

dead man said...

علي الرغم من انى اختلف مع الاخوان في بعض النقاط .. ومحمد عارف ده
:)

الا انى بطالب بجد بالافراج عنهم.. زي ما بنطالب بالافراج عن اى معتقل من غير محاكمة او بيتحاكم امام قاضي غير قاضيه الطبيعي

Anonymous said...

حسبى الله ونعم الوكيل
هى ايام وسزهق الباطل وسيذهب حسالة البشر من مخبرين وباعة الوطن الى مزبلة التاريخ كاخوانهم الذين سبقوهم بالظلم
حسبنا الله وكفى

ابوزياد الفاتح said...

الصراحه الموضوع ده
من اجمل ما قرئت على مدونتك
جميل اختى
جزاك الله خيرا
ولن اقول اكثر من حسبنا الله ونعم الوكيل
لكن هذا هو طريق الجنه وطريق الحريه وطريق المجد
ملىء بالصعاب والاشواك
فمن يريد الجنه
فليتحمل اذن ما يلاقيه
والا فالطرق الاخرى اسهل بكثير
ولكن

سياتى الضياء برغم الغيوم
وتشدوا الطيور بذاك القدوم
ونمضى سويا على دربنا
وفى كفنا شعلة من علوم
فتوحيدنا عزة المسلمين
به قد قهرنا عدوا ظلوم


دا عنوان مدونتى
ادخلى وقولى رايك
www.islamnaaa.blogspot.com
جزاك الله خيرا

Hamed Ibrahim said...

الواحد بيفرح لما بيلاقي ناس عندها روح !!!

حلم الحرية said...

امام الجيل ...
برضه فى مصر قضاة لا يخشون حتى الله
ـــــــــــ
جملتك تصديق لكلام الرسول - ص-
القضاة ثلاثة قاض في الجنة وقاضيان في النار
الا هل من متعظ

احمد رفعت ...
باعتذر طبعا لو سببنا لحضرتك حزن او غضب من البلد
لكن للاسف ده شئنا ام ابينا هو الواقع ..مؤلم نعم ...قاسي نعم ...لكن يظل هو الواقع

حلم الحرية said...

همسة قلم...
علي رايك
ولو اني دايما باسال هما ليه رافضين ان نبقي احنا وهما وكل مصر ....هيه مصر دي مش بتاعتنا كلنا


belal ...
سعيدة براي حضرتك في الاغنية
...وان كنا في انتظار رايك في الموضوع برضة

حلم الحرية said...

ibnyosry ...
جزاك الله خيرا علي مرورك
وعلي رايك

belbesy ...
...في الاخر
...تحقيق الحلم
...حلم الحرية
قريب ان شاء الله
سعيدة اوي ان الاغنية عجبت حضرتك
ابقي ادعيلنا مع كل مرة تسمعها

حلم الحرية said...

حقى اهرتل ...
لو قررنا ننتفض هننتفض
سعيدة باول زيارة لحضرتك عالمدونة وان شاء الله متكونش الاخيرة


elkamhawi ..
قريب ان شاء الله

حلم الحرية said...

بهاء ...
إن النصر مع الصبر
صدقت اخي الكريم

wayfarer ...
أضحيت أتعجب هل أنتهى زمن غاندي؟
ـــــــــ
من يدري ربما غاب قليلا لكن يوما سوف يعود

حلم الحرية said...

dead man ...
قد نختلف في الرؤية لكن في النهاية نتفق في الثوابت كمعني الحرية والعدالة وحقوق الافراد
منور المدونة يافندم ونتمني تتكرر زيارتك باستمرار


مصعب احمد الشهيد ...
نعم سينساهم التاريخ
بينما يبقي الاحرار في ذاكرة الايام يكتبون قصة جهادهم في سبيل قضيتهم

حلم الحرية said...

ابوزياد الفاتح...
سياتى الضياء برغم الغيوم
وتشدوا الطيور بذاك القدوم
ـــــــــــــ
باحب النشيد ده اووووي
كلماته اكتر من رااااائعة
فعلا سياتي الضياء برغم الغيوم...قليل من الصبر فقط وسياتي في القريب


Hamed Ibrahim ...
اكيد طبعا يافندم
سعيدة باول زيارة لحضرتك عندي
نتمني متكونش الاخيرة