Tuesday, July 24, 2007

التاج علينا حق....كلاكيت تالت مرة


اخييييييييييييييييييييييييييييييرا وبعد غياب عن عالم التدوين لظروف خارجة عن ارادتي رجعت النهاردة

اكتشفت انه تقريبا والله اعلم فاتني كتيييييييير ...هاحاول بقدر الامكان الحق اتابع واقرا اللي فاتني عند باقي المدونين
بالنسبة للبوست ده اخيييييييييييييييرا قررنا نحن المقررون ...اني ارد علي التاج اللي قرب يخلل عندي

تاج بعتهولي ...امام الجيل - مدونة امام الجيل

علاء - مدونة مش انا

اروي الطويل - مدونة انا كده

ابو زياد الفاتح - الفجر الباسم قادم

جزاهم الله خيرا



نبدا بالرد علي اسئلة التاج


أنت مين؟


ممممممممممم

هو انا مقتنعة انه من السهل اني اتكلم عن الاخرين ومن الصعب اوي خالص جدااااااااااا اني اتكلم عن نفسي

وباعتبر السؤال ده هو اصعب سؤال في اي انترفيو باعملها عشان الشغل

انا ميييييييييييين؟؟؟

انا مروة .....كنت لغاية شهر ستة اللي فات طالبة في سنة رابعة في صيدلة اسكندرية وحاليا في انتظار النتيجة ان شاء الله خلال اليومين الجايين - عايزة دعوة جامده اوي خالص جدا ...ويا سلا م لو تكون دعوة في سجود في ركعتين قيام ...حقيقي تبقي حاجة محصلتش ..يبقي جزاكم الله خيرا ونجيلكم في الافراح ان شاء الله...بس هيه النتيجة تطلع والواحد يتخرج ويبقي صيدلي زي ما كنت باحلم ( متصدقوش ما انتوا عارفين اللي فيها ) وبعدها نبقي نجيلكم في الافراح...طبعا عشان ناكل جاتوه ونشرب شويبس ...

اكمل بقي...انا ميييييييين؟؟؟

انا بنت مصرية عادية جدا ...زي الاف البنات في مصر...زيك لو كنتي بنت ...وزي اختك او قريبتك او جارتك او زميلتك لو كنت ولد

بنت عادية جدا ...باحمل ملامح تشبههم ...عشت طفولة وشباب بتملاها ذكريات زي ذكرياتهم...جوايا نفس احلامهم.........مش باقولكم بنت عادية جدا

يمكن بس اختلف في اني باحمل رساله ومؤمنة بفكرة ...بمعني تاني اني ببساطة من الاخوان ...من ايام ما كنت في الزهرات لغاية ما بقيت من الاخوات ...ربنا يرزقنا الثبات

باحب الرسم والخط العربي والقراية والسياسة والنت

لو السؤال بيتضمن الصفات كمان .. بيقولوا عليا طيبة...وصديقة ييجي منها....بيقولوا عليا اني عاقلة ( هما اللي بيقولوا انا مليش دعوة متصدقوهمش ...قال عاقلة قال...دي بقت تهمة في الزمن ده)...الصفة الاخيرة اللي بيقولوها عليا اني متفائلة اوووي - والغريب انهم حاطين الصفة الاخيرة دي ضمن عيوبي

ــــــــــــــــــــــــــــــــــــــــــ

مين اكتر ست شخصيات بتحبهم؟


لالالالالالالالا

ستة بس

مينفعش طبعا

طب واودي بقية اسماء اللي باحبهم فين؟؟؟؟

وبعدين انتوا عايزيني اتضرب لما ناس تدخل تقرا ومتلاقيش اسمها...لا يا جماعة العمر مش بعزقة ...الطيب احسن ...انا مش هاقول اسماء شخصيات عايشتها

لكن هاقول اسماء شخصيات عامة باحبها وباعتبرها قدوة ليا

الدكتورعبد العزيز الرنتيسي

الحاج عباس السيسي

الاستاذ ضياء رشوان

دكتورعصام العريان

دكتور مجدي الهلالي

ــــــــــــــــــــــــــــــــــــــــــ


أنت سعيد؟


لا انا مروة

هههههههه

ممممممم

سعيدة بمعني الفرحة معتقدش

لكن نقدر نقول جوايا رضا بيخليني دايما ومهما كانت الظروف الحمد لله سعيدة

دايما من ادعيتي الثابتة ان ربنا يرزقني رضا لا ينتهي


ــــــــــــــــــــــــــــــــــــــــــ

لو أجتمعت أنت وحسنى مبارك فى غرفة واحدة هتقوله ايه؟


هاقوله الاية (انك ميت وانهم ميتون)....ومش بعيد اوريهاله عملي عشان يصدق

ــــــــــــــــــــــــــــــــــــــــــ

لو معاك مليون ونص هتعمل بيهم ايه؟


اشمعني يعني مليون ونص

طب ليه مش اتنين مليون

وللا حتي مليون واحد ..معلش اصلي مش باحب الكسور

عموما لو معايا مليون ونص متهيالي اول حاجة هاعملها اني هأدي جزء لعيلتي ( الاقربون اولي بالمعروف )

الجزء التاني هاعمل بيه مشروع خاص بيا ...مؤسسة تهتم بالجانب التربوي والابداعي عند الاطفال...يتم فيها تطبيق برامج لاكتشاف مواهب وميول الاطفال وتنميتها وتطويرها ..ثم توجهيها لتتناسب مع متطلبات سوق االعمل في الستقبل

من الاخر ...مؤسسة تعني ببناء الانسان


الجزء التالت هانشئ مؤسسة خيرية رسالتها المساهمة في حل مشكلة البطالة ...مؤسسة توفر للشباب قروض لبدء مشروعات صغيرة ...وتوفر لهم دعم فني وتقني وعلمي يمكن الرجوع له لمساعدتهم في مشروعاتهم

الجزء الرابع هاتبرع بيه للعمل الدعوي عموما وللاخوان خاصة

الجزء الخامس هاتبرع بيه لفلسطين

مممممممممم هو كده زمان المليون ونص خلصوا من زمان بس اكيد قبل ما يخلصوا هابقي اشيل منهم كام مية اروش نفسي بيهم ...ان الله يحب ان يري اثر نعمته علي عبده

ــــــــــــــــــــــــــــــــــــــــــ

بتحب مصر؟


مش بس باحبها ..ده انا دايبة في حبها ...ولما كنت باسال نفسي
ليه باحبها ...كنت بالاقي مليون اجابة واجابة

باعشق اهلها ..باحب شوارعها...باحب فيها تمشية علي الكورنيش بالليل....وللا رملة الشط ومية البحر...قعدة العصاري مع ماما وبابا واخواتي ...لمة رمضان وفطار رمضان والعيلة كلها متجمعة ....ليلة العيد وزحمة ليلة العيد ...نزولة محطة الرمل...فول وفلافل محمد احمد ....اوساندويتشات مؤمن ...صاحباتي في الجامعة احلي صداقة واجمل صحوبية...مدرستي القديمة ومدرساتي فيها....شغلي مع الاخوات

باحب فيها حاجات كتير ومهماحصل ليا فيها ومنها مش هاكرهها ابدا

ايوة فيها سلبيات كتييييييير ...

وفي اوضاع تضايق كتييييييييير

واحيان كتير بابقي خايفة انها متكونش بتحبني زي ما باحبها

لكن بتفضل الحاجات الكتير اللي باحبها....بتخليني اصبر واصبر واصبر لغايى ما ييجي اليوم اللي نشوف مصر فيها افضل ما يكوووووون
ــــــــــــــــــــــــــــــــــــــــــ

بتحب البنات؟

اينعم ...اكيييييييد

يستاهلوا يتحبوا طبعا

ده حتي دمهم خفيف وخفاف علي المعدة ...اصدي عالقلب

بالذات الصغيرين منهم حاجة كده زي العثثثثثثثثثثثثل

ــــــــــــــــــــــــــــــــــــــــــ

أنت مسلم؟

ياربي لك الحمد كما ينبغي لجلال وجهك وعظيم سلطانك

مش عارفة ليه اول ما قريت السؤال ده افتكرت حديث حارثة

لما الرسول -ص- ساله كيف أصبحت يا حارثة؟

ورد حارثة اصبحت مؤمنا حقا فساله النبي -ص- انظرما تقول فإن لكل قول حقيقة فما حقيقة إيمانك؟


تخيلتني باجاوب بالايجاب علي السؤال بتاع التاج نعم انا مسلمة ...فيكون السؤال التالي لي فما حقيقة اسلامك

بادعي دايما ربنا اني اكون مسلمة حقا ومستسلمة فعلا لاوامره ونواهييه

نسال الله الثبات


ــــــــــــــــــــــــــــــــــــــــــ

ليه؟


للمرة التانية بالاقيني باكرر الدعاء

ياربي لك الحمد كما ينبغي لجلال وجهك وعظيم سلطانك

من رحمته بيا وحبه ليا اني ولدت مسلمة ...ونشئت مسلمة ...بينما في نفس الوقت بيعيش غيري يبحث عن الدين ويصعب عليه ان يجده


ــــــــــــــــــــــــــــــــــــــــــ


أيه اكتر موقف محرج أتعرضت ليه؟


احم احم احم

صباح الاحرااااااااااااااااااااااااج ...ليه بس السيرة دي

اكتر موقف محرج بالنسبة لي كان موقف حصلي في سكشن الهيستولوجي وانا في سنة اولي كنا مجموعة كبيرة من السكشن واقفين عاملين زحمة عالميكروسكوب وكل واحد بالدور بيبص علي العينة ويكتب ملاحظات وبعدها ينطلق للعينة اللي وراها

المهم ان واحنا واقفين واحدة زميلتي في السكشن طولت اوي عالميكروسكوب ...واحنا واقفين مستنيين وراها عمالين نقول دلوقتي هتخلص ...لما لقيناها طولت كنت انا واقفة وراها قعدت اهزر معاها واستعجلها وبهزار كنت باقولها انها طولت والسكشن كده هيخلص ...عادي يعني ...البنت تقريبا كانت واخدة الموضوع جد اوي ..لقيتها بتلف لي وبتزعقلي جامد خالص جدااااااااا ادام كل اللي واقفين من السكشن وللعلم سكشني اصلا معظمه ولاد يعني الاحراج مضاعف ...طبعا انا مكنتش متوقعة و اتخضيت بجد من رد فعلها...لاني حتي هزاري مكنش اوفر مثلا عشان نقول ممكن تكون اتضايقت من كلامي....علي العكس كلامي كان في حدود المعقول والمتقبل

ــــــــــــــــــــــــــــــــــــــــــ


اتصرفت ازاى؟

اخدت جرعة الاحراج دي ومردتش ورحت للناحية التانية من السكشن اتفرج علي باقي الميكروسكوبات - قال يعني العلم واخد حده -...مش عايزة اقولكم اني طبعا مكنتش مركزة في اي حاجة والسكشن ده مر عليا كانه لم يكن ولا كاني شفت اي ميكروسكوبات فيه وبمجرد ما السكشن خلص اخدتها بالخطوة السريعه علي باب الكلية عشان اروح ...رغم اني عمري ما كنت من الناس اللي بتخلص المحاضرات او السكاشن وتجري تروّح...ورغم اني عادة السكة عندي من المبني لباب الكلية بتاخد ساعات عقبال ما اسلم علي البنات اللي اعرفهم وباقابلهم في السكة ...متهيالي ده اليوم الوحيد ليا في الكلية اللي السكة دي اخدت مني ثانيتين ...وبمجرد ما خرجت من باب الكلية معرفتش امسك نفسي ورحت معيطة ...اصلها زعقتلي جامد اوي وانا مكنتش عملت حاجة اصلا عشان تزعقلي ... غير ان معملتش اي رد فعل وكتكمت ده خلاني من غير ما احس بمجرد ما خرجت من باب الكلية فقدت السيطرة علي نفسي وقعدت اعيط - كل ما اتخيل منظري ساعتها وانا ماشية في الشارع باعيط ..ياااااااااه ...بلاش اعلق علي منظري احسن -


نسيت اقول ان البنت دي بقت صاحبتي اوووي بعد كده...وباحبها وبتحبني جداااا


ــــــــــــــــــــــــــــــــــــــــــ


أيه الامنية اللى بتدعى ربنا انه يحققها ليك؟


ان ربنا يرزقني حسن الخاتمة

وانه يستعملني ولا يستبدلني
وانه يرضي عني ويرضيني ويراضيني
وان ربنا يرزقني حبه وحب من يحبه وحب عمل يقربني الي حبه

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

خلص التااااااااااااج ..اخيييييييييييييييييرا

طبعا مش لاقية حد موصلهوش التاج ده ..عشان كده مش عارفة امرره لحد

وبناءا عليه التاج ده هدية للي يحب يجاوب عليه

اتفضلوا بالهنا والشفى


33 comments:

belal said...

معشلي هاحجز أول تعليق وبعدين أعلق في التاني

belal said...

إجابات حلوة اوي
ربنا يكرمك
...
حلو الموقف المحرج دا ...أنا افتكر حاجة زي كده حصلتلي ..كنا بنلعب كورة
والواد قاعد بقاله سنتيين عشان يشوط ضربة جزاء

قمت واخد الكورة من قدامه ..والكورة مش بتاعتي..ومروح ..ومزقلهم بالطوب

مش مهم طبعا اللي حصل بعدها
....

شقاوة شعب said...

شوفى يا ميرة يا أوختشى
فى المواقف اللى زى دى اللى بنتحرج فيها وكل ما نفتكرها نتحرج اكثر علينا ننفذ الحل الذهبى اللى قلت عليه فى بوست "احاسيس مزعجة" عندى فى المدونة

بس انتى جربيه وادعيى لاختك

سارة بندارى said...

ههههههههههههههههههه

صباااااااااااح الاحرجات يا موووورا

بس جامد يا بنتى هيهيهيهيهيهيهي


بس إجابات أكثر من رائعة

جزيتى خيرا كثيرا

ولــــــــــو said...

اولا احييكي على الردود كانت كويسه جدا وعقلانيه الا القليل وده كان احلام ان شاء الله تتحقق
اكتشفت حاجات كتير من الردود وكلها كويسه وفي النهايه اتمنالك التوفيق والنجاح
بس ليا سؤال
يعني ايه هيستولوجي
انا ليا اصحاب كتير صيادله وكل كلامهم بيخلص ب اولوجي كلمه مستفزه بصراحه
سعيد بمعرفتك يا دكتور

ياسر مدني ...دينامو الإخوان said...

ليكي تاج عندي
ويااااااااااااااارب ترد
بس انتي جددي النيه وإتوكلي علي الله وإن شاء الله حيعجبك

مشروع انسان said...

اخيراااااااا
وايه التاج ده انا اعتقد والله اعلم ان فيه صليب بتاع ابوهم ده
هى دى اخرتها هههههههههه
ما شاء الله اجابات جميلة وجميل ان الواحد يكون بيحب الناس ويحبوه كده بس الموقف المحرج كان لازم تردى بس طبعا باسلوب كويس وما شاء الله صاحبتيها ده يدل على نقاء قلبك
بالتوفيق ان شاء الله
نرجو حضور اول لقاء للمدون خانة يوم السبت الجاى التفاصيل عندى وعند علاء مش انا

محمد عـنـانـى said...

حمد الله على العوده با السلامه

حلم الحرية said...

other_things ...
الاخ بلال
التعليق الاول بيرحب بحضرتك
والتاني كمان
مبروك المدونة التانية بصراحة حلوة اوووي
ان شاء الله هاقرا اللي فيها واعلق
...
بالنسبة للموقف المحرج
مستنيين نعرف اللي حصل بعدها


شقاوة شعب ...
ما انا نفذته يا اوختشي
والدليل اني انا وصاحبتي بقينا صحاب بعد كده
يعني مجرباه مسبقا وان كان بميكانزم تاني مختلف حبتين
وبادعيلك من غير حاجة

حلم الحرية said...

سارة بندارى ...
سارة بحالها هنا
لولولولولولي
منورة البلوج يا بنتي
مبروك المدونة
وبعدين مالها الاحراجات
ملكيش دعوة بالاحراجات
بمزااااااااااااجي
نياهاهاهاههههههههههاهاهاا


ولــــــــــو ...
احم...حضرتك اكتشفت حاجات من الردود!!!
حاجات كتييير كمان!!
زي ايه؟؟
بالنسبة للسؤال
هيستولوجي يعني علم الانسجة
وكلمة اولوجي لازم تتكرر كتير
اصلها كلمة لاتينية بمعني علم
طبيعي انها تتكرر في اسماء المواد والعلوم اللي بندرسها
سعيدة بمرور حضرتك عالمدونة

حلم الحرية said...

ياسر مدني ...دينامو الإخوان ...
التاج فعلا جميل
بس يابني مالك ومال الدستور
هيه معقداك كده ليه
ان شاء الله ارد عليه قريب

امام الجيل ...
هو فعلا تاج عجيييييب
بالنسبة للموقف هو من الخضة معرفتش ارد لسه باقولها اهدي وبالراحة لقيتها بتزعق ...معرفتش انطق بنص ولا حتي فتفوتة كلمة
بالنسبة للقاء المدون خانة حقيقي باتمني اني اروح
للاسف عندي كذا حاجة في اليوم ده
بس ان شاء الله هاحاول

محمد العنانى...
الله يسلمك يافندم

Aml Ghonaim said...

ايه يابنتى ؛
أخيــــــــــــــــــــــــــــرا
ده فعلا خلل عندك ....
بس اجاباتك جميلة جدااااا
طمنينا على النتيجة ؛ ماااشى ؟
ربنا يوفقك ؛ ويكتب لك الخير دايماااا

الـفجـريـــة said...

ايه يا مروة الغيبة الطويلة دى

يلا خير

الاجابات جميلة

بس مستنيني تدوينات

وتاجات بردو متضرش

والله يا مروة كل مبدخل هنا بفتكر اسكندرية ولما افتكرها احس انى عاوزة اجى ولما احس انى عاوزة اجى افتكر ابى ولما افتكر ابى احس بشجن

كل ده عشان دخلت هنا
انا اللى غلطانة
:)

Mai_Jeneen said...

يااااااه

مروة

ده كنت فقدت الامل فيكي يا بنتي

قلت تلاقي البنت اشتغلت و اتنغنغت و بقت من اصحاب الاملاك بقى و مش حتعبر فينا تاني


يلا خير

بصراحة الموقف ده لو مكانك مش عارفة كنت عملت ايه

كويس اني مش مكانك

باشمهندس بلال
هههههه

أضحك الله سنك
بس انا مش شايفة اي علاقة بين الموقفين غير الانتظار

:D

Anonymous said...

السلام عليكم
اول زيارة ليه للمدونه الجميلة دي
حقيقي ربنا يكرمك وعلى فكرة ردودك على الاسئله كانت بتوصف حاجات كتير من شخصيتك بجد شخصيه جميله وخجوله وده اهم حاجة ربنا يرزقك دائما الحياء
ويوفقك وينجحك قادر ياكريم ويرزق كل اللي يحرجك بحد يحرجه
هههههههههههههه
السلام عليكم

ابن رشد said...

متهيئلي بعد كل دة لازم نكتشف ان ليكي شخصية متفردة

عصفور اسكندرية said...

صور الاجتماع التاسيسي للمدون خانه
حصري علي مدونه
لسه عايش
والمواطن المطحون

.: صور الاجتماع التاسيسي للمدزن خانه

مش هنسى said...

إجابات جميلة وخفيفة جزاكم الله خيرا ويارب يكتب لك ولينا النجاح السنة دى ونجلكم فى الأفراح

عصفور اسكندرية said...

انا اسف اني ماعلقتش علي التاج المره اللي فاتت

بس بالنسبه لحكايه دار تربيه الاطفال انا مستني التعيين عندك
عشان انا تربيه اساسي

وبالنسبه لمبارك اطل الله في عمره حتي يري مصر حره في ايد امينه ويحس انه مواطن مش صاحب البلد عشان يموت نفسه بنفسه او يموت من الحسره
ادعي عليه بس ادامه وسبيه للزمن ياكله زي البارومه

حزيــــــــــــــــــن said...

التاج دا قريته كتير جدا جدا
اجاباتك تنم عن شخصيه واعيه
ممكن سؤال واعتبريه ضمن التاج
انتى من ساعة ما زورتى مدونتى مره زمان ومجتيش تانى ليه
يا ريت تنورينى
مدونة مزاج

يلا مش مهم said...

بصي انا دايما الاقي تعليقك عندي اقوم داخل علي مدونتك علشان اعلق
بالطبع بلاقي تدوينات جميلة بس للاسف
ما كنتش تستحث داخللي الرغبة في التعليق
لغاية لما لاقيت التحفة الرائعة المسماة انا واخويا ولقاطات من شريط الذكريات
لاقيت بركان التعليق انفجر جوايا
لازم اكتب
لازم اعلق
لازم اشيد
لازم احيي
فدخلت علي اخر تدوينة عندك علشان اكتب تعليق علي تدوينة اخري لاني كنت خايف ان تعليقي ما يوصلش لو اتكتب هناك او يتوه وسط الزحمة هناك
فجيت هنا
ولا املك الا كلمة واحدة اعلق بها عي ما كتبتيه هناك وهي
الله
وبس
ويللا مش مهم

Anonymous said...

جميلة إجاباتك وأمنياتك
ربنا يحققلك أمانيكي كلها
ويبعد عنا جميعا الإحراجات

اسلام رفاعى said...

عذرا للتحليقث خارج السرب
من اجل رفع الظلم عن المظلومين
ادعوك للمشاركة فى حملة رفع الظلم عن طلاب الاسكندرية المختطفين
التفاصيل بمدونتى

ابو صهيب ( الجمعاوي الاصيل)سابقاً said...

السلام عليكم ورحمة الله وبكاته
طبعا حضرتك متعرفنيش بس انا عجبتني صراحة حضرتك جدا واتمنى لك النجاح والتوفيق في الحياة العملية وادعوكي لزيارة مدونتيالمتواضعةhttp://miikha.blogspot.com/

قلب أبيــض said...

السلام عليكم
مبروك على التاج
والاجابات تدل على ان فعلا شخصية زكية جدا
ربنا يباركلك
ويوفقك
ويكرمك
جزيت خيرا
قلب ابيض

Alaa said...

أولا الحمد لله على السلامة
اجابات جميلة ربنا يباركلك و يحفظك
دعواتك

حلم الحرية said...

اصرار أمل ...
ايه خلل دي
انا بس اللي اقول خلل
هههههههههههه
منوراني يا امولة
عايزة ابقي اشوفك كتير



elfagreya ...
ايه يا بنتي كل ده حسستيني بالذنب
ده كل ده بيحصل لما بتدخلي عندي
ربنا يطمنكم علي با با ويرجعه بالسلامة
ويجيبك يفسحك في اسكندرية
واقابلك يااسماء
قريبا ان شاء الله

حلم الحرية said...

عيلة و عايزة افهم ...
هنقر بئا من اولها
خلاص خلاص
هابقي اعزمك علي حاجة من المرتب لما اقابلك
ههههههههه
ربنا يكرمك يا مي
زيارك اسعدتني كالعادة


بنات افكاري ...
اميييييييييييين
اول زيارة ليكي ويا رب متكونش اخر زيارة
اتمني تتكرر زيارتك مرات ومرات
جزاكي الله خيرا علي دعائك

حلم الحرية said...

shams ...
شخصية متفردة حتة واحدة
ربنا يكرمك يافندم
بس انا اقل كتير من الكلمة دي
شكرا علي مرورك ونتمني زيارتك لينا تتكرر


مش هنسى....... حسين رضا ...
اميييييييييييييييييييين
و كل الطلبة ياااااااااااااارب

حلم الحرية said...

المواطن المطحون ...
احم
هو بس ييجي المليون ونص وانا اعين شعب مصر كلهم

تابعنا مع حضرتك اللقاء التاسيسي للمدون خانة
نقل ومتابعة صحفيةرائعة
ربنا يباركلك


حزيــــــــــــــــــن...
باجي يافندم والله
بس يمكن مقصرة في التعليقات شويتين
جاري زيارة المدونة والتعليق فيها

حلم الحرية said...

يلا مش مهم ...
مش عارفة اقول ايه بصراحة..ربنا يكرمك
جزاكم الله خيرا
علي التعليق
والاشادة
والتحية

نتمني زيارة حضرتك تتكرر كتيييييير
واننا نشوف تعليقاتك دايما هنا

بهاء ...
اميييييييييييييييين
بالذات لو احراجات من النوع ده

حلم الحرية said...

اسلام رفاعى ...
جاري متابعة الحملة

الجمعاوي الاصيل ...
جزاكم الله خيرا علي رايكم
وان شاء الله نتابع مدونة حضرتك

حلم الحرية said...

قلب أبيــض ...
اميييييييييييين
جزاكم الله خيرا علي الدعاء



علاء ...
ربنا ييسرلك الامر ويباركلك في وقتك